1 Saul kilungme nah David leuhme kakga keregi tie süt bamdi. David ngkieng reureu di, dede Saul kilungme nnei reureu di.

2 Hebron gade David da mipeinadung lunghlu. Pe neraibe cai Amnon, Jezreel mepui Ahinoam dade lunghlu. 3 Pe na pekenabe, Kileab, Abigail dade lungh, Carmel mepei Nabal gu hemipui. Pe kecumbe, Absalom, caige Maacah napei, Talmai napui, Geshur ga hegwangpei. 4 David napei pemdaibe, Adonijah, caige Haggith napei. Pe napei pemengeibe cai Shephatiah, Abital napei, 5 nah peherokbe, Ithream, David nau Eglah napei. Pe napei aidungde Hebron gade David de mna beu.

6 Cinzwa eh Saul kilungme nah David kilungme kakga hereu tei kebam tingdau Abner be pekatei pecu Saul kilung gade tei ngkienglu. 7 Saul da nauseupui ge bam pezi Rizpah lie cuge, Aiah napui. Ishbosheth Abner dage rangdi, "Daitei eh nang a pei nauseupui da mie no?" 8 Cidau Ishbosheth sam siu lwe Abner pe rata sütdi nah rangdi, "Ih Judahme gu heteu peu ge ni? Henai Ih samsang de pwalia bam Saul kilungme de, n pei, pe siname de, nah pe zangme de, ncu pwa David ba gage kai kedi teimene. Dede nang cu Ih aipau puide dage kemau teigai kedi ziemne acu mmau au ni? 9 Peu Tinggwang de ada teigailu, Abner, nah ciswade, magade Ih David ziemne tei mecai RAMPAUBE pe dage pesam pet kebeu nzwa, 10 hegwangram de Saul kilungme dade keu caili kera nah David de peu hegwang tei kerane Israel reu nah Judah reu, Dan gade Beersheba kecang." 11 Ishbosheth, Abner sam kedadung kelilu tadi, kedanemene pa pecu hing kedine.

12 Pecai Abner samgwamedung de David da langgai pe keleu tei eh peu rang eh, "Cau deu no aide? Acu ngngwa samting samkak lulo, nah nang ngau zie a ba nda la kecu, Israel pelane de nda ngngwa gwang kera." 13 David keligai, "Makeyige, Ih ncu ngngwa samting samkak luzie. Dede Ih n dade mage keumaisia kela de au nang acu pie kera kegwang dau nang Saul napui Michal de ngngwa gwang rai maige, nang a zu ngau lak." 14 Pecai David samgwame langgai Saul napei Ishbosheth dage, rang eh, "Acu a nau Michal de peulo, Ih pe ziemne Philistinme geudung pemi haige suh di delu." 15 Cine Ishbosheth Michal de langgai delwe pe nahpei Paltiel, Laish napei dade pecu ngngwalu. 16 Pe nahpei pecu nzang mie, pa hap jüja nzang gwang, nah Bahurim kecang pe caisui gwang. Pecai Abner pe dage rangdi, "Cu kilung cailigwang cu." Cine pa caili di.

17 Abner Israel hangkiame de resiu eh ranggai, "Ndaa nnui David de peu nnui reu hegwang teikera tei. 18 Cu teicu. Kedanemene RAMPAUBE David de sampet beuda, rang eh, ‘A kilabe David ba gade Ih a minadung Israel mede Philistinme ba gade nah penui ngauraume pelane ba gade kelibeu zie.’" 19 Abner de pekatei Benjamin gu minadung de resiu. Pecai Abner David dede resiu kera Hebron ga mie, Israelme nah Benjamin leuhme pelane teineu kebam hengim de ranglia kerane. 20 Abner nah pe mina ngkai Hebron ga David de pie kera gwang keludau, David penui ziemne hengyi kera mteipwa bam. 21 Abner David dage rang nci liagai, "Ih cuh zie nah Israel pelane de ncu teu hekwa beuzie, a mpaube hegwangpei, iciude penui ncu ngngwa samting samkak lu kerane, iciude nang luneu kelabe pelane reu hegwang teilu kerane." Cine David Abner de langgi di, nah Abner ziune tetdi.

