1 David hegwang ketei tingdau mmi kecum ge herakum kum gwangdi, nah David RAMPAUBE dade aipau ha de keteu gai. Cine RAMPAUBE rangdi, "Aipau herakum nnui da gwang kecu au Saul nah pe kilungme mide teitset kedi ziemne lie, kedanemene pa Gibeonme de teitset di kecune." 2 Iciuge Gibeonme au Israelme ma; penui au Amoritme leuh bang bam kecumedung. Israelmedung penuide teitset lak lie eh reset beu da, dede Saul au Israelme nah Judah leuhme ziemne pelung pang kecune penuide teitset ciakdi kera tei cu. 3 Cine hegwangpei David ne Gibeonme de qu hekwalu delwe penui dage rangdi, "Ih nnui ziemne daipai tei beu lai no? Dainzwa de kemaudung rilu lai no, ciu de RAMPAUBE keyi nah sampetdung de mapwa minadung de samlam beulu kera?" 4 Gibeonme pe dage keligai, "Aide au anui kakga rangkang geu mede kecak, mede Saul nah pe kilungme ha melie. Cinzwa anui Israelme migede de teitset di kera au melie." David keligai, "Ih nnui ziemne daitei maisia lie nnui rang zeu no?" 5 Penui hegwangpei sam keligai, "Anuide teitset ciakdi kera ntei kecube pei de, anuide heciem kesia ndam gai, ciu eh anuide tei ngkapdi da nah Israelme rai lungga peu bam tadi kera tei kecu, 6 peu pe leuhmedung gade minadung hang hena anui dage kaibeu lulo, nah anui penuide RAMPAUBE dwa gade RAMPAUBE ne kedet kelude Saul nam Gibeah gade gwaktset dizie." Cine hegwangpei rangdi, "Ih penuide ncu peu zie."

7 Dede hegwangpei Saul capei Mephibosheth, Jonathan napei de bangbeu, kedanemene RAMPAUBE David nah Saul napei Jonathan kakga samkak pwa kebam ziemne. 8 Dede hegwangpei Aiah napui Rizpah napei kena de ngngwalu, pa ne Saul de mna kebeu napei kenade, pe napei kena zi be Armoni nah Mephibosheth; delwe David Saul napui Merab * Meholahme Barzillai napei Adriel de pane mna kelume hangmengei de ngngwa si lu. 9 Pa penuide Gibeonme ba gage kai beudi. Penui penuide lamlwatu RAMPAUBE dwade gwakdi, nah penui pelane hang hena tsai nsam di. Penuide lulwet tingdau, Barley mei luhlüt kendeu dau raitu benai ge gwak tsetdi.

10 Pecai Rizpah, Aiah napui, rosopai keulu delwe lamlwatu ketsai paaudung taiga mie pe ziemne kam lu, lulwet kerai gade gwang tinggim gade penui reu gage tingruigai cu kecang. Pa au tingba dau tinggim ruinedung nah tingmui dau renaam kaudung de peu ketsai paaudung de kebwak di ma. 11 Aiah napui Rizpah, Saul nauseupui teibam kecu de David dage pau cang gaibeu.

12 Cine David mie Saul radung nah pe napei Jonathan radung Jabesh Gileadme Beth Shan nam sum gade rega pwa di kecume dade keulu, Philistinme ne penaide gwak kedi gade, Saul de Gilboa gade Philistinme ne teitset kedicai. 13 David cika de Saul radung nah pe napei Jonathan radung keulu, nah penui mina hanghena gwaktset kedi radung de keu hekwa si lu. 14 Penui Saul nah pe napei Jonathan radung Benjamin me deudi Zela ga, pe pei Kish rau gage kungdi. Penui hegwangpei rang kebeudung teicang siak debeu. Pecai Tinggwang penui deu ziemne penui kekie teibeu.

15 Pecai Philistinme Israelme de ngngwa hereu tei dai cuhdi. Cine David pe reugwame de nzang nghung delwe Philistinme de regi. David hereu tei kecune pa leu sütdi. 16 Ishbi-Benob, pekau disüt kecume leuhme ge, pe ngei hetageu le tei kecuge, perüt shekel haicum ge nah pa au kingtie keheci ge pwa la David de teitset kera cet eh. 17 Dede Zeruiah napei Abishai ne David de kelilu, Philistinme de ngngwa regi delwe pecu teitset di. Pecai David minadung sampet eh pe dage ranggai eh, "Nang madaude anui de nzang hereu ga peu mie si lak ta, iciu de nang Israelme mitaubung tei mmüt dilak kerane."

18 Aipaucai iciu bam kecudau Gob ga Philistinme de ngngwa hereu tei cu dai di, cika Hushathitme Sibbekai Rephaim leuhme pei Saph de teitset di.* 19 Gob ga Philistinme de ngngwa hereu tei dai kecudau, Jair Bethlehemme pei napei Elhanan Gittitme pei Goliath de teitsetdi, pe ngeica deidakme deikim kenzwa ge. 20 Iciu kecudau hereu kedage Gath gade mipei ge pe ratie süt kecu kauge peba kenana ga pe zurang herok rok bam nah pepi kenana gade pe zurang herok rok pung, pelane ge ngkai eh mdai. Pa de Rephaim leuh gade lungh kegwang mege. 21 Pa Israelme de taksi gai ge Jonathan, David sinabe Shimeah napei ne pecu teitsetdi. 22 Aidung cai Gathme Rephaim leuhmedung, nah penui de David ba gade nah pe reugwamedung ba gade teitsetdi.