1 Heriakting gwang kezeudau, cipau tingdau hegwangmedung hereu ga miela, ciu eh David Joab, pe kilamedung nah Israel reugwame peciakne de langmpet gai. Penui Ammon reugwame de ngamlu delwe Rabbah de twagwalu. Dede David Jerusalem ga bamdi.

2 Cinzwa eh langnaige tinghegi David pe zeu gade cuhlu delwe pe hegwangki kinim ga tetpet. Cika de mipui ge duipia bam eh pa ngaulu, nah mipuibe de pie kegaidau hezu yisüt. 3 Cine David minadung de langgai eh cau cipau pui dede ci ziebi keteugai. Mige rang eh, "Bathsheba, Eliam napui meni aide, nah cipau pui de Hittitme Uriah nau meni?" 4 David samgwame de langgai eh pecu ngngwalu; pa pe taiga gwang, nah pa pecu ngngwa zeudi (kedanemene pekatei pa mipui zai gade teimci lwe bam kecudau ge). Ciu eh pa pe ki cailigwang di. 5 Mipui be tetlak lu, nah pa mina langgai eh David dage ranggai; pa rangdi, "Ih au tetlak dida."

6 Ciu eh David Joab de langgai eh ranggai, "Hittitme pei Uriah de a dage langgai lo." Cine Joab Uriah de David dage langgai. 7 Uriah gwanglu ge, David pe dade Joab dainzwa no keteu, reugwame dainzwa bam bi, nah hereu be dainzwa pak bam bi kecu keteu. 8 David Uriah dage rangdi, "N kiga nghung delwe n pi hui di." Cine Uriah hegwang bam gade tetdi, nah Uriah tet kedi cai hegwangpei mapeu pe ziemne langgai. 9 Dede Uriah au hegwangpei ki kikam ga pe mpaube kilame pelane de ngngwa lwe zip bam, nah pa peki ga nghung mene bam. 10 Cidau penui David dage rangbeu, "Uriah peki ga nghung melie," David Uriah dage rangdi, "Nang hebeuh tei eh gwang meni? Daitei nang n ki ga nghung me no?" 11 Uriah David dage keligai, "Samkakbung, Israel nah Judah paikidung ga bam, nah a mpaube Joab nah a mpaube kilamedung hegwale heram zeula. Ciciucai Ih dainzwa a ki ga gwang tyeisak nah a nau de ngngwa zeu bam lulai? Nang ring kebamtane, Ih cide teilak." 12 Cine David Uriah dage rangdi, "Henai de aika bamlu reilo, nah ncünne ncu peu tet zie." Cine Uriah cipaunai nah pecai benai de Jerusalem ga bamdi. 13 David pecu qu kegai dau, pa pedwa gade tyei nah saklu, nah David peu pecu sakmie lu. Tinghegi dige Uriah pe ki ga nghung mene, pe mpaube kilamedung de ngngwa pe zeu ga pet zipdi.

14 Cine tingcang David laisiu raupwa Joab de peu, delwe Uriah ba gage langgai beu. 15 David laisiu raulu eh ainzwa ranggai, "Uriah de hereu hungtube dwa ge kailu, nah pe dade mdei dilu, ciu eh pecu teidi eh tsaidi lu kerane." 16 Cine Joab namdi tui pwa kebam de piegai delwe ngauraume ngkiengtu reugwame regi bam kera heni pa ci kebam gage Uriah de langgai. 17 Namdi ga minadung tetpet Joab reugwame de ngngwa keregi kecudau, David reugwamedung kangge kaudi, nah Hittitme pei Uriah dede cikade teitset di. 18 Joab hereu ga tei kedidung leune David dage sam lang kegaidau, 19 pa sam teu kegwangme dage aja kai eh ranggai, "Nang hegwangpei dage hereu ga matei kedidung pelane rang ciak kelu cai, 20 cinzwa hegwangpei pe rata di eh n dage rang di lubui, ‘Daitei nang nggi kerane namdi taiga gwang nna no? Penui kirie gade kap kera nang ci meni? 21 Caune Abimelech napei Jerub-Besheth de teitset di no? Kirie nreule de mipuige ne keniak tangtsu pe reuga kelui mie meni, ciu eh pa Thebez gade tsaidi meni? Nnui daitei kirie be ga gwang nna no?’ Ciu eh n sam keli maisia, ‘N kilabe Hittitme pei Uriah de tsai dida.’"

22 Cine ma pelane tei kedidung de David de mie pau beu lo Joab pecu rang kebeu nzwa samgwabe langgai eh tetdi. 23 Pecai samgwabe David dage rangdi, "Kerai dau anui ngauraume be ngkieng ki lie, luh gade penui anui taiga gwang, dede anui penuide gwa caili pwa kirie ki kenlüt gage kai di. 24 Ge lakpi kekapme bau kirie gade n reugwamedung de kap, nah hegwangpei kilamedung kangge de teitsetdi, nah n kilabe Hittitme pei Uriah dede teitset dida." 25 Pecai David samgwame dage rangdi, "Joab dage aide rangbeu lo, ‘Aide ne nsui teimsia so, kedanemene kingtie be hang gege de ngkap zie lu. Namdibe de nnui gwaketang reureulu, delwe cide tui lulo,’ nah pecu tei ngkuu gai."

26 Cine Uriah nau pe nahpei Uriah tsai kedi siu luge, pa pe nahpei ziemne pesui siasüt di. 27 Pe suisiet de cang dige, David pecu ngngwa lwe pe hegwangki ga gwanglu, nah pa pe naudi delwe pecu mipeina ge mna beu. Dede David tei kegai de RAMPAUBE pesui lu ma.