22 Pecai David reugwame nah Joab hereu gwalwe gwangdai nah penui ma tuikelu kekiee punggwang. Dede Abner Hebron ga David de ngngwa bam ma. David pecu langgi di, nah Abner ziune tetdi. 23 Joab nah pecu ngngwa kela regwame pelane gwang keludau, penui Joab da ranggai, "Ner napei Abner hegwangpei da gwang, nah hegwangpei pecu langgi di, nah Abner ziune tetdi." 24 Cidau Joab hegwangpei da gwang nah rangdi, "Nang daitei di no? Pielo, Abner nda gwang! Dai ziemne nang pecu langgi no, nah pa tet dida? 25 Nang ci meni Ner napei Abner ncu cwa kera gwang kecu nah nang tei lai eh kebamdung nah nang daitei bambi kecu leune cilu kerane?" 26 Joab David dade tet kedi dau, pa samgwame de Abner taiga langgai, nah penui pecu Sirah gu tekwa gade ngngwa cailigwang, dede David aide cima.

27 Abner Hebron ga cailigwang kecudau, Joab pecu herieki sum ga teumpet tsamlu pecu ngngwa ngkim resiu kerane. Cikade Joab pecu peza reu gai nah pecu teitset di. Ainzwa eh, Joab pe caihereibe Asahel kum peeilu. 28 David aipau ha de siulu ge pa rangdi, "Ih nah a hegwangram au RAMPAUBE dwa de madaude mau ma Ner napei Abner de teitset kecu gade au. 29 Peu Abner tsaikedi maude Joab peu ga nah pe pei leuhme pelane da gwang kelube teilu. Peu cika madaude gah helo Joab kilung ga migede majam teei kecume mede pe geu mateei mede mige tet gailak nah hetuitie pwalwe tet maikesia mede kingtie le teitset di kecume mede taktyei kera gah kecume." 30 Cine Joab nah pe sinabe Abishai Abner de teitset di, kedanemene pa penai sinabe Asahel de Gibeon reu gade teitset di kecune.

31 David Joab dage nah pecu ngngwa kebam pelane dage rangdi, "Nnui gunia teurak di, rosopai bahlu, nah Abner pau dwa gade hei eh haplu." Cu hegwangpei David tsai paau caiga tet jüja pe pau de nzang gwang. 32 Penui Abner de Hebron gage kungdi. Hegwangpei Abner rau gade hapdi nah hap ntei sütdi, nah mina pelane de hapdi. 33 Hegwangpei Abner ziemne pesuisia bam nah leitei gai,

"Abner de peu kemieme ketsai nzwa tsai zieni?

34 N ba kena de au kang ma.

N pi au keu ma.

Mina mateunsam la kemak namedung dwade kaudi kela nzwa, nang de kaudida."

Mina pelane pe ziemne hap daidi. 35 Mina pelane gwang David de peu matyeilu kera tei tingba kebam dauge, dede David pesam petgai, "Peu Tinggwang de a dage teigai lulo, nah ci swade, magade Ih tangku mede makeheibe liede tingnaimiak nghung kemakne msi cai." 36 Mina pelane David lungrei de ngau di, nah cide penui suilu, kedanemene hegwangpei tei kegai keheibe de penui sui kelune. 37 Cine mina pelane nah Israelme pelane cipaunai cilu hegwangpei lungning kemak de Ner napei Abner de teitset kera. 38 Hegwangpei pe kilame dage rangdi, "Nnui ci meni hegwangna nah mina kenlang mege henai Israel ga kaukedi? 39 Henai Ih mnei bam, Ih keniak kelu hegwangpei liede. Mina aidungde, Zeruiah napeidung, a ziemne penui zaisia zu dilie. RAMPAUBE de peu makesia tei kelabe de pe ta kesia ketei ziehi peucaili lo pecu saja peu eh, pa hilu delu."✝