1 Pecai Solomon Israel ga hangkiame, pautsa peumedung pelane, nah Israelme kelak muiteudung de Jerusalem ga pe dwa gage qu hekwa gailu, RAMPAUBE samkakbung de David namdi, zion gade pung gwanglu kerane.✝ 2 Israelme peidung pelane Ethanim bekei cide kei hena bekei, hengyi kecu ga Hegwangpei Solomon dwa ga gwang ngkwalu. 3 Israel ga hangkiame pelane de gwanglu, delwe cingkume samkakbung de pwalu. 4 Penui RAMPAUBE gu samkakbung de pwa gwang lu, nah ngkwa kera paiki nah paiki ga kebam kemci niadung pelane de. Cingkume nah Levime ne aidung de pwa gwang lu. 5 Hegwangpei Solomon nah Israelme ngkwa kebamme pelane samkakbung dwa ga gwang ngkwalu, meurün nah hetumseu peikap gai kelak ge ratak teigai eh. 6 Cingkume RAMPAUBE samkakbung de pebam ga, ge ki helungbe bung de ga, mci tube ni de gage pwa gwang gailu, Cherubim hesiu kang gage.✝ 7 Kedanemene cherub kena de penai hesiu samkakbung kai kebam ni ga kecang kezang pet, delwe samkakbung de nah samkakbung kepwa pakdung de halu. 8 Kepwa pakdung de au tie zu kecune petündung helungbe bung kemci ni gade ngaula, dede hegwale de au ngaula ma. Henai kecang de cidungde cika bamla. 9 Samkakbung de ga au Israelme Egypt gade kempet dau RAMPAUBE penui de ngngwa samkak kelu dau Moses ne Horeb gade tangtsukang kena cikage kekai de gwale magede gah. 10 Cinzwa eh cingkume kemci ni de gade mpet kedi dau, hemwa RAMPAUBE kerecaki de puidi. 11 Cingkume hemwa de ziemne penui ta teigai lakdi, kedanemene RAMPAUBE kendu de pe ki pui kedine.✝

12 Pecai Solomon rangdi,

"RAMPAUBE pa au

muiting kecu ga lungh zielie ranggai,

13 Dede Ih n ziemne

ki kedige tei luda,

peu ncu kelungta lungh kera heni ge." 14 Pecai hegwangpei nreu gwang Israelme pelane ngkwa kebamme de samlam beu, Israelme ngkwa kebamme pelane sap kebam dau. 15 Pa rangdi, "Peu RAMPAUBE Israel Tinggwang de hetwa pung kelube tei lulo, a pei David dage pa kerang teicang kebeube de, ainzwa ranggai, 16 ‘Ih a mina Israelme de Egypt gade ngngwa mpet kelu benai gade, Ih Israel leuhme pelane kakde namdi gede ki tei kerane kedetlu ma, peu a zi cika bamlu kerane. Ciuliede, Ih David de peu a mina Israelme reu hegwang tei kera kedetlu.’ 17 Cu apei David Israelme Tinggwang RAMPAUBE zi ziemne ki ge tei kera pe lungning. 18 Dede RAMPAUBE apei David dage ranggai, ‘Nang a zi ziemne ki ge tei zie lie nlung ga kebam de petau lie.✝ 19 Iciuliede nang ki de tei lak; dede, n napei, n dade lung gwang kerabe de ne a zi ziemne ki de tei zie.’ 20 Rampaube pa rang kecu de tei chang beu da, kedanemene Ih a pei David bam ga cu lu da, nah Ih Israelme hegwang bam ga Rampaube sampet kebeu nzwa Ih bam dida Ih Israelme Tinggwang Rampaube zi ziemne ki tei luda.✝

21 Ih Rampaube samkak kelu samkakbung de ziemne cika pebam mteilu da, pa anui peimedung de Egyptme deu gade ngngwa kempetdau samkak kebeude."

22 Solomon Rampaube de reca bam dwa ga nah Israel me ngkwa kebam pelane dwaga saplu, delwe pe ba tinggim lege hwa gailu. 23 Pa rangdi, "RAMPAUBE Israelme Tinggwang, nreule tinggim ga nah ngkangle hangdeu ga nang kelanzwa hera keda kette gah, n kilamedung penui lung pelane pwa n dwa gade tet gwang kelame de samkakkelu samsang de teibeu kelabe; 24 Nang a pei David dage sampet kebeude kai pwa bam kecune, yeo nang n mui le rang beu da nah n bale henai tei chang beu da. 25 Iciucai cu, RAMPAUBE Israel Tinggwang, n kilabe David a pei dage sampet kebeu de, nang, ‘Nang a dwa teune eh tet kegwang nzwa n leuhme a dwa tet gwang lucai, n leuhme migede au peu a dwa ga Israelme reu hegwang teila mui zie,’ de eh kerangde teicang beulo. 26 Iciucai cu, Israel Tinggwang n samde teicang beulo, n kilabe apei David dage nang rang kebeude.

