1 David rangdi, "Saul kelak ga migede bang nzeu reuni, Jonathan ziemne Ih penui da a zai keyi liagai lu kera?" 2 Saul kelak ga kilame mige cika pe zi Ziba bamla, nah penui pecu David dage qugai. Hegwangpei pe dage rangdi, "Nang Ziba deni?" Pa keligai, "Yeo. Ih au n kilabe lie." 3 Cine hegwangpei rangdi, "Saul kelak ga migede bang nzeu meda ni, Ih Tinggwang ngaugia penui dage liagai lu kera?" Ziba hegwangpei dage keligai, "Jonathan cude pe napei ge bam, pa au pe pi telwa." 4 Hegwangpei pe dage rangdi, "Pa daiga lano?" Ziba hegwangpei dage keligai, "Pielo, pa au Lo Debar ga Ammiel napei Machir kiga bam lie." 5 Pecai hegwangpei David mide langgai eh pecu Lo Debar ga Ammiel napei Machir ki gade pecu ngngwa mpetlu. 6 Cine Mephibosheth Jonathan napei Saul napei, David da gwang eh David de kerüt gade pe zu hangdeu ga keumie. David rangdi, "Mephibosheth." Pa keligai, "Ainie, Ih au n kilabe!" 7 David pe dage rangdi, "Ngngi diso, kedanemene n pei Jonathan ziemne Ih n dade a zai keyi liagai bi zie, nah Ih ncu n pau Saul deu pelane peudai zie, nah nang kehei daude a taktyeibam gade matyei zie." 8 Mephibosheth keumie lu delwe rangdi, "N kilabe cauge lie eh lano, Ih heteu ketsaibe kenzwa gede nang n zai keyi liagai kera?"

9 Pecai hegwangpei Saul kilabe Ziba de qulu, delwe pe dage rangdi, "Saul nah pe kelak gu leune Ih n mpaube tsapei de peu dida. 10 Nang, n napeidung, nah n kilamedung pe ziemne heta ta maisia nah nang meidung luhlüt lu maisia iciu eh n mpaube tsapei tyei kera taktyeipok bam luzie. Kedanemene Mephibosheth, n mpaube tsapei, a taktyeibam gade tyei mui maisia." Cu Ziba napei kereiehmengei nah kilame ngkai bam. 11 Pecai Ziba hegwangpei dage rangdi, "N kilabe a mpaube hegwangpei pe kilabe dage kerang pelane tei luzie." Hegwangpei rangsi gai, "Mephibosheth ziemne au, pa a taktyeibam gade matyei zie, hegwangpei napeidung hangge nzwa." 12 Mephibosheth napei rehang ge bamla pezi au Mika. Ziba ki ga kelungme pelane au Mephibosheth kilamedung. 13 Cine Mephibosheth Jerusalem ga lunghdi, nah pa hegwangpei taktyeibam gade matyei muila, pa au pe pi kena telwa liede.