1 Ge Zeruiah napei Joab hegwangpei Absalom de ngau neu kebam ci di. 2 Cine Joab Tekoa gage sam langgai nah kemteu pui gede peda ngngwa gwang beu. Pa pe dage rangdi, "Kehereide nang n suisia la kecu rehi teilu nah suisiet paini bahlu. Kehereide maca le ncu keniak diso, dede mipui peting ketie ge hei hapla kedime nzwa lulo. 3 Pecai hegwangpei da miecu delwe Ih ranglia lai eh kebam de pe dage rang beulu." Cine Joab hegwangpei dage pa rang kera samdung de pe dage rangbeu.

4 Tekoa mepui de hegwangpei de kempau ge, pa hangdeu ga pe zu keumie lu delwe rangdi, "Acu nghalo, hegwangpei." 5 Hegwangpei pe dage rangdi, "Daipai teidi no?" Pa keli eh, "Kesang be au Ih au hemipui ge, nah a nahpei tsai dida. 6 Ih, n kilabe pui, a napei hangna bam, nah penai luh gade ngngwa keretei, nah cika penaide teuntsam kera migede gah di. Hangge pau ne kedabe de teidi delwe pecu teitsetdi. 7 Cu pautsana peciakne n kilabe pui de ngaurau cuh dida, nah penui rang eh, ‘Anui ba gage pesinabe de teitset kedibe de peulo, iciu eh anui pecu teitset dilu kerane, pe sinabe pa teitset kedibe kum peeilu kera.’ Cine Penui pehiak de liede tei ngkapdi zie da. Iciu eh a da regeu ru bang kebam nade de penui tei mmütdi zieda nah penui a nahpei ziemne pezi mede pe leuhme liede kideu reu gade tei nggah dizie da."

8 Cine hegwangpei mipui de rangdi, "N kiga gwangcu, nah Ih n ziemne mage teibeu kera rangbeu zie." 9 Tekoa mepui de hegwangpei de keli eh, "A mpaupei, hegwangpei, kemau tei kedi püt de Ih nah a pei kelak de peu punglo. Hegwangpei nah pe hegwangbam au mzeu lie." 10 Hegwangpei keli eh, "Keheibe de n dage mage de rang cai, pecu ada ngngwa gwanglu, nah pa madaude ncu tung sita dizie." 11 Ge pa rangdi, "Kehereide, peu hegwangpei de RAMPAUBE n Tinggwang dage kielo, ciciude hekum peei kelame mide teitset sita dilu kerane, ciciu eh penui a napeide de teitset melu kerane." Hegwangpei keli eh, "RAMPAUBE ring kela nzwa, n napei peutam kette hangdeu ga cakmie dilak."

12 Pecai mipuibe rangdi, "Kehereide peu n kilabe pui de a mpaube hegwangpei da sam rang silo." Pa rangdi, "Ranggai cu." 13 Cine mipuibe rangdi, "Nang daitei eh kemau bata ci kenzwa ge Tinggwang minadung dage teigai kera cet lano? Ma aide rang kegai gade, hegwangpei au mige kemaube nzwa dida, kedanemene hegwangpei pe napei gwagi kedibe de ngngwa cailigwang dai ma kecune. 14 Anui peciakne tsai kerabe da, nah anui au hangdeu gage dui ruigai kedibe nzwa da, cide rui hekwa dai gailak. Dede Tinggwang au keringria keuteu dilak; meliene, pa au peu pak kelame ziemne lampui peu ngau dai lwe gwang dai lula. 15 Cu ciciucai, Ih a mpaube hegwangpei da ma aidungde ranglai eh gwang kela au, kedanemene minadung ne acu keheu kedine. Cine n kilabe pui pekatei pecu rangdi, ‘Ih cu au hegwangpei de marang zieda. Hegwangpei pe kilabe pui kie kelade teibeu zie ha. 16 Hegwangpei a kwa kingneilu eh acu nah a napei de ket tei eh, Tinggwang ne anuide kepeu deu de gade, teitsetdi zielie kelame ba gade pe kilapui de kelibeu zie ha.’ 17 Ge n kilabe kekie tei eh, ‘RAMPAUBO, kehereide peu a mpaube hegwangpei sam de gade acu peu ziune lulo, kedanemene Tinggwang samgwame nzwa, a mpaube hegwangpei au kesiabe gade keyibe cet ntsam lubui.’ Peu RAMPAUBE n Tinggwang de ncu ngngwa la kelube tei lulo."

