1 Cinzwadi eh hegwangpei David pe hegwang kiga lungh kelucai, nah RAMPAUBE pecu twagwa kebam pe ngauraumedung pelane dade kemtak pwa kepeucai, 2 hegwangpei caihakecibe Nathan dage rangdi, "Ainie, Ih cedar le teikelu kiga lunghbam, dede Tinggwang samkakbung de au paiki sum ga bam." 3 Cidau Nathan hegwangpei dage rangdi, "Miecu, nang n lungning be teilu, kedanemene RAMPAUBE ncu ngngwa lalu." 4 Dede cipau ziu RAMPAUBE Nathan da gwang eh sam ranggai: 5 "Mie delwe a kilabe David dage ranglo, ‘RAMPAUBE ainzwa rangzeu: Nang a ziemne lungh kera ki teibeu zie ni? 6 Kedanemene Ih Israelme de Egypt gade ngngwa mpet kelu ting gade cu kecang heki ga lungh kemakne; meliene, Ih au paiki ge ga bam eh mbeuh pwala. 7 Ih Israelme pelane kakga ngngwa mbeuh kela heni pelane gade, Ih a mina Israelme de kekwa kedet kelu muiteume mige dade de Ih, "Daitei eh nnui acu cedar le ketei ki ge teibeu meno de eh mage de rang ni?"’ 8 Cu cine, a kilabe David da ranglo, ‘Ainzwa reugwame reu RAMPAUBE rangzeu: Ih ncu renaam gade ngngwalu, meuründung cai sui kela gade, ciu eh nang a mina Israelme reu kedi teilu kerane. 9 Nang kemie leune ga Ih ncu ngngwa la. Ih n dwade n ngauraume pelane de ngkap dida. Cu au Ih n zi tei mdi beuzie, kideu ga mina ditume zidung nzwa. 10 Ih a mina Israelme ziemne heni ge kedet luzie nah penuide peu cika lungh zie, ciu eh penuikatei penui deu ga lungh lu kerane nah mina ne teikeherei sita dilu kerane. Mina pe zai kesiame penui pedwa dau nzwa penui de teikeherei sita dizie, 11 Ih tutiakme de aja kai eh peu a minadung Israelme reu kedi ketei tingdau de teikeherei la kelade. Ih cu au n ngauraume pelane dade ncu kemtak peu zie. Ciu delwe, Ih, RAMPAUBE Ih nziemne ki ge teibeu zie lie n dage sampet gaila. 12 Nang n teilung ting cangdi de, nah n paume de ngngwa kung dide, Ih n leuhme gede n caiga teucuh beu zie, pa n pum gade lungh gwang zie, nah Ih pe hegwangram tei ngkieng beuzie. 13 Pa a zi ziemne ki ge tei beu zie, nah Ih pe hegwangram kedibam kelungta bam kera teibeu zie.✝ 14 Ih pe pei tei zie nah pa a napei tei zie. Pa kemaudung ketei dau, Ih pecu mina tuitie le nah mina pe na de kedap tsingria le ledeu zie. 15 Dede a samkakkelu samsang, Ih Saul n dwa gade keu mpet kedibe dade cide keu kedi de, pecu gidi lak. 16 N leuhme nah hegwangram de kelungta n dwa bammui zie. N hegwangbam de kelungta bam zie.’" 17 Nathan David dage marang delwe sam aidung de pelane pecu paulia beu, nah pa pecu marengei peciakne ha ranglia beudi.

18 Cidau hegwangpei David lütlu nah RAMPAUBE dwa ga bamlu delwe rangdi, "Ih cau no RAMPAUBE Tinggwang, nah a kelak dai no, nang aikenzwa kecang ga acu ngngwa beu kera? 19 Cu aide au n dwade ma keceu nage, RAMPAUBE Tinggwang. Nang n kilabe kelak gwang dai kera kekiee ge ha de rang gaida, nah gwang dai kera ceheudung acu keulia da, RAMPAUBE Tinggwang. 20 Ih David n dage daipai rang si lai no? Nang n kilabe de cila, RAMPAUBE Tinggwang. 21 N sam de ziemne, nah n katei n mariem de teilu kera ziemne, nang aipau kedi de teigai nah n kilabe de cide peu ciluda. 22 Cide ziemne nang au dizu, RAMPAUBE Tinggwang, kedanemene migede nang kenzwa gah, nah nang gwale Tinggwang keda gah, anui anuikatei anui kwen le siu kelu nzwa. 23 N mina Israelme nzwa daipai leuh gede bam no, kideu gade heleuh ge nang, Tinggwang, mie delwe nkatei n ziemne kelikelu? Nang aide teigai iciu eh penuide peu n mina n gu teilu kerane, n zi tei lu kerane, delwe n deu ziemne makedi nah mimakecang batadung teilu kerane. Nang heleuhdung de nah penui rabedung de n mina, nang Egypt gade kelikelume dwa gade gwa gidi. 24 Nang kelungta Israelme de n mina teiluda, nah nang, RAMPAUBE, penui Tinggwang dida. 25 Cu cine, RAMPAUBE Tinggwang, nang n kilabe nah pe kelak ziemne sampet kegai de kelungta teicang beula relie lo. Nang rang kebeu nzwa tei lulo. 26 Peu n zi kelungta di kelube tei lulo, ciu eh minadung, ‘Reugwame reu RAMPAUBE au Israel Tinggwang,’ de eh rang zie. Nah peu n kilabe David kediria de n dwa lamui lu. 27 Kedanemene nang, reugwame reu RAMPAUBE, Israel Tinggwang, nang n kilabe dage pecu ki teibeu zielie keulia gaida. Cide ziemne Ih, n kilabe, Ih ku eh n dade kiela. 28 Cu, RAMPAUBE Tinggwang, nang au Tinggwang; nah n samdung au nlum lubui, nah nang sampet keyi aide n kilabe dage teigai da. 29 Ciciucai cu, n kilabe kilungme de samlam beu kera peu n suiyi lulo, ciu eh cide n dwa gade kelungta peu bam jüja lu kerane. Kedanemene nang, RAMPAUBE Tinggwang, ma aidungde ranggai da, nah n samlam gade n kilabe leuhme de kelungta samlam pungzie."