27 Dede Tinggwang kideu ga lungh kesang lubui ni? Pielo, ting nah Tinggim pelane nang bamlu kerade au heni ceu, nah kerecaki aide Ih tei kelude au ciswade dai hiagede ceu no!✝ 28 Oh RAMPAUBO a Tinggwang n kilabe n dage henai kie nah mra kegai kekie de kingnei gailo kehereide. 29 Тingmui nah ting keba dau de kereca ki le bie n miak hwa kai bam lo, nang heni cide ziemne rang kebeu de nzwa, a zi nah Ih cika bam zi. Nkilabe aipau ni ga n cwalwe kie kecu kingnei lu kerane. 30 Cine kehereide n kilabe nah Israel n minadung aipau heni cide lam ncwa lwe kie kegai dau. Yeo, nang lungh kebam heni gade kingnei beulo, Tinggim gade nah nang kingnei kegai dau, kemau gilo. 31 Magade mige pe kidabe dage kemau teigai lie mmau eh sampet maisia dicai, nah pecu kerecaki recabam ga ngngwa kegwangdau pa mau melie sampet dicai, 32 Tinggim gade kingnei gai eh n kilame tu tiaklo, kemaube de n maudi delwe pa ngaulu kerabe nzwa eh kemaube de saja peulo. Delwe mau kemakbe de maume lie rang mcigi beulo, delwe pe kesamsang rehi gade pecu peulu.

33 N mina Israelme n dage kemau teigai eh penuide penui ngauraume ne ngam kedidau, magade penui n dade nreutetdi eh n zi gade cailigwang eh, n zi gade kemaupet lucai, kekie tei nah ngaungia n kerecaki aide gade kiecai, 34 tinggim gade kehereide n mina Israelme mau gi beu lo, delwe penui paume de peu kecube deu ga nzang gwang dai beulo.

35 N minadung n dage n dage kemau teigai kedi dau tinggim nkuidi nah tingrui tadi magade penui heni aide lam ncwalwe n zi gade kemaupet lucai nah penui mau gade nreu cailigwang lucai, nang penuide saja peu kegaidau, 36 iciu eh tinggim gade kingnei gailo. N kilame nah Israel n minamedung mau gi beulo. Penuide lampui keyi pwa kera ledeu kebeu dau. Tingrui n deu gage langgai beulo. Nang n minadung de gum kera pwa kepeu deu de ga.

37 Magade hangdeu aide ga herakum gwang cai, mede rapia rahim, meitsi pereugi, tangrim, nah tambeibedung gwang liecai, mede ngauraume penui deuga heriekidung gwa ketang cai, nah penui kakga rapia, teeikenei bam dicai, 38 nah n minadung Israelme pelane mede mi hang ge, pe mlung gade rapia aide ci eh pe ba hwa pwa reca ki le ge ncwa eh penui nggia kie nah kekie tei cai. 39 Iciu eh nang lungh kebam tinggim gade kingnei gailo, penui mau gi beulo, keheibe de de pa tei kegai rehi gade pe ziehi tei beulo, kedanemene nang rünne mina pelane lungning ci nah nang penui lungning ci kelane. 40 Aide tei gailo iciu de nang anui paume de kepeu deu dega penui teilungh lungh kebam tane ncu hing eh lungh luzie.

41 Cipau nreu de, sangme n minadung Israelme kemakme: penui n zi ziemne kemdei deudi gade gwang kecu dau, 42 Kedanemene penui n zi kedi, n ba hwa kegai, nah n kengkieng ha siu luzie, Penui kerecaki aide ncwa eh kekie tei kera gwang kecu dau, 43 Iciu eh nang lungh kebam tinggim gade kingnei gailo, delwe keheriede sangme n dage kie kegai de tei beulo. Ai nzwa tei gailo iciulu de kideu ga mina pelane nzi cilu zie nah ncu hing luzie, n minadung Israelme dage tei kegai nzwa eh. Iciude penui Ih kereca ki aide tei kelu au nzi ziemne lie kecu ci luzie.

44 Magade n minadung ngauraume de hereu tei kera kehei gade, nang ne penuide lang kegai ga mie cai, delwe Rampaube nang ne kedet kelu namdi, nah nzi ziemne kereca ki tei kelu le ncwa lwe penui n dage kekie tei lie cai. 45 Iciu eh penui kekie kwa tinggim gade kingnei gailo, nah penuide ngkiengkelu peulo.

