1 Cinzwa eh matiemene Ammon leuhme gwangpei tsaidi, nah pe napei Hanun ne pe bam ga hegwang teidi. 2 David rangdi, "Ih Nahash napei Hanun de ngaugia liagai zie, pe pei acu ngaugia lia kegai nzwa." Cine David pe kilame de langgai Hanun lung taumla kera pe pei ha ziemne. Pe kilame Ammonme deu ga lütlu. 3 Dede Ammon leuhme muiteume penui mpaupei Hanun dage rangdi, "N lung taumla kerane pa minadung de n dage langkegai de ziemne nang David n pei de rütla lie eh cet kesang lani? David n dage pe kilamedung de peu namdibe pie kerane langgai meni, cide mcet eh, gwalu kerane?" 4 Cine Hanun David kilamedung de tuilu, penui geitangmai pempie ge taidi, penui paini penui ndang kecang dangtüt di, delwe penuide langgi di. 5 Aide penui David dage rang kegaidau, pa penuide redau kera mipeidung langgai, minadung ngngam süt kedine. Hegwangpei rangdi, "Nnui geitangmai lungcuh dailu kemakta Jericho ga bamlu, delwe pecaine cailigwang lulo."

6 Ammonme penuide David ngkaukedi cilu ge, Ammon leuhmedung samgwamedung langgai eh Beth Rehob nah Zobah gade Aramme de, hepi reugwame mina cang ngkai, nah Maacah gwangpei mina cang ge de ngngwalu, nah Tobme mina cang kereiehkena de si eh lilu. 7 David cide siulu ge, pa Joab nah reugwamaa pelane de langgai. 8 Ammonme tetpet eh penui namdibe rieki kimui ga hereu tei kera sapbia lu, cidau Zobah penai Rehob ga Aramme, nah Tob nah Maacah ga minadung, penuikatei hangdeu kemza ga saplu.

9 Joab hereu pedwale nah pecaile kenana lam pecu mcwa lwe sapbia kebam ngaulu ge, pa Israelme reugwa yitume kangge de kedet lu delwe Aramme de renia kera penui mteilu. 10 Kedame pe minadung de pwa pe sinabe Abishai ba gage kai beudi, delwe pa penuide Ammon reugwame de regi kera lang mpetlu. 11 Joab rangdi, "Aramme a ziemne ngkieng zu dicai, iciucai nang, Abishai, acu kelilu maisia. Dede Ammon reugwame au n ziemne ngkieng zu dicai, iciucai Ih gwang eh ncu kelilu zie. 12 Ngkieng lu, nah anuikatei anui minadung ziemne nah anui Tinggwang namdidung ziemne ngkieng lie kecu keulia gelo, RAMPAUBE au pe mariem ziemne keyibe teilu zie kecune." 13 Cine Joab nah pe reugwame Aramme de hereu tei renia kera tetpet di, penuide Israel reugwame dwa gade gwaketang eh pak kecu teidi. 14 Ammon reugwame au Aramme pak kedi ngaulu ge, penui de Abishai dade pakdi nah namdibe ga caili nlütdi. Pecai Joab Ammonme minadung dade cailigwang lu nah Jerusalem ga cailigwang di.

15 Aramme Israelme ne penuide ngam kedi ngaulu ge, penuikatei gwang ngkwa dailu. 16 Pecai Hadarezer Euphrate Reuki gwale de Aramme reugwamaa de langgai. Penui Helam nah Shobak ga gwanglu, Hadarezer gu reugwame reu kedibe, penui dwa tetlu. 17 David da aide ranglia kebeu dau, pa Israelme pelane de qu hekwalu, Jordan kahlu, nah Helam ga gwanglu. Aramme David de renia eh hereu maadung penuikatei mteilwe sapbia lu delwe pecu regi. 18 Arameanme au Israel dade pakdi, nah David au penui hekwen bagidung ga kela mina hai hena de nah hekwen keteume mina cang riakdai de teitsetdi. Shobak penui gu reugwamaa muibe de rejam di eh cikade tsaidi. 19 Hegwangme pelane Hadarezer kilamedung au penuide Israel ne ngamkedi ngaulu ge, penui Israelme de ngngwa kezuyi teilu delwe penui kangga kelungme teidi. Cine Aramme au Ammonme minadung de ngha si kera hingdi.