Reino dos céus

Pemikehungbe samgwa

44 Tinggim hegwangram au luh gage mahei kebai kenzeu nzwa delie, mige cide ngaulu eh kebaidi. Cipaude pe suiyi kedine, pa gwang delwe pegu kebam leune zwa ciaudi, delwe cipau luh de luilu. 45 Aipaucai de, tinggim hegwangram au mige heli keteime ge tsuga pemi kewhungdung peei kela nzwa da. 46 Pa tsuga ket pemi whungsüt kecu ge ngau keludau, pa pegu kebam leune zwalu eh mie cide luilu.

Ziegitsi nah tsehi samgwa

31 Jisu penui dage samgwa kedage ranglia dai. Pa rangdi, "Tinggim hegwangram au mige ziegitsi leuh teumie pe luh gage nrok kegai nzwa delie. 32 Kesang cide au heleuh pelane kakgade ceutuna ge. Dede cide lungcuh keludau, cide hegurie ga mabangdung swade di. Cide tsingbang tei lula, iciu eh ting ruinedung gwang pe kiakdung gage pe ciep teu lula."*

33 Pecai Jisu penui dage samgwa kedage ranglia dai. "Tinggim hegwangram au mipui ge tsehi keulwe tokkui mdet kecum* gage ruiza lu eh nggau cu kemaktane kaizeu kela nzwa delie."

Tseheidung samgwa

24 Jisu penui dage samgwa kedage ranglia dai. Pa rangdi, "Tinggim hegwangram au mige heleuh keyibe pe luh gage nrok kegai nzwa delie. 25 Dede mina ziep kezeu dau, pe ngauraume gwang eh reima leuh herei kakgage nrokgai di eh tetdi. 26 Cidungde pwaklu cuh eh pe tsi bui keludau, reimadungde lungh cuhlu. 27 Hangdeu mpaube kilame peda gwang eh rangdi, ‘Kedibo, nang heleuh keyibe n luh gage nrok gai meni? Dainzwa eh reima lungh dino?’ 28 Pa penui dage rangdi, ‘A ngauraume ne aide tei gaida.’ Kilame pe dade rangdi, ‘Iciucai nang peu anuide mie cidungde pai mpetdi neuni?’ 29 Dede mpaube rangdi, ‘Lak. Kedanemene nnui reimadung pai mpet keladau, nnui cidungde si eh wheat de pai dilu builu. 30 Peu penaide luhlüt kemaktane ngngwalung ncüt bamlu. Luhlüt ting daune Ih luh rumkelame dage rangzie, "Keraibe reimadung pai mpetlu eh cidungde kanglwe rudi, dede wheat de a bau gage hekwalu."’"

Cehidung samgwa rangmci kegai

36 Cidau pa maadidung de gidi eh kilung ga nlütdi. Pa ledeukelumedung peda gwang eh, ranggai, "Luh ga reimadung samgwade anui dage rangmci lialo." 37 Pa keligai eh rangdi, "Mige heleuh keyibe nrok kegaibe de au Mina Nabe delie." 38 Heluh au kideube delie; nah heleuh keyibe cai, hegwangram namedung da. Reimabedung cai kesiabe namedung delie, 39 Nah ngauraube reima nrok kegaibe de au herakesiabe delie. Luhlüt ting au peting penli deda, nah luh rumkelame au tinggimgwame delie. 40 Ciziemne, reima hekwapwa mi gage ru kedi nzwa, peting penli dau de cinzwa zie. 41 Mina Nabe pe gwamedung de langmpet gai zie, nah pe hegwangram gade penui kemau ketei pelane nah mina kesiata tei kelamedung de penui hekwa luzie. 42 Penuide kelien pwa mi heu kebam gage kai dizie, kehap nah geigim pung kebam ga. 43 Iciu de mina makesangme penui Pei hegwangram gade tingnaimiak nzwa baa dizie. Keheibe de pe kwen kebambe de peu kingnei lulo.

Helang samgwa

47 Aipaucai de, tinggim hegwangram au mige helang ge kelien pwa jaaidi gage kai eh heka ketsamtsam hekwa kelu nzwa delie. 48 Cide pui luge, heka ketuimedung cide teumpet duikung gage kailu. Cidau penui bamlwe heka keyibe hekwa pwa mabungdung gage hekwalu, dede kesiabedung penui kelien gidi. 49 Kideu cangkedi benai aiciu dizie. Tinggimgwame gwang eh mina kesiame de makesangme kakgade keu ntsam dizie. 50 Penuide kelien pwa miheu kebam gage kai dizie, kehap nah geigim pung kebam ga.

3 "Rabe kilam nneila reulie ci kelame samlam pungtu,

kedanemene tinggim hegwangram penui gu zielu.

4 Hei eh hap kelame samlam pungtu,

kedanemene penui kerelui ngaulu zielu.

5 Nciep kebamme samlam pungtu,

kedanemene penui kideube gumlu zielu.✝

6 Makesangbe ziemne nzeu nah hereu kelame samlam pungtu,

kedanemene penui nggeilu zielu.

7 Mide ngaunggia kelame samlam pungtu,

kedanemene penui ngaugia ngaulu zielu.

8 Pelung kemcime samlam pungtu,

kedanemene penui Tinggwang de ngau zielu.

9 Kezuyi ta tei kelame samlam pungtu,

kedanemene penuide Tinggwang namedung lie qu zielu.

10 Makesangbe ziemne keherei kelame samlam pungtu,

kedanemene tinggim hegwangram penui gu zielu.

