1 Cidau RAMPAUBE David dage Nathan de langgai. Pa peda gwang eh rangdi, "Piage namdi ge ga mipei hangna lungh bamla. Mipei hangge mahei nah kedabe maga. 2 Keheibe pei meuründung nah ketumdung kiee süt, 3 dede kegabe pei au meurün pui ket keceu nage gwale magede gah, pa cide luilu eh pepok tei nah ngkwet cuhlu. Cide pecu nah pe namedung de ngngwa eh lungh cuhlu. Meurünna de pecu ngngwa matyei nah pe piak gade de sak nsam la, nah cide pe ba ga zipla, nah pe dade pe napui nzwa. 4 Langnaige makeheibe pei da pe giame ge gwanglu, dede makeheibe pei de pe pok tei kerane ziemne pe kauhaudung nah ketumdung gade makaune ge de peu neu tadi. Meliene pa ma kegahbe pei gu meurünna de keulu delwe pe giabe ziemne cide lang beudi." 5 David makeheibe pei de pe rata sütdi, delwe pa Nathan dage pe rata süt gai, "RAMPAUBE ring kela nzwa, mina caube aikenzwa ta tei bi kecube de au ketsai gage kaidi kerabe nsam. 6 Pa meurünna pia mdai kieege peu dai maisia kedanemene pa cikenzwa ta tei kedine, delwe kedanemene pa ma kegahbe de ngaunggia kemakne."

7 Cidau Nathan David dage rangdi, "Nang mina cipaude da! RAMPAUBE, Israel Tinggwang, rangzeu, ‘Israelme reu hegwang tei kerane Ih ncu keniak luda, nah Ih ncu Saul ba gade kelibeu. 8 Ih ncu n mpaube ki peudi, nah n mpaube naudung de n ba gage kaibeu. Ih ncu Israel nah Judah ki peudi. Dede magade cide ceu ham dicai, Ih ma kedadung de kaisi eh ncu peu lubui lie. 9 Cine nang daitei RAMPAUBE ajadung mlai lano, pe miakngau gade daitei kesiabe tei dino? Nang Hittitme pei Uriah de kingtie le tei kaudi nah n nau teikera penau de lu teudi. Nang Ammon reugwame kingtie pwa pecu teitsetdi. 10 Cine cu kingtie madaude n ki püt lak, kedanemene nang acu masipei mene Hittitme pei Uriah nau de n nau tei kelune.’ 11 RAMPAUBE ranggai, ‘Pielo, Ih nkatei n ki gade ncu kekap teucuh beu zie da. N miak dwa gade, Ih n naudung de keulu eh n kidabe de peu dizie, nah ting baaha kecudau n naudung de pa ngngwa zeu zie. 12 Kedanemene nang n mau mbai eh teidi, dede Ih au Israelme pelane dwa gade ma aide tei zie, tingnaimiak kebaa gade.’" 13 Ciu eh David Nathan dade rangdi, "Ih RAMPAUBE dwa gade mau dida." Nathan David de keligai, "RAMPAUBE de n mau gibeu da. Ncu teitsetdi lak. 14 Ciuliede, nang heta aide gade RAMPAUBE de mlai kedine, hena ncu mna kebeu nade tsai bizie." 15 Pecai Nathan tetdi nah kilung gwang di.

Uriah nau ne David de mna kebeu nade de RAMPAUBE mcaudi, nah pa mra sütdi. 16 David pecai Tinggwang da henabe de ziemne kiebi di. David mmwang di nah kilung nlütlu delwe tingmuiziu pelane hangdeu ga zeudi. 17 Pe kiga hangkiamedung cuh lu eh petai ga sap bamdi, hangdeu gade pecu peu cuhlu kerane, dede pa cuh neu tadi, nah penuide ngngwa matyei tadi. 18 Cinzwadi eh hena nabe lang henane benai tsaidi. David kilamedung hena nabe tsaidi delie pe dage rang hingdi, kedanemene penui rangdi, "Pielo, hena nabe ring kebam dau anui pecu mpau da, nah pa anui kwa kingnei ma. Hena nabe tsaidi delie anui pe dage ranglia cai pa pekatei pecu dainzwa di laino?!" 19 Dede David pe kilamedung hangge dage ngkim resiu ncüt kebam ngau luge, David hena nabe tsaidi delie kecu ci di. Pa pe kilamedung dade rangdi, "Hena nabe tsaidi deni?" Penui keligai, "Pa tsai dida." 20 Ciu eh David hangdeu gade cuhlu nah pekatei duipia lu, pekatei maca pütlu delwe penia releu lu. Pa RAMPAUBE de kerecaki ga mie di delwe cika de reca lu, nah pecai pe hegwangki ga pa caili gwanglu. Pa kie kegaidau, penui taktyei pe dwa gage kaibeu, nah pa tyeilu. 21 Pecai pe kilamedung pe dade rangdi, "Daitei nang ainzwa tei dino? Nang mmwang nah hap hena nabe ziemne pa ring kebam dau, dede hena nabe tsai dige, nang cuhlu delwe matyei." 22 David keligai, "Hena nabe ring kebam dau Ih mmwang nah hap. Ih rangdi, ‘Cau ci lu lai RAMPAUBE acu ngia beu zie mi lak bi, hena nabe ring lu kera?’ 23 Dede cu au pa tsai dida, cine daitei Ih mmwang bam lai? Ih pecu keu cailigwang dailu bui ni? Ih peda mie zie, dede pa au ada cailigwang dai lak ta."

24 David pe nau Bathsheba lung teinciep lu, nah peda gwang eh pecu ngngwa zeudi. Pecai pa mipeina gede mna lu, nah henanabe zi Solomon msiaklu. RAMPAUBE pecu hung✝ 25 nah pa cairasam kecibe Nathan dage sam langgai eh pezi Jedidiah msiak lulo beu, kedanemene RAMPAUBE pecu hung kecune.

26 Cu au Joab Rabbah Ammonme de ngngwa regi, nah pa hegwang namdi de gwalu. 27 Cine Joab samgwame David dage langgai nah rangdi, "Ih Rabbah de ngngwa regi, nah Ih namdi dui kemzi de tui luda. 28 Cu ciziemne reugwame pelane de hekwalu nah maage tei eh namdi de tegwalu delwe cide tuilu, kedanemene magade Ih namdi de tuilu cai, cide a zi ga ladi zie." 29 Ciu eh David reugwame pelane de hekwalu eh Rabbah ga miedi; pa namdi de ngngwa regi nah cide tuilu. 30 David penui gwangpei peu gade hegwang peurwa keulu, cide kecak perüt talent ge, nah cika tangtsu pemi kehung gede la. Hegwang peurwa de David peu gage rwalu. Ciu eh pa namdi gade ma kekiee tui kelu pwa mpetlu. 31 Pa namdi ga kebam minadung de ngngwa mpetlu delwe penui kemei tei eh tsinggetdung, hegeu hepeidung, nah nreudung pwa eh peu heta tei; pa penuide peu tangtsu ta ketei ga liede heta tei. David Ammomme namdidung pelane de peu aipau ta de teilu. Pecai David nah reugwame pelane ngngwa Jerusalem ga cailigwang di.