1 David pecu ngngwa kelame reugwamedung de peilu nah penui reuga kedime pecang nah kedime pehai kedetlu. 2 Pecai David reugwamedung de langgai, zicum gade zige Joab kangga, nah keda maa kecumbe cai Joab sinabe Zeruiah napei Abishai kangga, nah cude keda maa kecumbe Gittitme pei Ittai kangga. Hegwangpei reugwamedung dade rangdi, "Ih akatei de nnuide ngngwa mie kesang zie." 3 Dede penui rangdi, "Nang hereu ga mie kerabe ma, anui au pakdi lie de penui anui de ngaunggia lak mede anui pempie ge de tsaidi lie de penui ngaunggia lak lie. Dede nang au anui mina cang kerei ge swade yiki! Ciziemne nang namdi gade anuide kengha kera mtei kelube yiki zielie." 4 Cine hegwangpei penuide keligai, "Ih tei beuzie ma keheibe de nnui ziemne yitu kerabe." Hegwangpei namdi kirie ga saplu pe reugwamedung pelane kebam pehai nah pecang tet mpetdi. 5 Hegwangpei Joab, Abishai, nah Ittai de aja kaibeu eh ranggai, "A ziemne rehangbe Absalom dage kesia teigai so." Ge mina maa peciakne hegwangpei kedimedung de Absalom ha aipau aja de rang kecu siulu.

6 Cine reugwame renam lebie ga mie eh; hereu de Ephraim gung gade Israelme de ngngwa keregi. 7 Cikade Israel reugwame de David reugwamedung dwa gade ngamlu; cide ngam msia süt kedi, cipaunai mina cang ngkai gede teitsetdi. 8 Hereu de renam lebie pelane zang tetdi, nah mina kekiee ge hereu gade swade hegung gade tsai kieedi.

9 Absalom David reugwamedung kangge de redau kera gwang. Absalom pegu hekwen kehenabe teula, nah hekwen kenabe mhu bang kedi ge tsingkiakdung kekiee ge kangga nlüt ge, Absalom peu tsingkiak gage rapwadi. Pa hangdeu nah ting kakga hezu pwabam di nah pa hekwen nabe pak jüja tetdi. 10 Mige cide ngau eh Joab dage paubeu, "Pielo, Ih Absalom de mhu bang gage hezu pwa bam eh ngau lie!" 11 Joab mina de Absalom ha pecu paubeu kecube dage rangdi, "Ainie! Nang pecu ngauda! Daitei eh nang pecu hangdeu gage tei kau gaidi meno? Ih ne de ncu rangkanggeu kerei nah kiakang ge peu kera." 12 Joab dage keligai minabe, "Magade Ih rangkanggeu shekel cang ge ngau liede, Ih a ba hegwangpei napei dage hwacu gailak, kedanemene anui pelane hegwangpei n dage, Abishai nah Ittai dage aja kaikebeu de siuda, ‘Mide rehangbe Absalom de tung helo’ de ranggai. 13 Magade Ih kenret zierang tei eh a teilung kerehim gage kaidi cai (nah hegwangpei dade magede mbai kecu gah), nang acu gidi lubui." 14 Ge Joab rangdi, "Ih ncu kwa lakta." Cine Joab pe ba ga hengei kecum pwalu, nah pa ring eh mhu bang ga nzu kebamdau cidungde Absalom pe mlung gage kuigai. 15 Pecai Joab reunet pwa kela rehangme hang kerei Absalom de twagwalu, pecu tei, delwe pecu teitsetdi.

16 Pecai Joab telui kwa gai, nah Joab reugwame de ngngwa mtak kedine, reugwame Israelme de gwa zui kela gade cailigwang di. 17 Penui Absalom pau pwalu delwe hegung ga hekwaki kecuk ge gage pecu kelien gaidi; penui tangtsudung kekieege kangga gage pe pau kungdi, Israelme peciakne, mina pelane pe ki riep gage pakgai kedidau. 18 Cu Absalom, pa ring kebamdau, pe ziemne hegwangpei chabak gage tsusum kedige tei nzeu, kedanemene pa rangdi, "Ih a na tei ma a zi kaiteu lalu kera." Pa tsusum de pe zi cai leu eh msiaklu, nah cine henai kecang de cide Absalom de kensung bam de qula.

