1 Koga o Isus hem leskere učenikija ale paše uza ko Erusalim, ki Vitfagija hem ki Vitanija, ki Maslinovo Gora, o Isus bičhalgja pe duje učenikon, 2 vakerindor: "Džan ko akava gav, soj angli tumende. Samo so ka khuven ki leste, ka arakhen terno her soj phandlo, so panda nijekh manuš na uklilo ki leste. Phraven le hem anen le akate. 3 I te pučlja tumen nekoj: ‘Soske kerena akava?’ vakeren, ‘E Gospodareske trebela hem odma ka iranel le palal.’ "

4 Ola gele i arakhle e terne here avrijal ki ulica, phandlo ki porta. Dži kote phravena le sine, 5 nesave manuša so bešena sine adathe vakerge lenge: "So kerena, soske phravena le?"

6 Ola vakerge lenge sar so phengja lenge o Isus hem o manuša mukhle len. 7 Koga ange e terne here ko Isus, čhige pe šeja upro her, hem o Isus bešla upro leste.

8 But džene bujlarena sine pe šeja tele ko drumo, a nesave manuša zelena granke listoncar, so čhinge len taro nive. 9 A okola so džana sine angli leste, hem pali leste, vikinena sine:

"‘Osana!

Blagoslovimo okova so avela ko anav e Gospodareskoro!’"✝

10 "‘Blagoslovimo tano o carstvo amare dadeskoro e Davideskoro, so avela!

Osana ko učipe!’"

11 Koga o Isus alo ko Erusalim, khugja ko dvoro taro Hrami, dikhla sa adathe, ama sine više kasno, iklilo hem gelo e dešuduje učenikoncar ki Vitanija.

12 O tajsutno dive, koga iklilo tari Vitanija, o Isus bokhalilo. 13 A duraldan dikhla jekh smokva, so sine učhardi listoncar, hem alo te dikhel dali isi la plodija. Koga alo uza late, dikhla deka nane la ništo samo listija, soske na sine o vreme bašo smokve.

14 Togaš phengja e kašteske: "Nikoj te na hal više taro to plodi!"

A leskere učenikija šunge so phengja adava.

15 Koga resla ko Erusalim, o Isus khugja ko dvoro taro Hrami hem počmingja te brkinel adalen so kinena sine hem so bikinena. Irangja o astajla adalengere so meninena sine pare hem o tezge so bikinena sine gulubija, 16 hem na mukhela sine nikas te anel roba ko dvoro e Hrameskoro.

17 Hem sikavela len sine, vakerindor: "Nane li pišimo ko Sveto Lil: ‘Mo kher ka vikinel pe kher molitvake bašo sa o narodija?’✝ A tumen kergjen le than kote so khedena pe o čora!"✝

18 O prvosveštenikija hem o učitejla e Zakoneskere koga šunge adava, počminge te roden sar te mudaren le, adaleske so darana sine lestar, soske o narodo sine iznenadime taro leskoro učibe.

19 Koga rakjilo, o Isus hem leskere učenikija ikilile taro gradi.

20 Tajsutno dive, dži kote nakhena sine, dikhle i smokva so šukili taro koreno.

21 O Petar setingja pe hem phengja e Isuseske: "Učitele, dikh! I smokva, so prokletingja la, šukili!"

22 A o Isus odgovoringja: "Neka ovel tumen vera ko Devel. 23 Čače, vakerava tumenge ako nekoj vakergja akale planinake: ‘Ušti hem frde tut ko more,’ hem na sumningja pe ko po srce, hem verujnela deka ka ovel adava so phengja, ka ovel čače kerdo. 24 Adaleske vakerava tumenge, sa so ka roden ki molitva, verujnen deka primingjen adava hem ka ovel tumaro adava. 25 Koga tergjovena ki molitva, oprostinen te isi tumen nešto protiv nekaste, te šaj tumaro Dad soj ko nebo te oprostinel tumare grevija."

26 ["Ama ako tumen na oprostingjen, ni tumaro Dad soj ko nebo nane te oprostinel tumare grevija."]

27 Ola palem ale ko Erusalim, a koga o Isus phirela sine ko dvoro taro Hrami, ale ki leste o prvosveštenikija, o učitejla e Zakoneskere hem o starešine. 28 Hem pučle le: "Kotar tuke akava avtoriteti te kere akala bukja? Koj dengja tut pravo te kere akava?"

29 O Isus odgovoringja lenge: "Ka pučav tumen me da nešto, hem odgovorinen mange. I me da ka vakerav tumenge kotar mange pravo te kerav sa akava. 30 Kotar e Jovaneske avtoriteti te krstinel – taro Devel ili taro manuš? Odgovorinen mange!"

31 A ola kerena sine lafi maškar peste: "Ako vakergjem: ‘Taro Devel,’ ka vakerel, ‘Soske na verujngjen le?’ 32 Ama ako vakergjem: ‘Taro manuš’…?" (Ola darana sine taro manuša, soske sarine mislinena sine deka o Jovan tano čače proroko).

33 I odgovoringe e Isuseske: "Na džanaja."

A o Isus phengja lenge: "Me da na phenava tumenge kotar mange pravo te kerav sa akava."