1 Angleder duj dive pred te ovel i Pasha hem o prazniko e Beskvasno Mareskoro, o prvosveštenikija hem o učitejla e Zakoneskere rodena sine sar te astaren e Isuse ko hovajbe te šaj te mudaren le. 2 Ama phenge: "Na ko akava baro prazniko, te na buninen pe o narodo."

3 A koga sine o Isus ki Vitanija, ko kher e Simoneskoro o Leprozno. Dži kote bešela sine ki sofra, ali jekh romni so sine la šiši kerdo taro mermeri, a andre ki leste sine skupo mirizlivo ujle taro čisto nard. Oj phragja o šiši hem čhorgja o ujle upro leskoro šero.

4 Nesave manuša so sine adathe holange, hem vakerge jekh jekheske: "Soske agjar bezveze čhorela pe o skupo ujle? 5 Adava šaj sine te bikinel pe baši jekhe beršeskiri plata, hem o pare te del pe e čorolenge."

Hem počminge te zaptinen la.

6 Ama o Isus phengja lenge: "Mukhen la! Soske zakačinena la? Oj kergja mange šukaripe. 7 O čorole manuša sekat ka oven uza tumende hem šaj te pomožinen len koga mangena, ama me nane te ovav sekat tumencar. 8 Oj kergja adava so šaj sine te kerel. Angleder makhla mo telo hem spremingja le bašo parujbe. 9 Čače vakerava tumenge, kote i te propovedinel pe o evangelije ko celo sveto, ka vakerel pe adava so kergja, te šaj sarine setinena pe ki late."

10 Togaš o Juda Iskariot, jekh taro dešuduj, gelo ko prvosveštenikija te predajnel e Isuse. 11 Koga ola šunge adava, radujnge pe hem denge le lafi deka ka den le pare. A ov rodela sine šužo momenti te predajnel e Isuse.

12 Ko prvo dive taro prazniko e Beskvasno Mareskoro, koga čhinena e bakhre baši Pasha, o učenikija pučle e Isuse: "Kaj mangeja te dža hem te kera tuke te ha o hajbe baši Pasha?"

13 Togaš o Isus bičhalgja pe duje učenikon vakerindor: "Džan ko gradi, hem ka arakhen jekhe manuše so phiravela pani ko bukali. Džan pala leste. 14 Hem ko kova kher ka khuvel, vakeren e gazdaske: ‘O učiteli pučela ki savi soba ka hal pe učenikoncar o hajbe baši Pasha.’ 15 Ov ka sikavel tumenge i bari upruni soba soj više spremimi. Adathe keren amenge o hajbe."

16 O učenikija gele ko gradi hem arakhle sa so phengja lenge o Isus. I adathe spreminge o hajbe e Pashakoro.

17 Koga rakjilo, o Isus gelo adathe pe dešuduje učenikoncar.

18 Dži kote hana sine ki sofra, o Isus phengja lenge: "Čače vakerava tumenge, jekh tumendar, so hala mancar, ka predajnel man."

19 Ola but razočarisalile, hem počminge te pučen le jekh po jekh: "Te na sijum me adava?"

20 A ov odgovoringja lenge: "Jekh tumendar taro dešuduj, so bolela mancar ki činija, ov tano. 21 Adaleske so o Čhavo Manušeskoro mora te merel sar soj pišimo, ama but pharo adale manušeske so ka predajnel le! Pošukar ka ovel sine leske te na bijangjovel."

22 Dži kote hana sine, o Isus lela o maro, blagodaringja, phagla le hem dengja pe učenikonge, i vakergja: "Len, akavaj mo telo."

23 Togaš lela i čaša, blagodaringja hem dengja len, i sarinen pile latar.

24 Hem phengja lenge: "Akavaj mo rat e zaveteskoro, so čhorgjola bute dženenge. 25 Čače vakerava tumenge: nane te pijav više mol, sa dži ko adava dive koga ka pijav i nevi mol ko carstvo e Devleskoro."

26 Palo adava gilage gili hem gele ki Maslinovo Gora.

27 O Isus phengja lenge: "Sarinen ka ciden tumen mandar, soske i pišimo:

‘Ka mudarav e pastire,

hem o bakhre ka našen.’✝

28 Ama palo adava, koga ka uštav taro mule, ka džav angleder tumende ki Galileja."

29 A o Petar vakergja leske: "I sarinen te cidinge pe, me nane te cidav man tutar!"

30 O Isus phengja leske: "Čače vakerava tuke, deka tu avdive ki akaja rat, angleder o bašno te gilavel duj puti, tu trin puti ka phene deka na pendžareja man."

31 Ama o Petar uporno vakerela sine: "Ako trebela ka merav tuja, ama nikat nane te kerav adava!"

Hem isto agjar vakerge sa o učenikija.

32 Togaš gele ko jekh than so vikinela pe sine Getsimanija. I o Isus vakergja pe učenikonge: "Bešen akate dži kote molinava man." 33 Lela peja e Petare, e Jakove hem e Jovane, hem počmingja te ovel le baro nemir hem pharipe. 34 Hem phengja lenge: "Doborom mange pharo so osetinava deka mi duša ka phajrol! Ačhoven akate, hem oven džangavde."

