1 Cinzwadi eh aipaucai David napei, Amnon puiseu napui Tamar de nrai sütdi, pa au Absalom tipui kesangbe, David napei keda hangge. 2 Pe tipui Tamar ziemne Amnon mnunglu tadi nah pa nra di, pa au relei kemci puige, nah Amnon pecu magede teigai kelak nzwadi. 3 Dede Amnon pe zangme ge, David sinabe, Shimeah napei pezi Jonadab de kecu ge bam. Jonadab au mriak süt cu pei ge. 4 Jonadab Amnon dage rangdi, "Hegwang napei ge daitei nang tingcang ramsang n suisia bam no? A dage nang rang lak ni?" Cine Amnon pecu keligai, "Ih Tamar de nrai lie, a sinabe Absalom tipui de." 5 Pecai Jonadab pe dage rangdi, "Nzeu ga zeulu delwe mra kecu ciem teilu. N pei ncu pie kera gwang kecu dau, pe dade kielu, ‘Nang kehereide a tipui Tamar de a dage langgai beulo acu peu matyei kera pwapeu kerane nah cide a dwa gade langlu kera, ciude Ih cide ngaulu kerane nah pe ba gade tyei lu kerane?’" 6 Cine Amnon kemra ciem teilu delwe zeulu. Hegwangpei pecu pie kera gwang kecudau, Amnon Hegwangpei dade rang eh, "Kehereide a tipui Tamar de a dage langgai beu eh Ih nra kebam ziemne taktyei kesa a dwa gade telei lu kerane ciude Ih pe ba gade tyeilu kerane."

7 Cidau David pe hegwangki ga Tamar dage sam langgai eh ranggai, "Cu n heipei Amnon kiga mie cu delwe pe ziemne taktyei mteilu." 8 Cine Tamar pe heipei Amnon kiga pa zeu kebam ga miedi. Pa tokkui keulu delwe pe miakngau gade cide henetlu nah tangku teilu, delwe pa cide rulu. 9 Pa tangku kerukwak pwalu eh tangku pecu peu, dede pa tyei tadi. Pecai Amnon cika kebam mina kedame dage ranggai, "Mina pelane de a taiga de lang gidi." Cine pelane pe dade tetdi. 10 Ciu eh Amnon Tamar dade rangdi, "Taktyei de a zeubung ga pwa lütlu ciu eh Ih n ba gade tyeilu kerane." Cine Tamar pa teikelu tangku pwalu delwe pe heipei Amnon zeubung ga pwa gwang beu. 11 Pa taktyei peda pwa kegwang dau, pa pecu gieplu delwe pe dade rangdi, "Gwang lu, a tipoi acu ngngwa zeulu." 12 Pa pe dage keligai, "Lak, a heibo, a kemei teiso, kedanemene Israel ga aikenzwa ta tei kerabe ma. Aikenzwa hengam ta tei so! 13 Ih a hengam dainzwa tei nggah lu lai no? N ziemne dainzwa no? Nang au Israelme kakga de kemieme hangge nzwa dizie! Kehereide cu hegwangpei dade rang lulo, kedanemene pa acu n dade keu mbai di laklu." 14 Ciuliede Amnon pe sam kingnei tadi, nah pa au peswa pa ngkieng gwa kecune, pa pe dade ngkinglu, delwe pa pecu ngngwa zeudi.

15 Pecai Amnon Tamar de ngkau sütdi. Pa pecu luu keneu swade pa pecu ngkau gwadi. Amnon pe dage rangdi, "Cuhlu delwe tetcu." 16 Dede pa pecu keligai, "Lak! Kedanemene ma siasüt kecu aide nang a dage tei kegai swade nang acu langgi kecu au siagwa lie!" Dede Amnon pe sam kingnei ma. 17 Meliene, pa pe kilame de qulu delwe rangdi, "Aipau puide de a dade teu tetdi, nah pecu kikam ngkuinam di." 18 Ge pe kilabe pecu ngngwa mpetdi delwe pe cai gade kikam ngkuinam di. Tamar au yisüt kecu nia teula kedanemene hegwangme napui relei kemcime teu kelane. 19 Tamar pe peu gage mimüt kailu delwe pe nia hietdi. Pa pe ba pepeu gage kailu delwe tetdi, hap süt eh pa tetdi.

