1 RAMPAUBE rata Israelme da gwangdai delwe Pa David de peu penui reu keherei teugwang gai kera tei eh ranggai, "Mie, Israelme nah Judahme riak peilu." 2 Hegwangpei pecu ngngwa kela reugwame reu kedibe Joab dade rangdi, "Israel leuhme pelane da mie cu, Dan gade Beersheba kecang, delwe mina pelane de peilu, iciude Ih mina daikieege hereu tei lubui bi kecu ci lubui." 3 Joab hegwangpei dade rangdi, "RAMPAUBE n Tinggwang de peu mina pehai kieege tei ngkiee silu, delwe a mpaube hegwangpei miakngau gade cide tei kegaide ngau kelube tei lulo. Dede a mpaube hegwangpei daitei aide teineu lano?" 4 Cinzwa liede, hegwangpei samle kamtube tei Joab dade nah reugwame reu kedime dade. Cine Joab nah kedime hegwangpei dwa gade tetdi, Israelme de pei kerane. 5 Penui Jordan kahpet lu delwe Aroer taiga ge ramzeuki teilu, Aroer namdi tingbangle langkam gage. Pecai penui Gad gade Jazer lebie ge tetgai di. 6 Penui Gilead ga nah Tahtim Hodshi deu ga gwanglu, pecai Dan Jaan gade nah twagwa kebam Sidon lambie miedi. 7 Penui Tyre tsukwa nah Hivitme nah Canaanme namdidung pelane ga gwang canglu. Ciu eh penui Judah ga Negev Beersheba ga miedi. 8 Penui hangdeu pelane ga mbeuh mielu ge, kei hekui kekam lebie, zie ngkai caine Jerusalem ga penui cailigwang dailu. 9 Pecai Joab hegwangpei dage mina hereu teilu kebui peikelu peciakne paubeu. Israel ga 800,000 mina kuu süt eh cika kingtie kepwame bam, nah Judah ga mina 500,000 ge bam.

10 Ge David pa mina peei kelucai pe mlung gade pecu mmau di. Cine pa RAMPAUBE dage rangdi, "Ih aide tei eh kemau tei süt dida. Cu, RAMPAUBO, n kilabe mau gi beulo, kedanemene Ih miesüt kecu tatei dida." 11 David tingcang cuh luge, RAMPAUBE sam caihakecibe Gad da gwang, David pie kerengeibe dage ranggai, 12 "Mie David dage ranglo: ‘Aide RAMPAUBE ne ranggai: "Ih ncu makie kecum kedet kera peu bam. Cidungde gade ket kedet lulo."’" 13 Cine Gad David da mie delwe pe dage ranggai, "N deu ga mmi kecum herakum nda gwang zie mi? Mede nang n ngauraume dade kei cum pak zie mi penui ne ncu zui eh? Mede n deu ga lang cumne rapia bam zie bi? Cu cetlu daipai sam keli eh acu lang kegaibe da Ih teu cailigwang maisia bi." 14 Cidau David Gad dage rangdi, "Ih au aswa gah süt dida. Anuide peu mina ba gage kai kecu swade RAMPAUBE ba gage kaidi lulo, kedanemene pe ngaugia batadung au di sütlu."

15 Cine RAMPAUBE Israelme dage rapia ge langgai, tingcang gade riempwa kebam ting kecang, delwe Dan gade Beersheba ga kecang mina cang riakhena ge tsaidi. 16 Tinggimgwabe Jerusalem lege pe ba nzang pet ngkapdi lai eh kebam dau, RAMPAUBE kengkap de gade pelung li di nah tinggimgwabe mina de tei ngkap kebambe dage pa ranggai, "Yida! Cu n ba keu caili dilu." Cipau tingdau RAMPAUBE gwabe Jebusitme pei Araunah caipung ga sap bam. 17 Pecai David tinggimgwabe minadung de teitset kebamme de ngaulu ge, pa RAMPAUBE da mpau eh rangdi, "Ih kemau tei dida, nah Ih heta kesia teigai dida. Dede meurünhau, aidungde penui daipai tei dino? Ngaunggia eh peu acu nah a pei ki kelak da n ba gade saja peu lulo!"

18 Ge Cipau nai Gad, David da gwang eh pe dage rangdi, "Hang cu, delwe Jebusitme pei Araunah caipung gage RAMPAUBE de recabam ge tei gaibeu lulo." 19 Cine RAMPAUBE ajah kaikebeu nzwa, Gad pe dage tei lulo rang kebeu nzwa eh David hang di. 20 Araunah pie mpet gaige hegwangpei nah pe kilamedung gwang nna kela ngaulu. Cine Araunah tetpet eh hegwangpei dwaga pe zu hangdeu ga keumiedi. 21 Cidau Araunah rang eh, "A mpaube hegwangpei daitei eh pe kilabe, a da gwang lano?" David keligai, "N hecaipung de luilwe Ih RAMPAUBE ziemne racabam ge tei beu lu kerane, ciu eh minadung dade rapia keumpet dilu kera." 22 Araunah David dage rang eh, "Hegwangpei, a mpaubo, n katei ngu nzwa keu lulo. Ndwa gade keyibe tei lulo. Pielo, keru reca ziemne aika hetumseudung bam nah tsing ziemne ngwanggaidung nah ciukeneu kwakdung de bam. 23 Aidung de pelane, Ih Araunah ncu peu zie, a hegwangpei." Pecai pa hegwangpei dade rang eh, "RAMPAUBE, n Tinggwang depeu n ratak luu kelube tei lulo." 24 Hegwangpei Araunah dage rangdi, "Lak, Ih cide pemi tei eh lui zielie. Ih a dade pemi tei kemak magede pwa RAMPAUBE de keru ratak teibeu gailak." Cine David caipung de nah hetumseu de rangkanggeu shekel riakngei le luilu. 25 David cika ge RAMPAUBE ziemne reca bam teigai beu delwe cipau gage keru ratakdung nah kekangbau ratakdung teigai beu. Cine RAMPAUBE hangdeu be ziemne kekie keligai beu delwe rapia Israel gade mtakdi.