1 David RAMPAUBE pecu pe ngauraumedung pelane ba gade, nah Saul ba gade kelikebeu benai lei kie aidungde RAMPAUBE dage teigai. 2 Pa kiegai,

"RAMPAUBE au a tsurakang, a msiu, acu kelikelube.

3 Tinggwang au a tsurakang. Ih peda msiu lula.

Pa au a hegeu, a kelikelu kiibe, a kengkiengbam, nah a msiuki,

zaisiet gade acu kelikelube.

4 Ih RAMPAUBE de qu gaizie, pecu au hetwa peu bui siak lie,

nah acu a ngauraume dade kelilu zie.

5 Kedanemene ketsai cui acu twagwa kelu ziemne,

nah kengkap dui lwa kebamdung acu kezui pwabam dida.

6 Sheol kangriadung acu twagwa luda;

ketsai takdung acu keuh luda.✝

7 A rei gade Ih RAMPAUBE de qu gai;

Ih a Tinggwang de qu gai;

pa pe kerecaki gade a kwa siulu,

nah Ih kengha kie kegaide pe kwen ga lüt lu.

8 Pecai kideube mlaidi nah mbeudi.

Tinggimdung gu bangdwadung mbeudi

nah cidungde teukecung di, kedanemene Tinggwang pe rata kedine.

9 Mika pe ngkieki gade mpet di,

nah heu kebam mi pe mui gade petdi.

Regeudung de cide ne rugai.✝

10 Pa tinggimdung ngkei gai delwe nghung lu,

nah pe pi kangga muiting eh ladi.

11 Pa cherub reuga tet eh limla

pecu tingkai hesiudung reuga ngaudi.*

12 Pa kemui ge pwa paiki tei pecu twagwa lu,

tingdung ga tingrui mwa kerütdung hekwalu.

13 Pe dwaga tingkehepik gade

regeu mi cakmie.

14 RAMPAUBE tinggimdung gade tingceugai.

Hutube sah gai.

15 Pa lakpitsidung kapgai eh pe ngauraume de teizangdi,

tinghepik miheudung nah penuide langgidi.

16 Pecai jaaidi rwakdung ngaudi;

kideube bangdwadung mradi

RAMPAUBE kesiu kegai gade,

pe ngkieki taikegai cui gade.

17 Pa nreule de nghung canglu; pa acu pwalu!

Pa dui cui gade acu teu mpetlu.

18 Pa a ngaurau kengkiengme dade acu kelibeu,

acu ngaurau kelame dade, kedanemene penui a ziemne ngkieng zu kedine.

19 Penui a rei tingba benai acu ngngwa renia,

dede RAMPAUBE au acu kenghabe.

20 Pa acu heni mzaha kecu gage de ngngwa mpet beu.

Pa acu kelilu kedanemene pa acu pesui kelune.

21 RAMPAUBE a ziehi teibeu a kesamsang nzüt gade;

pa acu teu cuhlu a ba kenci nzüt gade.

22 Kedanemene Ih RAMPAUBE lampuidung pwa kelune

nah a Tinggwang dade nreu tet eh kemau tei dima.

23 Kedanemene Pe masang ajadung pelane a dwaga la kecune;

pe zaidung ziemne au, Ih cidung gade nreu tetdi ma.

24 Ih pedwa gade de kemau de ga,

nah Ih kemau gade acu kainzeu lu.

25 Ciziemne RAMPAUBE a ziehi teibeu a kesamsang nzüt gade,

Ih pe dwa gade mci kebam nzüt gade.

26 Kesamsangme dade, nang n kesamsang keulia beu la;

kemau kegahbe dade, nang maulakemak keulia beu la.

27 Kemcime dade nang kemci keulia la,

dede nang au kenlienme dade nzai sia la.

28 Nang keherei kelame de keli beu la,

dede ngang kelame de nang nsui la ma, nah nang penuide tei hena di la.✝

29 Nang au a mitaubung kecu ziemne, RAMPAUBO.

RAMPAUBE a kemui de teimbaa beu la.

30 Kedanemene n kengha gade Ih lampui kam kebamde reu pakkah lubui;

a Tinggwang ziemne Ih herieki reu nsau kah lubui.

31 Tinggwang ziemne au, pe zaireli au yicang.

RAMPAUBE sam au mci.

Pa au pe dade nsiulu kelame leune ziemne au hegeu ge lie.

32 Kedanemene RAMPAUBE gwale cau Tinggwang no,

nah Tinggwang gwale caube tsurakang ge no?

33 Tinggwang au a kemsiube,

nah pa kemau kegahme de pe lampui gage saugai beula.

34 Pa heti ge nzwa a pi peu pak mzet lula

nah kideutu kehudung gage acu kaigai beula.

35 Pa hereu ziemne a baciem keteu beula,

nah a ba hetageu lakpi pwa kap lu kera.

36 Nang n kelikelu hegeu de acu peu dida,

nah n suiyi dene acu tei di beu da.

37 Nang a kangga a pi ziemne heni kedi ge tei beu da,

cine a pi nzüt dima.

38 Ih a ngauraume de zui mie nah penuide ngkapdi.

Ih penuide ngkapdi kemaktane caili nreu dima.

39 Ih penuide ngkap dida nah penuide kedeumie dida; penui cuh gailak da.

Penui a pi kangga kau zeu dida.

40 Nang a reu gage kengkieng kaibeu hereu ziemne kiakang ge nzwa;

Nang acu renia kelame de a kang gage kai dida.

41 Nang peu a ngauraume de a dade pakdi;

acu ngkau kelame de Ih ngkap dida.

42 Penui kengha sahgai, dede migede penui de kelibeu ma;

penui RAMPAUBE dage sah gai, dede pa penuide samli peu ma.

43 Ih penuide kideu reuga rebui nzwa dap kecaidi,

Ih penuide puidi ga nyiasai nzwa penui reuga daucim.

44 Nang acu a minadung kesamlim gade de kelilu.

Nang acu heleuhdung peube nzwa kainzeu luda.

Ih cikemakme ge ne a gwateila.

45 Sangmedung de kemei tei eh peu a da keumie.

Penui a kwa siulu herizi, penui a samzai teila.

46 Sangmedung mbeu eh penui kengkieng bamdung gade mpet.

47 RAMPAUBE ringla! Peu a tsura de twa lulo.

Acu kelikelu tsura, Tinggwang de hetwa peu lo.

48 Tinggwang aide au a ziemne hekum tei kebeube,

minadung de a kang gage kai kebeube.

49 Pa a ngauraumedung dade acu lungmpet beu.

Kesang, nang ne acu renia kelame reu gage acu teucuh beu lie.

Nang pezai kesiame dade acu kelibeu la.

50 Ciziemne Ih ncu hetwa peuzie, RAMPAUBO, heleuhdung kakga de;

Ih n zi de ketwalei tei zie.✝

51 Tinggwang ngkieng kelu kedi pwa pe hegwangpei de peula,

nah pa samkakkelu kesamsang de pegu keniak kelube de pwalia la,

David dage nah kelungta pe leuhme dage."