20 Absalom pe sinabe peda rang eh, "N heipei Amnon ncu ngngwa bam me ni? Dede cu zing delu, a tipoi. Pa au n heipei lu. Ma aide nlung gage kainzeu so." Cine Tamar pe sinabe Absalom kiga pekatei lungh bamdi. 21 Dede hegwangpei David ma pelane siu luge, pa perata sütdi. 22 Absalom Amnon dage mage de rang ma, kedanemene Absalom pecu ngkau sütdi pa pe teipui Tamar dage heta aikenzwa ge teigai eh pecu hengam tei kegaine.

23 Mmi kena ge gwang cang kelu cai Absalom pe meurün mai kebietme Ephraim taiga Baal Hazor ga heta tei bam, nah Absalom hegwangpei napeime pelane de cika gwang lulo qugai. 24 Absalom hegwangpei da mie eh rangdi, "Cu pielu, n kilabe pe meurün mai kebietme bam dida. Kehereide peu hegwangpei nah pe kilamedung acu, n kilabe de ngngwa tetlo." 25 Hegwangpei Absalom de keligai, "Lak, a napei, anui pelane mie lak kedanemene anui n püt teirüt zielu." Absalom hegwangpei dade pe nggia kie bi di, dede pa au mie lak dedi, dede pa pecu pe samlam kaibeu. 26 Ciu eh Absalom rang eh, "Melie cai, kehereide a sinabe Amnon de peu anuide ngngwa mielo." Cine hegwangpei pedade rang eh, "Daitei Amnon ncu ngngwa tet laino?" 27 Absalom David dade kie ketang di, pa cine peu Amnon nah hegwangpei napeimedung pelane de ngngwa tetdi. 28 Absalom pe kilamedung de aja kai eh ranggai, "Kingnei sünne lu. Amnon zau sak lwe mie kedidau nah Ih nnui de, ‘Amnon de tei cu,’ de eh rang kegaidau, pecu teitset dilu. Ngngi diso. Ih nnuide aja kaibeu meni? Kuu nah lungdi lu." 29 Cine Absalom kilamedung pa penuide aja kai kebeu de nzwa eh Amnon dage teigai di. Cidau hegwangpei napeimedung pelane cuhlu, delwe keheibe de pe hekwen reu cwalwe pakdi.

30 Cinzwa eh penui lampuiki ga keladau David da sam aide teugwang beu eh ranggai, "Absalom ne hegwangpei napeidung pelane de teitset dida, nah cika penui migede de bang meda." 31 Ciu eh hegwangpei cuhlu eh pe paidung hietdi, nah hangdeu ga zeu bamdi; pe kilamedung pelane cuh saplwe pecu ngngwa penui paidung hietdi. 32 David sinabe, Shimeah napei Jonadab, keligai delwe rangdi, "A mpaupei de peu penui rehangmedung, hegwangpei napeimedung pelane de teitset di lie kecu peu nlum helo, kedanemene Amnon rünne tsai dilu. Absalom pe tipui Tamar dage Amnon hezai gi kah kedi benai gade aide riem teula dida. 33 Ciziemne peu a mpaube hegwangpei de pau kebeu aide peu pelung ga kaidi helo, ciu eh hegwangpei napeimedung pelane de tsaidi delie nlum kera, kedanemene Amnon rünne tsaidi lu."

34 Absalom pak tetdi. Kilame ge pemiak ngang cu pie kebam dau pe dade naimiak kenlütle bie hangdeutu mbie lede mina kekiee gwang kela ngaulu. 35 Ciu eh Jonadab hegwangpei dage rang eh, "Pielo, hegwangpei napeimedung gwang lada. Cide au n kilame kerang nzwa." 36 Ciu eh pa marang cang kedi cai, hegwangpei napeimedung gwang canglu delwe penui kwadung cisüt eh hapdi. Hegwangpei nah pe kilamedung de hap sütdi.

37 Dede Absalom pak pwa Ammihud napei Talmai Geshur ga hegwangpei da miedi. David tingba ramsang pe napei ziemne hei eh hap bamdi. 38 Cine Absalom Geshur ga pak mie delwe mmi kecum pa cika bamdi. 39 Hegwangpei David Absalom de mie ngau kera regui di, kedanemene Amnon nah pe tsit de ziemne pelung taumla kelune.