46 Magade penui n dage kemau tei gaidi eh, kedanemene migede kemau tei kemak gah kedi dau, nang penuide n rata di delwe peu ngauraume ne penuide ngam lu eh penuide tuiteu eh penui deu kemdie mede kenna ga nzang mie dicai. 47 Dede magade penuide langgi kedi deu ga la lie kecu cilu cai, nah magade penui mau petlu nah penuide tuiteu la kecume deu gade n dage penui nggia kie cai. Magade penui rang eh, ‘anui petau kemakdung tei dida nah maudi delie. Anui bui kemak leu teidi delie delu cai.’ 48 Magade penuide tuiteu kela ngauraume deu gade penui keringria pelane nah penui mlung pelane teu nda cailigwang lucai, nah nang penui paume de pwa kepeu deu de gade, penui deu le nreu, nang ne kedet kelu namdi nah Ih n zi ziemne kereca ki tei pwa kebam lebie nreu lwe kie lie cai. 49 Iciu lu cai nang lungh kebam tinggim gade penui kekie nah ngha beulo kie bam kecu dung kingnei beu delwe penui ziemne petau be tei beulo. 50 N minadung n dage kemau leune tei kegai de ziemne penui mau gi beulo delwe penuide ngam kelumedung de peu penuide ngaungia lo. 51 Penui au n mina, nang ne kedet kelumedung, nang ne penuide Egypt ga hegeu reki kera ru kebam mimang sum kenzwa gade nzang mpet beu da. 52 N kilabe nah Israel n minadung kie kegai dau n miak mrak gailo, penui n dage keheidau de kengha kie kegai dau kingnei lu kerane. 53 Kedanemene kideu ga minadung kak gade n mina zie lie keu ntsam luda nah n sampetdung ngau lu kera Rampaubo nang ne anui peime de Egypt gade nzang mpet kecu dau n kilabe Moses dage rang kegaidung nzwa."

54 Cine Solomon RAMPAUBE dade kekie aidung pelane ziemne pe nggia kie cang dige, pa Rampaube recabam dwa gade, pa peba tinggim lege hwa gailwe koktung kebam gade cuhlu. 55 Pa saplu delwe Israelme ngkwa kebam pelane dage sahbak eh samlam beu eh, ranggai, 56 Peu Rampaube de twalu, Israel pe minadung de pa kemtak peu, pe samkakdung pelane teicang beu da. RAMPAUBE pe samkak keyidung de ket de tei zeu kedi tei mah Moses pe kilabe dage sampet kelu de. 57 Peu anui RAMPAUBE anui Tinggwang de anui da bam kelube teilo, pa anui paume de ngngwa kegwang nzwa. Peu pecu anuide madaude gidi mede pütti kedi tei so, 58 pe lungning teilu kera hengin de pecu peu anuide peulo, delwe pe ajadung, nah hezaidung pa anui paume de tei lulo kebeude nzwa. 59 Nah Ih sam teu RAMPAUBE dwa gade keumie kie kegai de, peu pedwa ga la muilu, tingmui, tingba, iciu de RAMPAUBE anui Tinggwang ne acu nah Israel n minadung de, langnai ramsangne teumai kesia rehi gade ngha beu zie. 60 Iciu eh kideu ga mina pelane de RAMPAUBE be au Tinggwang lie eh, nah hera keda kette ga lie kecu ci luzie.

61 Ciziemne peu anui RAMPAUBE Tinggwang dade masang lu delwe henai gade pe ajadung, nah hezaidung ga tet lulo.

62 Cine hegwangpei nah Israelme pelane pecu ngngwa Rampaube dage ratak reca teigai. 63 Solomon hetum seu cang ngkai eh kena nah meurün 120,000, nah kekangbau reca ratakdung Rampaube dage tei gailu. Cine hegwangpei nah Israelme pelane Rampaube kereca ki de teimci lu. 64 Cipau nai hegwangpei Rampaube kerecaki dwa ga kigu sum de tei mcilu, pa cika ge keru reca, mei reca, nah kekangbau recadung ca reca beulu kerane, kedanemene hetageu recabam Rampaube dwa ga kebam de au keru reca, mei reca nah kekangbau reca ca kepeu de ziemne ceu ham kedine. 65 Cine Solomon cipau ting ga hengyi ge lamlui gai nah Israelme pelane maadi, Hamath Lebo gade gwang Egyptme reuki kecang, Rampaube Tinggwang dwa gade lang hena ne nah lang hena ne ge dai eh pelane ziangreimdai ge hengyi. 66 Lang heset ne benai pa minadung de lang gidi, nah penui hegwangpei de samlam beu delwe penui sui keyile penuilung pui delwe penui ki cailigwangdi, kedanemene Rampaube au keyi leune pe kilabe David nah pe minadung Israelme dage teigai kecune.