1 David lamlwatu reu gade manage tet kahpet ge, Ziba Mephibosheth kilabe gada kena püt tei lwe ngngwa pecu redau; ci kena de reuga tangku kwak haina, kubetsi peu haige, tangzüttsi peu haige, nah teigeu zaula ge pungla. 2 Hegwangpei Ziba dade rangdi, "Nang ma aidungde daitei punggwang lano?" Ziba keli eh, "Gadhadung au hegwangpei kilungme de peu teu kerane, tangku nah tangzüttsi tangku be cai n minadung de peu tyei kerane nah zau au keheibede hetaideu gade leu kedime de peu sak kera lie." 3 Hegwangpei rangdi, "Ciucai n mpaube tsapei daiga bam no?" Ziba hegwangpei sam keli eh, "Pielo, Pa au Jerusalem pecai ga bam dida, kedanemene, pa rang eh, ‘Henai Israelme a pei hegwangram acu pwapeu zie.’" 4 Ge hegwangpei Ziba dage rangdi, "Mephibosheth gu leune cu au ngu dida." Ziba keli eh, "Hegwangpei, a mpaubo, Ih n da henah miela. Acu peu n miakngau gade n suiyibe tei kelube tei lulo!"

5 Hegwangpei David Bahurim ga gwang keludau, Saul tsame gade, cika de mige Gera napei pezi cai Shimei pecu redau kera tetpet. Pa tetpet eh pecu reset jüja eh tetla. 6 Pa David de nah hegwangpei kang kedime peciakne de tangtsudung sam, reugwame nah pumkwame hegwangpei hile nah zetle la liede. 7 Shimei pecu reset eh qugai, "Tetdi, aika de tetdi, kemau keteibe, nang mide dapketsetbe! 8 Saul kilungme pelane de teitset kedi ziemne RAMPAUBE n reuga saja peu bam dida, nang pe bam ga hegwang tei bam. RAMPAUBE hegwangram de n napei Absalom de pwapeu dida. Nang kap kera gwangla dida, nang au mide dapketsetbe kecune."

9 Ge Zeruiah napei Abishai, hegwangpei dage rangdi, "Daitei heteu ketsaibe aide de peu a mpaube hegwangpei de reset laino? Kehereide acu peu mie delwe pe peu dang dilo." 10 Dede hegwangpei rangdi, "Zeruiah namedung, Ih nnuide daipai tei laino? Pa acu reset bam au zie, kedanemene RAMPAUBE pe dade, ‘David de reset dilu’ de eh kerangne. Ciucai caune pecu ranglai no, ‘Nang daitei eh hegwangpei de reset bam no?’" 11 Cine David Abishai nah pe kilamedung pelane dage rangdi, "Ainie, a na, a pum gade mna kelu nade, acu teitsetdi lai eh bam dida, cine aipau Benjamin leuhme dai kenzwa gede cu acu tei ngkapdi neu bam reu no? Pecu kebwak helo delwe pecu peu reset bamlo, kedanemene RAMPAUBE ne cide reset kera pe dage aja kaibeu delu. 12 RAMPAUBE lungrei a reu gage kai kegai de ngaulu de cilak, delwe henai pa acu reset kela de ziemne makeyi pwapeu lubui." 13 Cine David nah pe minadung lampui ga pwa jüja la, cidau Shimei pe mbie ga lamlwatu ga tet hang jüja pecu reset nah tangtsudung nah tangdei pwa beulwa. 14 Pecai hegwangpei nah pecu ngngwa kelame pelane leudi, nah penui tingmui ziemne kemtak dau pa mtaklu.

15 Absalom nah Israelme pecu ngngwa kelame pelane cai, penui Jerusalem ga gwanglu, nah Ahithophel pecu ngngwa la. 16 Cinzwa eh David zangpei Arkitme Hushai Absalom da gwanglu ge, Hushai Absalom dage rangdi, "Hegwangpei ring ketiebe teilo! Hegwangpei ring ketiebe teilo!" 17 Absalom Hushai dade rangdi, "Aide n zangbe dage n masang de ni? Nang daitei pecu nzang mie me no?" 18 Hushai Absalom dage rangdi, "Ma! Cinzwa meliene, "RAMPAUBE ne nah mina aidungde ne nah Israelme pelane ne kedet kelube, cipau pei deda lie, Ih peda lamui zie, nah Ih pecu ngngwa bam zie. 19 Bamkap de, Ih dai kenzwame gwatei laino? Ih pe napei dwade hegwatei lak ni? Ih n pei dwa gade gwatei kecu nzwa eh, Ih n dwa gade gwatei zie."

20 Pecai Absalom, Ahithophel dage rangdi, "Anui daipai tei maisia bi anuide ranglia beulo." 21 Ahithophel Absalom de keli eh, "N pei hebaang naudung pa hegwangki rengei kera püt kenzeudung da miecu, nah Israel pelane nang n pei ngaurau teila kedi siu luzie. Pecai ncu ngngwa kelame pelane ba ngkieng luzie." 22 Cine penui Absalom ziemne hegwangki peureu gage paiki ge limlu, nah Absalom Israelme pelane miakngau gade pepei kila naudung da gwang di. 23 Cu Ahithophel keledeu sam pa cidau kepeu au mige pekatei Tinggwang mui gade siu kelu nzwa. Cinzwa eh Ahithophel rang kebeu sam pelane David penai Absalom hangnana ne nzuilu.