1 Aipaucai David RAMPAUBE dade keteu nah rangdi, "Ih Judahme namdidung ket paube ga hang zie mi?" RAMPAUBE pecu keligai, "Hang cu." David rangdi, "Daipau namdi ga Ih mie lai?" RAMPAUBE keligai, "Hebron ga." 2 Cine David penau hangna de ngngwa lwe cika hangdi, Ahinoam Jezreel gade, nah Abigail Carmel gade, Nabal gu hemipui. 3 David pecu ngngwa kela mipeidung de ngngwalu, nah penui pe kilungme de nzang ciaklu, delwe Hebron namdidung ga gwanglu, nah penui cika lungh di. 4 Pecai Judah gade mipeidung gwang nah David de Judahme reu hegwang teikera keniaklu.

Penui David de ranglia, "Jabesh Gilead mepeidung ne Saul de kungdi." 5 Cine David samgwame de Jabesh Gilead mepeidung dage langgai nah penui dage rangdi, "Nnuide RAMPAUBE ne samlam beu delie, nnui masang aide nnui mpaube Saul de pwa lia kegaine nah pecu kung kebeune. 6 Cu peu RAMPAUBE de samting samkak kelu masang nah kesamsang nnuide pwalia lu. Ih de keyi aide pwalia zie nnuide kedanemene nnui heta aide tei kegaine. 7 Cine cu, peu n ba ngkienglu; ku lu kedanemene Saul nnui mpaube tsai dida, nah Judah kilungme acu penui reu hegwang teikera keniak luda."

8 Dede Ner napei Abner, Saul gu reugwame muiteube, Saul napei Ishbosheth de tuilu delwe pecu Mahanaim ga nzang gwangdi. 9 Pa Ishbosheth de Gilead, Asher, Jezreel, Ephraim, Benjamin, nah Israelme pelane reu hegwang teidi. 10 Saul napei Ishbosheth, mmi riakdai di pa Israelme reu hegwang tei ndeu kecudau, nah pa mmi kena ge hegwang tei. Dede Judah kilungme David caisui di. 11 David Hebron ga Judah leuhme reu mmi hena eh kei herok ge hegwang tei.

12 Ner napei Abner, Saul napei Ishbosheth kilamedung, Mahanaim gade Gibeon ga tetkai di. 13 Zeruiah napei Joab nah David kilamedung mie eh Gibeon rejaai gade penuide redau. Penui cika ntumlu, hemaa ge rejaai tuge lam nah keda maabe keda tule bie. 14 Abner Joab dage rangdi, "Rehangmedung de peu cuhlu nah anui dwa renia lo." Cidau Joab ranggai, "Peu penuide cuhlu." 15 Cidau rehangme cuhlu nah gwang ngkwalu, hang kereiehkena Benjamin penai Saul napei Ishbosheth ziemne, nah David kilame kakgade hang kereiehkena. 16 Mipei hangge ge kecu pe ngauraume de tuilu pe peu teulwe nah pe kingtie pe ngauraume lamge reugai nah penui kaumie nsamdi. Ciziemne cipau bam de pwa "Helkath Hazzurim," de qulu, mede "Kingtie luh," Gibeon ga kebam de. 17 Cipaunai regi mdi sütdi nah Abner nah Israel mepeidung de David kilamedung dwade ngamdi.

18 Zeruiah napeime hangcum cika bam: Joab, nah Abishai, nah Asahel. Asahel au heti nzwa pak mzet süt lula. 19 Asahel Abner de lampui tet lampak mene nnaka eh pecu gwazui mie. 20 Abner pecai nreu gwang pie gai nah rangdi, "Cide nang ni Asahel?" Pa keligai, "Cide Ih delie." 21 Abner pe dage rangdi, "N hile mede zetle nreu gwanglu, nah rehangme gede nimlu nah pe reunet keulu." Dede Asahel nreu caisim ma. 22 Cine Abner Asahel dage rangdai gai, "Acu gwa sita dilu. Daitei Ih ncu hangdeu gage teukau laino? Dainzwa Ih n sinabe, Joab dage a zu punglia lulai?" 23 Dede Asahel nreu caisim raudi, nah cine Abner pepum gage pe ngei tang lebie pwa pecu reu gai, iciu eh hengei pepum hia rela mpetdi. Asahel kaumie di nah cikade tsaidi. Cine cinzwa kedi cai Asahel kaumie nah tsai kedi bam ga keheibe de kegwangme, pa mtak nah sapdung bamdi.

24 Dede Joab nah Abishai Abner de zui miedi. Tingnaimiak nlüt kezeu dau, penai Ammah deutu ga gwanglu, Giah taiga kebam Gibeon hetaideu lampuiki le. 25 Benjamin leuh mipeidung Abner caiga penui ngkwa ncütlu nah lamlwa twang ga saplu. 26 Pecai Abner Joab de qugai nah rangdi, "Kingtie de ngkap lamui zieni? Nang ci meni kekam benai cide ka di kera? Zie daikieege zie reu no nang rangbeu kera n minadung de penui sinamedungde gwa kecu peu mtak kera?" 27 Joab keligai, "Tinggwang ringkela nzwa, nang cide rangdi melie cai, a reugwame pe sinamedung de tingba kemakta gwala zie nage!" 28 Cine Joab telui kwagai, nah pe minadung pelane mtak di nah Israel de gwasi tadi, mede penui keregi de si tadi. 29 Abner nah pe minadung cipau ziu tetcang eh Arabah de kah gwang. Penui Jordan de kahlu, pecia benai tingcang tet sap muilu, delwe Mahanaim gwang canglu.

30 Joab Abner de gwa kecu gade cailigwang lu. Pa pe minadung peciakne de teu hekwalu, nah cika Asahel nah David reugwame hang kereiehekui gahdi. 31 Dede David minadung Benjamin gu minadung 360 Abner de ngngwa kelame de teitsetdi. 32 Pecai penui Asahel de pwalu nah pe pei de kung kecu herau gage pecu kungdi, Bethlehem ga kebam de. Joab nah pe minadung tingmui hebeuh teicang, nah tingcang nuge penui Hebron ga gwang canglu.