19 Pecai Zadok napei Ahimaaz rangdi, "Cu au acu peu RAMPAUBE dainzwa hegwangpei de pe ngauraume ba dade pecu kelilu dibi kecu samlia keyi teugwang lulo." 20 Joab pecu keligai, "Nang henai samlia keyi teu kegwangbe lak; tingba keda dau ne nang cide teilu maisia. Nang henai samlia gede teu tet lak kedanemene hegwangpei napei tsai dilu." 21 Pecai Joab Cushme pei dade rangdi, "Mie, nang kengau de hegwangpei dage ranglia lu." Cushme Joab de keumie eh pak tetdi. 22 Pecai Zadok napei Ahimaaz Joab dage rang dai, "Ma keheibe de teigwang liede, kehereide acu de peu pakmie Cushme pei caisui lo." Joab keligai, "Daitei nang pak neu no, a na, samlia de ziemne ziehi gede ncu pwapeu kelak ngau eh"? 23 "Keheitei liede," Ahimaaz rang eh, "Ih pak zie." Cine Joab pecu keligai, "Ciude miecu" debeu. Ge Ahimaaz langkie lampui ga pak kah gwangdi, ge Cushme de zuilu.

24 David rieki helungbe penai hegwabe kakga ntum bam. Reketbe kirieki taiga herieki peureu ga nghanglu delwe ngang cuh piegai. Pa piegai ge, pa mige pekatei pak eh gwang nna kela ngau. 25 Reketbe hegwangpei de sahbak delwe paubeu. Ge hegwangpei rangdi, "Magade pa pekatei lacai, pe mui ga samlia keyi bam da." Pak kelabe de gwang nna reureulu nah namdi taiga nnalu. 26 Pecai reketbe mi kedage pak kela ngau, nah pa kirie kekwabe de qulu; pa rangdi, "Pielo, cika mi kedage de pekatei pakla lie." Hegwangpei keligai, "Pa de samlia keyi teugwang lada." 27 Cine reketbe rangdi, "Mina dwaga pakla kecude Zadok napei Ahimaaz nzwa pakla kecu Ih cet." Hegwangpei keligai, "Pa au mina keyi nah samlia keyi teugwang la."

28 Pecai Ahimaaz hegwangpei de qugai nah rangdi, "Ma pelane yi dida". Pa pekatei hegwangpei dwaga pe zu hangdeu ga keumie lwe rang, "RAMPAUBE n Tinggwang de peu samlam punglo! Pa a mpaube hegwangpei de ngaurau eh penui ba hwacu kela minadung reu ngkieng kelu peuda" dedi. 29 Cine hegwangpei sam keli, "Rehangbe Absalom kwak la mi?" Ahimaaz keligai, "Hegwangpei kilabe, Joab acu lang kegaidau, Ih ma kebwak süt kecu ge ngau, dede cide daipai bi Ih ci lama." 30 Ge hegwangpei rangdi, "nreu gwanglu delwe aika saplu." Cine Ahimaaz nreu gwanglu, delwe saplu.

31 Pecai Cushme zette gwanglu delwe rangdi, "Samlia keyi ge a mpaube hegwangpei ziemne teugwang la, henai RAMPAUBE ncu ngaurau kelame pelane reu gade ngkieng kelu ncu peuda." 32 Ge hegwangpei Cushme dage rangdi, "Rehangbe Absalom kwak la mi?" Cushme pei de keligai, "A mpaube hegwangpei ngauraumedung, nah n dage kesia teigai kera ncu mlai kelame pelane de, peu cipau rehangbe dage teigai kedi nzwa teigai kerabe lie." 33 Pecai hegwangpei pe lung keherei sütdi, nah pa herieki reuga kilung ga nghang lwe hapdi. Pa kemie dau pa hapdi, "A napei Absalom, a napei, a napei Absalom! Ih n keleu gade Ih tsai lubui liecai, Absalom, a napei, a napei!"