1 Cidau Saul napei Ishbosheth, Abner Hebron gade tsaikedi siu luge, pe ba mneidi, nah Israelme pelane hing bamdi. 2 Saul napei mipei hangna bam nah penai reugwame maadung reu muiteume ge. Hangge zi cai Baanah nah kedabe zi cai Recab, Benjamin ramme Beerothme pei Rimmon napei kena (kedanemene Beeroth de de Benjamin gu lie bamla, 3 nah Beerothme Gittaim gage pak gaidi nah cika lungh jüja bamdi cu kecang de).

4 Cu Jonathan, Saul napei, pe na mipei nage pe pi sia eh bam. Pa mmi mengei dau Saul nah Jonathan tsit ha Jezreel gade ci gwanglu. Pe ngkwetpui pecu pwa cuhlu pak kerane. Dede pa pakla kecudau, Jonathan napei kau miedi delwe pepi siadi. Pe zi cai Mephibosheth.

5 Cine Beerothme pei Rimmon napei kena, Recab nah Baanah, Ishbosheth kiga tingna tinglum peri tetmie, pa tingna tingding mtak kebam dau. 6 Kikam ga kwa kebam pui de ziangmui miedi wheat tei mci kebam dau, nah Recab nah Baanah sünne eh tet nlüt lu nah pecu kahpet. 7 Iciu eh penai kilung ga nlüt luge, penai pecu ketang nah pecu teitset di pa pe zeubung ga pe zeulie ga zeu bam ge. Pecai penai pe peu danglu nah cide pung tetti, tingmui lampuiki ga tetcang Arabah ga gwang kerane. 8 Penai Ishbosheth peu pwa Hebron ga David da gwang, nah penai hegwangpei dage rangdi, "Ainie, aide Ishbosheth Saul napei peuda, n ngauraube, n teilung keu kera peei kelabe. Henai RAMPAUBE anui mpaube hegwangpei kum teibeu da Saul nah pe leuhme dade." 9 Recab nah pe sinabe Baanah dage David sam keligai, Rimmon Beerothme pei napei kena; pa penai dage rangdi, "RAMPAUBE ringkela nzwa, makehung leune gade a mapie beu kelabe, 10 mige a dage rang kecudau, ‘Pielo, Saul au tsai dida,’ pa samkeyi punggwang beula lie mning eh, Ih pecu nimlu nah Ziklag gade pecu teitset di. Pe samlia de ziemne Ih cipau ziehi de pecu peu. 11 Dai kieege si lai, mina kesiame ne pemau kegahme de pe kilung ga pe zeu gade teitset di kecudau, Ih cu pejai de nnai ba gade keu kerabe meni, nah nnaide kideu gade keu mzia kera?" 12 Pecai David rehangmedung dage aja kaigai, nah penui penaide teitset di eh penai badung nah penai pi danglu eh Hebron ga tekwaki ge taiga keukezu gaidi. Dede penui Ishbosheth peu pwalu nah cide Hebron ga Abner rau gage kungdi.