1 Cu David Israelme kedet kelumedung pelane de hekwa dailu, cang camrei gede. 2 David cuhlu delwe pe mina pelane pecu ngngwa kelame de ngngwa miedi, Judah deu ga Baalah gade, Tinggwang samkakbung, Reugwame reu RAMPAUBE zi gade qu kelade, cherubim* reu hegwang tei kebambe, cikade pung nghanglu kerane. 3 Penui Tinggwang samkakbung gari keheci gage kailu. Penui Abinadab ki, hangdeutu ga kebam de gade pwa mpet lu. Pe napei kena, Uzzah nah Ahio, hekwengari keheci lampui saulia la. 4 Abinadab ki hangdeutu ga kebam de gade gari ga Tinggwang samkakbung kai pwa kebam de teu mpet lu. Ahio ne samkakbung dwaga tet la. 5 Cidau David nah Israel kilungme pelane RAMPAUBE dwa gade lei tei nah lim cuhdi, tsing leibung, leibungdung, lyredung, tambourinedung, kehediang, nah ntwaidung kwa renga eh. 6 Penui Nakon gu hecaipung ga gwang keludau, hetumseu kaumie di, nah Uzzah peba nzangpet lwe Tinggwang samkakbung de herak kera tei, nah pa cide herak ludi. 7 Pecai RAMPAUBE Uzzah de pe rata sütdi. Tinggwang pemau ziemne pecu cikade ketang. Uzzah cika Tinggwang samkakbung taiga de tsaidi. 8 David perata di kedanemene RAMPAUBE Uzzah de ketang kecune, nah pa cipau bamde zi Perez Uzzah qulu. Cipau bam de henai kecang de Perez Uzzah lie qula. 9 Cipaunai David RAMPAUBE de hingdi. Pa rangdi, "Dainzwa Tinggwang samkakbung de ada gwanglu lai?" 10 Cine David RAMPAUBE samkakbung de pe taiga teugwang neu ma David namdi lung ga. Meliene, pa cide Gittitme pei Obed Edom ki gage pwa mpet kaidi. 11 RAMPAUBE samkakbung Gittitme pei Obed Edom ki ga kei cum ge ziemne bamdi. Cine RAMPAUBE pecu nah pe kelak pelane de samlam beu. 12 Cu hegwangpei David da sam gwangdi, "RAMPAUBE ne Obed Edom ki nah peda kebam mapelane samlam beu Tinggwang samkakbung de ziemne." Cine David mielu nah Obed Edom ki gade Tinggwang samkakbung de David namdi ga pung gwanglu pe suiyi eh. 13 RAMPAUBE samkakbung pung kelame pikiet herok tetpet kedi cai, pa hetumseu nah hetumna pelui keyi ge ratak teigai. 14 David pe kengking pelane teu RAMPAUBE dwa gade helim lim; pa linen hekeutupai nage rünne bahla. 15 Iciu eh David nah Israel leuhme pelane sah eh telui kwa eh RAMPAUBE samkakbung de pung gwanglu. 16 RAMPAUBE samkakbung de David namdi ga pung gwang kela dau, Michal, Saul napui, hebaki gade pie mpet. Pa hegwangpei David RAMPAUBE dwaga nsau eh helim lim kebam ngaulu. Ge pa pecu pesuilu ma pe mlung gade. 17 Penui RAMPAUBE samkakbung de pung gwanglu eh pebam gage kaidi, paiki sum ga David cide ziemne mteipwa kebam ga. Pecai David keru reca nah kekangbau recadung RAMPAUBE dwa ga pwapeu. 18 Cidau David keru recadung nah kekangbau recadung ratakdung teicangdi ge, pa kengkieng RAMPAUBE zi gade minadung de samlam beu. 19 Pecai pa mina pelane de mzi beu, Israelme kekiee ge kebam leune de, mipei nah mipui dede, tangkukwak ge, heteih kang ge, nah kubetsi kekibe tangku. Ge mina pelane tetdi; migege kecu penui kiga cailigwang di. 20 Pecai David pe kilungme de samlam beu kera cailigwanglu. Saul napui, Michal David de redau kera tet petlu delwe rangdi, "Israel gwangpei henai pezi kedige teilu da, pe kilamedung hebaang releimedung miakngau gade henai pekatei pecu tei paula gaida, mige pezai kemlame ge ngngam mezing eh pekatei pecu tei paula kegai nzwa!" 21 David Michal dage rangdi, "Ih cide RAMPAUBE dwa gage teigai, n pei nah pe kilungme pelane reu acu kedet kelube, RAMPAUBE minadung reu, Israelme reu acu muiteu kedet kelube. RAMPAUBE dwa ga Ih a suiyi la zie! 22 Ih aide swa hengam teisi lubui reu, nah Ih akatei a miak gade henah zie. Dede nang hebaang releimedung ha rang kebamme dade, Ih au hetwa pungzie." 23 Cine Michal, Saul napui, pa ketsai benai kecang hena lungh luma.