1 Pecai Israel leuhme pelane Hebron ga David da gwang nah rangdi, "Pielo, anui au n teih n jai lie. 2 Nda gwang kedi lebie, Saul anui reu hegwang tei kebam dau, nangne Israel reugwame de teuswa beu. RAMPAUBE n dage rangdi, ‘Nang a minadung Israelme meurün kekwabe zie, nah nang Israelme reu muiteu tei zie.’"✝ 3 Cine Israel hangkiamedung pelane Hebron ga hegwangpei da gwang, nah hegwangpei David penuide ngngwa samting samkak lu RAMPAUBE dwade. Penui David de keniaklu Israelme reu hegwang tei kera. 4 David mmi camrei kedidau pa hegwang tei ndeulu, nah pa mmi riakdai ge hegwang teilu. 5 Pa Hebron ga Judahme reu mmi hena nah kei herok hegwang tei, nah Jerusalem ga pa mmi camreiekecum Israelme pelane nah Judahme reu hegwang tei.

6 Hegwangpei nah pe minadung, hangdeu cika lungh kebamme Jebusime de renia kerane Jerusalem ga miedi. Penui David dage rangdi, "Nang aika gwang gailak miakcietme nah pisiame ne de ncu gwa gidi lubui. David aika gwang gailak." 7 Iciuliede, David Zion kengkiengbam de tuilu, nah cu cide David namdi tei dida. 8 Cidau David rangdi, "Caugame Jebusime de gwaketang bi, hangdeukang duilwa kebam gade ‘pisiame nah miakcitme’ David ngauraume da gwang cang kera mie zie." Ciziemne mina rangla, "‘Miakcitme nah pisiame’ hegwangki ga lüt lak." 9 Cine David kengkiengbam ga lunghdi, nah cide David namdi de eh qu di. Pa herieki rie twagwa di, petwang gade pelung lebie de. 10 David ngkieng sütdi kedanemene RAMPAUBE, Tinggwang ngkiengtube pecu ngngwa kelane.

11 Pecai Hiram Tyre ga hegwangpei samgwame de David dage langgai, nah cedar tsingbang, tsingtaketeime, nah tangtsutaketeime de si eh. Penui David ziemne ki ge teilu. 12 David RAMPAUBE ne pecu Israelme reu hegwang teibeu kecu cibam, nah pa pe hegwangram teindu kebeu pe minadung Israelme ziemne.

13 David Hebron pütkedi cai Jerusalem ga gwanglu, pa nauseupuidung nah pe naudung luu silu Jerusalem gade, nah pa pe napei nah pe napuidung lungh silu. 14 Aidungde pe namedung zidung da Jerusalem gade pa lungh kelume: Shammua, Shobab, Nathan, Solomon,✝ 15 Ibhar, Elishua, Nepheg, Japhia, 16 Elishama, Eliada, nah Eliphelet.

17 Cu Philistinme David de Israelme reu hegwang tei kera keniak kelu ha siulu ge, penui pelane tetpet pecu peei. Dede David cide siulu delwe kengkiengbam ga nghung di. 18 Cu Philistinmedung gwanglu nah Rephaim langkie ga gwang bam kwa di. 19 Pecai David RAMPAUBE dade kengha kiegai. Pa rangdi, "Ih Philistinmedung de ketang zie ni? Nang acu penui reu peu ngkienglu zieni?" RAMPAUBE ranggai David dage, "Ketang cu, kedanemene Ih ncu Philistinme reu peu ngkieng bi luzie." 20 Cine David penuide Baal Perazim gade ketang nah pa penuide cikade ngamlu. Pa sam kaigai, "RAMPAUBE a dwaga a ngauraume da lüt dui kedi nswak kela nzwa." Cine cipau bam de de Baal Perazim teidi. 21 Philistinmedung penui rabe miedung cika ge gidi, nah David nah pe minadung cidungde keu tetdi.

22 Pecai Philistinmedung nghang dailu nah Rephaim chabak ga tetzang gai dailu. 23 Cine David RAMPAUBE dade kengha kiedai gai, nah RAMPAUBE peda rang eh, "Nang penui dwale de ketang so, dede penuide pecaile de nggoi tegwalu nah penuide ketanglu balsam bangdung lebie de. 24 Nang mina lüt kela kwa tingkai gui kebam balsam tsingbang tün gade siu keludau, cidau kengkieng teu ketanglu. Aide teilu kedanemene RAMPAUBE n dwaga mie nswa ladi delu Philistinmedung reugwame de ketang kera." 25 Cine David RAMPAUBE pecu rang kebeu nzwa teilu. Pa Philistinmedung de Geba gade Gezer tetgwang cu kecang teitset.