18 Ge hegwangpei keli eh mipuibe dage rangdi, "Kehereide Ih ncu keteu lai eh kebam de gade a dade magede mbai diso." Mipui keli eh, "Peu a mpaube hegwangpei de cu maranglo." 19 Hegwangpei rangdi, "Ma aidungde ga Joab bata ncu si eh la meni?" Mipui keli eh rang, "Nang ringkela nzwa, a mpaube hegwangpei, migede a mpaube hegwangpei keheibe rang kegai gade zetle ba mede hile ba de pak gailak. N kilabe Joab ne acu aja kaibeu nah n kilabe rang kegai gade acu ma aidungde rangbeulo paubeu. 20 N kilabe Joab aide tei kegai au tei kebam makie de tei lilu kerane. A mpaube au maci, Tinggwang samgwame maci nzwa, nah pa hangdeu ga tei kelabe leune cila."

21 Cine hegwangpei Joab dage rangdi, "Cu pielo, ma aidungde Ih teigai zie. Ciciucai miecu, nah rehangbe Absalom de ngngwa cailigwang lu." 22 Cine Joab hegwangpei de kerüt nah teikeherei delie eh pedwa hangdeu ga keumie. Joab rangdi, "Henai Ih n dwa gade n suibe teikelu n kilabe cilu da, a mpaube hegwangpei, pe kilabe kie kelade teibeu kelu gade." 23 Cine Joab cuhlu delwe Geshur ga miedi, nah Absalom de Jerusalem ga ngngwa cailigwang lu. 24 Hegwangpei rangdi, "Peu pecu pe kiga cailigwang lu, dede pecu peu a zu ngau so." Cine Absalom peki ga cailigwang di, dede peu hegwangpei zu ngau ma.

25 Cu Israel pelane ga migede pe rehang pekeyi de ziemne pe nsa kerang Absalom kenzwa bam ma. Pa pepeu gade pepi kecang magede cang kemak peda gah. 26 Pa pe peutam mmi ramsang kum kekamle biet la, kedanemene petam pe ziemne rüt di kelane, pa pe peutam de mdet la; cide perüt shekel hai na swa kieela, cide au hegwangpei kemdet zai gade mdetla. 27 Absalom dade mipeina hangcum nah mipuina hangge lunghlu, pezi becai Tamar. Pa au hezukeyi pui ge.

28 Absalom Jerusalem ga mmi kena cang lungh, hegwangpei zu ngau mene. 29 Ge Absalom Joab dage sam langgai, pecu hegwangpei da langgai kera, dede Joab peda gwang ma. Cine Absalom sam pekenabe pia de langgai, dede Joab cipau pia de gwang ma. 30 Cine Absalom pe kilamedung dage rangdi, "Ainie, Joab luh a luh taiga bam, nah cika pegu barley bam. Mie delwe cika ge mi twa gailo." Cine Absalom kilamedung luh ga mie mi twa gai. 31 Ge Joab cuh delwe Absalom da pe kiga gwang, nah pe dage rangdi, "Daitei n kilamedung a luh gage mi twa gaino?" 32 Absalom Joab de keli eh, "Pielo, Ih n dage sam langgai eh ranggai, ‘Aika gwanglu iciu eh Ih peu ncu hegwangpei dage langgai eh rang zie, "Ih daitei Geshur gade gwang lano? Cika kebambe a ziemne yiki kera ge. Cine cu au acu peu hegwangpei zu pielo, nah Ih magade mau lacai, peu pecu acu teitset dilu."’" 33 Cine Joab hegwangpei da mielu delwe pecu rangbeu. Hegwangpei Absalom de qu kegaidau, pa hegwangpei da gwanglu nah hegwangpei dwa hangdeu ga keumie nah hegwangpei Absalom de kemam gai.