1 Palo nekozom dive, o Isus palem alo ko Kapernaum hem šundilo deka tano ko jekh kher. 2 I adathe khedisalili bari gužva, agjar so na sine više than, ni andre ni taro udara te nakhel pe. A ov propovedinela sine o lafi e Devleskoro.

3 Togaš sine štar džene so mangle te anen anglo Isus jekhe sakate manuše. 4 Pa koga dikhle deka našti avena anglo Isus taro narodo, phrage o krovi e khereskoro hem mukhle e sakate pe postelaja anglo Isus.

5 Koga o Isus dikhla lengiri vera, vakergja e sakateske: "Mo čhavo, oprostime tane te grevija!"

6 A adathe sine nesave učitejla e Zakoneskere so korkori pes pučle: 7 "Sar šaj akava te vakerel agjar? Koj šaj te oprostinel o grevija, osven o Devel? Ov hulinela!"

8 O Isus odma pe duhoja svatingja so ola mislinena, hem pučlja len: "Soske agjar mislinena ko tumare srcija? 9 Soj polokhe te vakerel pe akale sakateske: ‘Oprostime tane te grevija’ ili te vakerav leske: ‘Ušti, le ti postela hem dža tuke?’ 10 Ama ka dokažinav tumenge deka o Čhavo Manušeskoro isi le vlast ki phuv te oprostinel grevija" – i vakergja e sakateske: 11 "Tuke vakerava: Ušti! Le ti postela hem dža khere!"

12 I ov uštilo odma, lela pi postela hem iklilo avrik anglo sarinen.

I agjar sarine čudisalile hem počminge te slavinen e Devle vakerindor: "Asavko nešto nikat na dikhlem!"

13 O Isus palem gelo uza ko ezero, i sa o manuša avena sine ki leste hem ov sikavela len sine. 14 Dži kote phirela sine o Isus dikhla e Levija o čhavo e Alfejeskoro, sar bešela sine ko than kote so khedela pe danok. I odma vakergja leske: "Ava pala mande!"

Ov uštilo hem gelo pala leste.

15 A koga bešla o Isus pe učenikoncar te hal ko kher e Levijaskoro, lencar bešle but danočnikija hem grešnikija, asavke sine but džene so džana sine palo Isus.

16 Koga o fariseja hem o učitejla e Zakoneskere dikhle e Isuse sar hala e grešnikoncar hem e danočnikoncar, pučle leskere učenikon: "Soske tumaro učiteli hala hem pijela e grešnikoncar hem e danočnikoncar?"

17 Koga šungja o Isus adava, odgovoringja lenge: "E sastenge na trebela doktori, nego e nasvalenge. Me na alum e pravednikon te vikinav, nego e grešnikon."

18 E Jovane Krstiteleskere učenikija hem o fariseja postinena sine. Nesave manuša ale ko Isus hem pučle le: "Soske e Jovaneskere hem e farisejengere učenikija postinena, a te učenikija na postinena?"

19 O Isus odgovoringja lenge: "Sar šaj te postinen o henamika koga o džamutro tano lencar? Sa dži kote o džamutro tano lencar, ola našti te postinen. 20 Ama ka avel dive, koga ka ovel lelo o džamutro lendar, i togaš ko adava dive ola da ka postinen.

21 Nikoj na sivela nevi krpa ko purano gad, soske ko thojbe ka otkačingjovel o nevo taro purano, hem o otvor ka ovel pobaro. 22 Nikoj na čhorela nevi mol ko purane mevija;* soske o nevo mol ka phajlakerel o mevija hem i mol ka čhorgol. Nego o nevo mol čhivela pe ko neve mevija."

23 Ko jekh sabotno dive o Isus pe učenikoncar nakhle maškar o nive, i počminge leskere učenikija te phagen klasija giv.

24 A o fariseja pučle le: "Soske te učenikija kerena akava ko sabotno dive, koga nane dozvolimo taro Zakoni?"

25 O Isus odgovoringja lenge: "Nikat li na čitingjen so o David kergja, koga sine bokhale ov hem o manuša so sine leja? 26 Khugja ko kher e Devleskoro, ko vreme koga sine o baro svešteniko o Avijatar, hala o maro so sine posvetimo, so nasminela sine nikoj te hal le osven o sveštenikija. I o David dengja okolenge da so sine leja."

27 I togaš odgovoringja lenge: "I sabota tani kerdi e manušeske, a na o manuš e sabotake. 28 Agjar o Čhavo Manušeskoro tano Gospodari e sabotakoro."