1 Koga o Isus iklola sine taro Hrami, jekh taro leskere učenikija vakergja leske: "Učitele, dikh save bara! Kozom i šuže o gradbe!"

2 O Isus odgovoringja leske: "Dikheja li sa akala bare gradbe? Nijekh bar upro bar nane te ačhol akate. Sa ka oven rušime."

3 Dži kote bešela sine o Isus ki Maslinovo Gora pe učenikoncar, karši o Hrami, o Petar, o Jakov, o Jovan hem o Andrej, ale korkori ki leste, hem pučle le: 4 "Vaker amenge, koga ka ovel sa akava? Hem savo ka ovel o znako bašo sa akava te phergjol?"

5 O Isus odgovoringja: "Pazinen, ma te hovavel tumen nekoj. 6 Soske but džene ka aven ko mo anav, hem ka vakeren: ‘Me sijum o Hristos,’ hem ka hovaven buten. 7 Koga ka šunen deka isi vojne hem glasija taro maribe, ma daran. Soske sa adava mora te ovel, ama panda nane o krajo. 8 Ka ušten nacija protiv nacija, hem carstvo protiv carstvo. Ka oven zemijotresija ko but thana, hem bokhalipe. Akavaj samo o početok taro bijanibaskere dukha.

9 Arakhen tumen! Soske ka predajnen tumen ko sudo hem ka kamšikujnen tumen ko sinagoge. Ka tergjoven anglo vlastija hem cajra baši mange, sar svedokija lenge. 10 A ko sa o nacije najanglal mora te propovedinel pe o evangelije. 11 Koga ka astaren te legaren tumen ko sudije, ma sekirinen tumen angleder so ka vakeren. Samo vakeren so ka del pe tumenge ko adava sati, soske nane tumen te vakeren, nego o Sveti Duh.

12 O phral pe phrale ka predajnel ko meriba, a o dad pe čhave. O čhave ka oven protiv pumare roditejla, hem ka predajnen len ko meriba. 13 Sarine ka mrzinen tumen baši mange, ama adava so ka ačhol dži ko krajo ka ovel spasimo."

14 "Koga ka dikhen ‘o gadno so uništinela sa’ sar tergjola kote so nane leskoro than – koj čitinela neka svatinel – togaš okola, soj tane ki Judeja, neka našen ko planine. 15 Koj tano ko krovi, te na hulel tele hem te khuvel ko kher te lel nešto andral! 16 A koj tano ki niva te na iranel pe khere te le pe šeja! 17 Ama pharo ka ovel ko adala dive e khamne romnenge hem adalenge so dena thud! 18 Molinen tumaro našiba te na ovel ko jeven, 19 soske ko adala dive ka ovel but pharipe, sar dži akana so na sine taro početok, koga o Devel kergja o sveto, hem nikat poviše nane te ovel isto.

20 Ako o Gospodari na čhinagja adala dive, nikoj našti sine te ovel spasimo. Ama, bašo o birime, so biringja len, čhinagja adala dive. 21 Togaš ako nekoj vakergja tumenge: ‘Akje, o Hristos akate tano!’ ili: ‘Akje, okote tano!’ ma verujnen len. 22 Soske ka pojavinen pe hovavne hristosija hem hovavne prorokija, so ka keren znakija hem čudija te hovaven, ako šaj, adalen da soj birime taro Devel. 23 Adaleske pazinen tumen. Akje, vakergjum tumenge sa angleder."

24 "Ama ko adala dive, palo adala muke:

‘O kham ka temningjovel

hem i mesečina nane te del pi svetlina;

25 o čerenja ka peren taro nebo

hem o nebesna sile ka oven potresime.’✝

26 Hem togaš o manuša ka dikhen o Čhavo Manušeskoro, sar avela upro oblakija bare silaja hem slavaja. 27 Togaš ka bičhavel pe angelen hem ka khedel pe birime taro štar strane e svetoskere, taro krajo e phuvijakoro dži ko krajo e neboskoro."

28 "A tari smokva sikloven sar te sporedinen: Koga lakere granke ka oven kovle hem ka iklon listija, džanen o nilaj tano paše. 29 Hem agjar tumen, koga ka dikhen deka sa adava ovela, džanen deka o vreme tano paše, anglo udar! 30 Čače vakerava tumenge: Akaja generacija nane te nakhel dži kote sa akava na ovela. 31 O nebo hem i phuv ka nakhen, ama me lafija nikat nane te nakhen."

32 "Ama bašo adava dive hem sati nikoj na džanela, ni o angejla soj ko nebo, ni o Čhavo – samo o Dad. 33 Oven džangavde hem arakhen tumen! Soske na džanena koga ka avel adava sati. 34 Adavaj sar jekh manuš, koga džala ko drumo, hem mukhela po kher: dela vlast pe slugjenge, hem dela sekaske buti, hem naredinela okoleske soj ko udar te ovel džangavdo hem te pazinel. 35 Adaleske oven džangavde, soske na džanena koga ka iranel pe o gospodari e khereskoro, dali rakjate, ili ki ekvaš rat, ili koga o bašne ka gilaven, ili sabajleja. 36 Te na avel ov taro jekh puti, hem te arakhel tumen sar sovena.

37 Akava so vakerava tumenge, vakerava sarinenge: Oven džangavde!"