1 Cidau Ahithophel Absalom dage rangdi, "Cu acu peu mipei cang kereiehkena gede kedetlo, nah Ih heziu cuhlu delwe David de zuimie zie. 2 Pa leu nah mnei kebam dau Ih pecu gwaketang zie delwe pecu kehing le keheu zie. Mina pecu ngngwa kelame pak dizie nah Ih hegwangpei de rünne gwaketang dizie. 3 Ih mina peciakne de n dage ngngwa cailigwang beuzie, lakciubepui pe nahpei da kegwang nzwa, nah n kangga mina peciakne da lungciep bamzie." 4 Ahithophel rang kegai Absalom nah Israel muiteume peciakne penui suilu.

5 Ge Absalom rangdi, "Cu Arkitme Hushai de qu gai nah pa dai rang zie bi anui kingnei gai go." 6 Hushai Absalom da gwanglu ge, Absalom pe dage ranglia Ahithophel rang kebeu sam de nah Hushai de keteu, "Anui Ahithophel rang kebeude tei zie ni? Mecaige, daitei zie bi nang anui dage ranggai lo." 7 Cine Hushai Absalom dage rangdi, "Henaipia Ahithophel nnui de rang kebeu sam de yi ma." 8 Hushai rangsi gai, "Nang n pei nah pe minadung au hereu kengkiengme, nah penui au kuusüt bam, nah penui au hegum pui pe name de luh gade sütteu kedibe nzwa kecu cibam. N pei au reugwa tei kemnimme ge, pa heziu pe reugwame de ngngwa zip lak. 9 Pielo, Cu au pa tsupop kesa ge ga mede heni keda ge ga mbai bam lubui. Cidau n minadung kesa raitu gade gwaketang lüt eh penuide teitset kedi ainzwa gwang zie, cide keheibe de siu kela rang zie, ‘Absalom caisui kelame reugwamedung kakga daptset kedi teidi.’ 10 Pecai kuutu reugwamedung liede, penui mlung hingho mlung kenzwamedung de, ngngi dizie kedanemene Israel pelane n pei au kengkieng pei ge kecu ci kebamne, nah pe minadung pecu ngngwa kelame au ngkieng süt. 11 Cine Ih keledeu sam au nang Israelme peciakne, Dan gade Beersheba ga kecang, de n dage qu hekwalu maisia, jaaidi ga heciangdung kieege kebamde nzwa, nah nangne penui de hereu ga sau mie kerabe da. 12 Pecai anui gwang David keheiga la liede pecu peei luzie, nah anui hangdeu ga hezin keimie kela nzwa pecu gumlu zie. Anui pecu pekatei, mede pe minadung ket de de ring bam lak. 13 Pa namdi ge ga caili nlüt dicai, Israelme peciakne heria teugwang zie cipau namdi ga nah anui cide kereuki gage teingkau dizie, tangtsu keceuna gede cika ngausi tadi kemaktane." 14 Ge Absalom nah Israelme rangdi, "Hushai Arkitme sam de au Ahithophel swa yiki." RAMPAUBE Ahithophel ledeu kebeu sam keyi de luu kelak riemdi delu, ciu eh Absalom da kekap teugwanglu kerane.

15 Pecai Hushai cingkume Zadok penai Abiathar dage rangdi, "Ahithophel Absalom nah Israel muiteume de cinzwa eh rangbeu, dede Ih ma keda rangbeu. 16 Ciciucai cu, zette miecu nah David dage paubeu; pe dage rangbeu, ‘Heziu Arabah heni cipauga kereuki kekahdung ga ramzeuki tei so, dede keheiteide kahpet lulo, mecai hegwangpei minadung pecu ngngwa kelame pelane de si eh teitset dizie lu.’" 17 Cu Jonathan penai Ahimaaz Rogel duipwak ga bamlu. Kilapui ge penai da mie bamla nah penai daipai ci neubi rangbeu la, kedanemene penai namdi ga lüt kecu ngaudi kera kehing ziemne. Sam rang gwanglu de, cidau penai mie delwe Hegwangpei David de rangbeu kerabe. 18 Dede cu pia rehangna ge penaide ngaulu nah Absalom dage paubeu. Cine Jonathan penai Ahimaaz zette tetdi nah Bahurim ga mipei ge kiga gwanglu, pe kigu ga tekwa ge bamla, cipau ga penai nghungdi. 19 Mipeibe nau de tekwa gum de pwalu delwe tekwa cide peu gumdi, delwe cide pereu gage ciu pudi, cine migede Jonathan penai Ahimaaz tekwa lung ga bam kecu cilu ma. 20 Absalom maame cipau puide kiga gwanglu delwe rangdi, "Daiga Ahimaaz penai Jonathan bam no?" Cipau pui de penuide rangbeu, "Penai kereuki kahpet dida." Cine Penui penaide peei twagwa gai kedi cai nah penaide ngaulu tadi, cine penui Jerusalem ga cailigwang di.

21 Cinzwa eh penui tet kedi cai Jonathan nah Ahimaaz tekwa be gade mpetlu. Penai hegwangpei David dage paubeu kera miedi; penai pe dade rangdi, "Cuhlu delwe dui reu zette kah petlu kedanemene Ahithophel n ha ketsamtsam ledeu beu bamdi delu." 22 Cidau David nah pecu nzang kelame minadung leune cuhlu, delwe penui Jordan kah mpetlu. Tingcang tingnaimiak tau lüt ge penui migede Jordan kah petlu kemak tei dima. 23 Ahithophel pe sam de mzui kemak ngaulu ge, pa pe gada reu nghang delwe tetdi. Pa pekatei pe namdi ga miedi, pe zai hadung de tei mdui lwe pekatei ngkak tsaidi. Ainzwa eh pa tsaidi nah pe kelak rau gage kungdi.

24 Pecai David Mahanaim ga gwanglu. Absalom ziemne au, pa nah Israelme pelane pecu ngngwa Jordan ga kah mpetlu. 25 Absalom Amasa de peu reugwame reu kedi teilu Joab keleu gade. Amasa cai Ishmaelme*, Jether napei, Abigail de ngngwa kezeube de, pa cai Nahash napui nah Zeruiah sinapui, Joab pui. 26 Pecai Israelme nah Absalom Gilead deu gage ramzeuki teilu.

27 Cinzwa eh David Mahanaim ga gwang keludau, Ammonme deu Rabbah nam gade kegwangbe Nahash napei Shobi, nah Machir Ammiel napei Lo Debar gade kegwangbe, nah Barzillai Gileadme Rogelim gade kegwangbe, 28 penui zeukam nah paibadung, hekwakdung nah tangdei lidung, nah wheat, barley tokkui, mei kerube, reteipi, lentil teugwangbeu, 29 heliadui, macania, meuründung, nah tungdui mnwa, ciude David nah pecu nzang kelamedung de peu tyeilu kerane. Cipau minadung de rangdi, "Minadung au hetaideu ga mzeu, leu nah hereu la."