11 Minadung nnuide kii nah teikeherei, nah kenret eh ma kesia leune rang eh aziemne nnuide mmaucai nnui samlam pungtu. 12 Nnui suiyilu nah suiyi süt lulo, kedanemene nnui tinggim gade ziehi kedi ngau zielu. Kedanemene ainzwa eh minadung caihakecime nnui dwa kelungme dede teikeherei delu.

Tinggim hegwangram ga ditube

1 Cipau tingdau ledeukelume Jisu da gwang eh ranggai "Caune tinggim hegwangram gade ditu zieno?" 2 Ge Jisu hename gede pe da quteu gwanglwe penui kakga ge pecu kailu, 3 nah rangdi, "Ih nnui dage rangsiakte gaila, nnui lung nreulwe hename nzwalu kemaktane, nnui madaude tinggim hegwangram ga nlüt gailak. 4 Ciziemne, keheibe de pekatei pecu tei henahpwa hena aipau nade nzwa kelube ne tinggim hegwangram gade ditu zie.

14 Dede Jisu rangdi, "Henamedung de peu ada gwanglo, penuide kaam helo, kedanemene tinggim hegwangram au cipaume gulu."

23 Jisu pa ledeukelume dage ranggai, "Ih nnui dage rangsiakte gaila, kehei mege ziemne tinggim hegwangram ga nlüt pa zie. 24 Ih nnui dage ranggai daila, keheime ge Tinggwang hegwangram ga nlüt kera swade ut ge de peu langhim miki gade liampet kecube laki lie." 25 Ledeukelume cide siu luge, penui macang süt eh keteugai, "Iciu cai caube de kelilu zieno?" 26 Dede Jisu penui de piegai eh penui dage rangdi, "Mina ne aide tei gailak, dede Tinggwang au maleune teilu bui."

5 Kiengnei lu, kehung sinamedung, Tinggwang kideu ga kegahme de peu kenlum ga heilu kerane nah pecu hung kelame de pa sampet kebeu hegwangram de gumlu kerane kedetlu meni?

18 Dede Hutube gu minadung ne hegwangram de luulu zie, nah penui ne kelungta nah kelungta penui gu tei dizie.’✝

21 A cule, ‘Rampaubo, Rampaubo,’ de rang kelame leune tinggim hegwangram ga nlüt gailak, dede tinggim ga kebam a Pei lungning teilu kelame rünne zie.

19 Cine keheibede ajadung gade ceutunabe de gikah delwe mi kedamedung de cinzwa teilo ledeu kelabe de tinggim hegwangram gade ceutube lie quzie. Dede keheibede cidungde mzai nah cidungde ledeu kelabe, tinggim hegwangram ga kedi lie quzie. 20 Ih nnui dage rang gaila, laisiukecime nah Phariseemedung masangdung swade, n masangdung yikilu mecai, nang tinggim hegwangram ga nlüt gailak.

9 Ciziemne ainzwa eh kielu:

‘Tinggim kebam anui Pei,

peu n zi de hetwa kepung kemcibe tei lulo.✝

10 N hegwangram teigwang kelube tei lulo.

Tinggim ga nzwa eh kideu gade

nsui nrang tei kelube tei lulo.

Duipumketeibe John lampui kelamlui

1 Cidau tingdau duipumketeibe John Judea hetaideu gade mide ledeu gwang eh ranggai, 2 "Helungnreu lulo, kedanemene tinggim hegwangram nnadi delu."

17 Cipau ting gade Jisu sam ledeu eh, "Nnui lung nreulu, kedanemene Tinggim hegwangram nna bam dida," de eh rang gwang.

7 Nah nnui kemie dau, ‘Tinggim hegwangram gwang nna ladi delie,’ de ledeu eh ranglo.

11 Dede Ih nnui dage ranggai la, mina kekiee naimiak kepetle nah naimiak kenlütle de gwangzie, nah penui tinggim hegwangram ga Abraham, Isaac, nah Jacob de ngngwa bamzie.

11 Ih nnui dage rangsiakte gaila, mipui dade lungh kegwang kakgade duipumketeibe John swa migede kedi ge de lungh cuh mereu. Dede tinggim hegwangram ga au ceutube de peswa diki.* 12 Duipumketeibe John ting gade cu kecang tinggim hegwangram kehereisüt la dida, mina pezai kesiame cide süt teudi kera tei.

28 Ciziemne, anui teu kelaigai kelak hegwangram *ngaulu zeu delu, anui twa lugo, nah Tinggwang luulu kebui zai teu anui recalu kera gade, herüt nah kengngi teu eh. 29 Kedanemene anui Tinggwang au teingkapdi kela mi ge lu.✝

11 Penui n hegwangram kemdu de rangzie,

nah penui n kengkieng de rangzie.

12 Penui mina dage Tinggwang bata kedi

nah pe hegwang kedi kendu liazie.

13 N hegwang au kelungta hegwang,

nah n kengkieng au ceheudung pelane da lazie.

10 Cine, sinamedung, nnuide qukelu nah kedet kelude ga ntip eh nnui laikai teibam lulo, cinzwa eh nnui aidungde tei lucai nnui madaude kau dilak. 11 Kedanemene ainzwa eh nnui ziemne kelikelube Rampaube Jisu Khrista gade kelungta hegwangram cika nlütlu kebuime tei beuzie.

18 Rampaube kesia ta pelane gade acu kelibeu zie nah acu pe tinggim hegwangram ziemne kelibeu zie. Pecu peu kelungta ndu kelube tei lulo. Amen.

32 Ngngi so, hemaa kecam nabo, kedanemene nnuide hegwangram peu kera nnui Pei suidi delu.

5 Aide ci mcilu, kemmhame pelane mede mci kemakbe mede ma keheginbe, (cide mamie kerecame), Khrista nah Tinggwang hegwangram ga pe ma gah.