35 Gelo hari podur, pelo ki phuv hem molingja pe te šaj, te cidel lestar o pharo sati so adžikerela le.

36 Hem phengja: "Abba! Dade! Tu šaj sa. Cide mandar akaja čaša e pharipaja. Ama neka ovel ti vojla, a na mli."

37 Togaš irangja pe ko učenikija hem arakhla len sar sovena. I phengja e Petareske: "Simone, soveja li? Našti li sine jekh sati te ove džangavdo? 38 Oven džangavde hem molinen tumen te na peren ko iskušenie. O duho mangela te kerel adava soj šukar, ama o telo tano slabo."

39 I palem gelo hem molingja pe, hem vakergja ista lafija. 40 Koga irangja pe, palem arakhla len sar sovena soske lengere jakha phandlona sine, hem na džanena sine so te vakeren leske.

41 Koga irangja pe o trito puti, phengja lenge: "Panda li sovena hem odmorinena? Dosta više! Alo o sati! Akje, o Čhavo Manušeskoro ka ovel predajmo ko vasta e grešnikonge. 42 Ušten te dža! Akje, paše tano mo predavniko!"

43 Dži kote o Isus kerela sine lafi, resla o Juda, jekh taro dešuduj. A leja sine bari gužva čhurikhencar hem kaštencar, bičhavde taro prvosveštenikija, taro starešine hem taro učitejla e Zakoneskere. 44 A o Juda, o predavniko e Isuseskoro, angleder dengja len znako: "Kas ka čuminav – ov tano. Astaren le hem legaren le pohari pazlivo."

45 Samo so alo uza ko Isus, vakergja: "Učitele!" hem čumingja le ki čham.

46 I o manuša čhige pe vasta upro leste hem astarge le. 47 Togaš jekh taro učenikija so sine adathe ikalgja čhurik hem khugja e bare sveštenikoskere sluga hem čhingja o kan leskoro.

48 A o Isus vakergja lenge: "Sar buntovnikoske ko than alen čhurikencar hem kaštencar te astaren man? 49 Sekova dive sijum sine tumencar ko Hrami hem sikavava sine e manušen, a tumen na astargjen man. Ama neka ovel agjar sar soj pišimo ko Sveta Lila."

50 Togaš sa o učenikija mukhle le hem našle.

51 A pala leste džala sine jekh terno manuš so sine učhardo upro nango telo laneno čaršafi. Le da astarge, 52 ama ov togaš mukhla o čaršafi hem nango našla lendar.

53 I ange e Isuse ko baro svešteniko, hem khedinge pe sa o prvosveštenikija, o starešine hem o učitejla e Zakoneskere. 54 A o Petar duraldan džala sine palo Isus, sa dži ko dvoro e bare sveštenikoskoro, hem adathe bešla e čuvarencar hem takjola sine uzi jag.

55 A o prvosveštenikija hem o Evrejsko Sovet rodena sine nesavo dokaz te arakhen te šaj te mudaren e Isuse, ama našti sine te arakhen. 56 Adaleske so but džene vakerena sine hovajbe protiv leste, ama lengoro svedoštvo na sine isto.

57 Togaš nesave svedokija uštinge hem hovajbe svedočinge protiv leste vakerindor: 58 "Šungjem le sar vakerela: ‘Ka peravav akava Hrami, soj kerdo manušikane vastencar, hem trine divenge ka vazdav javer, so nane te ovel kerdo manušikane vastencar.’ "

59 Ama ni lengoro svedoštvo na sine isto.

60 Togaš uštilo o baro svešteniko, terdilo maškar lende hem pučlja e Isuse: "Nane li tut so te phene ko akava, so vakerena protiv tute?"

61 Ama o Isus kjutingja hem ništo na vakergja.

Togaš o baro svešteniko pučlja le: "Tu li sijan o Hristos, o Čhavo e Blagoslovimeskoro?"

62 O Isus vakergja: "Me sijum, hem ka dikhen o Čhavo Manušeskoro sar bešela tari desno strana e Najsilnoskiri hem sar avela upro oblakija e neboskere."

63 Togaš o baro svešteniko tari holi pharagja pe šeja hem vakergja: "Na trebela amen više svedokija! 64 Šungjen sar hulingja upro Devel! So mislinena?"

Hem sarinen osudinge le deka zaslužinela te merel.

65 Togaš nesave manuša počminge te čhungaren le, te phanden leskere jakha hem te khuven le boksencar, i vakerge: "Prorokujn! [Koj khugja tut?]"

A o čuvajra počminge te maren e Isuse.

66 Dži kote sine o Petar tele ko dvoro, ali jekh taro sluginke e bare sveštenikoskiri. 67 Koga dikhla e Petare sar takjola ki jag, dikhla le šukar hem phengja: "Tu da sijan sine e Isuseja taro Nazaret!"

68 O Petar otkažisalilo vakerindor: "Na džanava ni na svatinava so pheneja!" Hem iklilo avrijal taro dvoro, a o bašno gilagja.

69 I slugjinka koga dikhla le palem, počmingja te vakerel e manušenge so sine adathe: "Akava da tano lendar." 70 A o Petar palem vakergja deka nane lendar.

Na nakhla but palo adava, okola so sine adathe phenge e Petareske: "Tu čače sijan jekh lendar, soske tu da kereja lafi sar Galilejco."

71 A ov počmingja te del pe armanja hem te hal sovli: "Na pendžarava akale manuše, kastar so tumen vakerena!"

72 I odma o dujto puti gilagja o bašno. Togaš o Petar setingja pe ko lafija e Isuseskere so phengja leske: "Angleder o bašno te gilavel duj puti, tu trin puti ka phene deka na pendžareja man." I ov počmingja silno te rovel.