1 Cine Solomon RAMPAUBE Kerecaki tei mdeulu. Aide Israelme Egyptme deu gade mpet kelu mmi 480 bekum, nah Solomon hegwang tei kelu mmi pe mdai bekum, Ziv bekei, cide keina bekei dau tei cuhlu. 2 Hegwangpei Solomon RAMPAUBE ziemne kerecaki ketei de cai petie cubit riakherok, pedi cubit ngkai, nah pehu cubit camrei.✝ 3 Kigu kerecaki bungdi dwaga kebam de petie cubit ngkai, aide kerecaki pedi penai nsam nah kerecaki dwa lebie cubit kerei ge cuk. 4 Ki de ziemne pa kebakidung pak pelung lebie swade hegwa lebie tei mrum ki. 5 Pebung bungdi tangdeudung de ga pa kibungdung tei twagwalu, hegwale nah pelung le bung kena na de tei twagwalu. Pa petu pelane ga kibungdung tei twagwalu. 6 Ngkang tube set de pedi cubit mengei, sumbe de pedi cubit herok, nah pe kecumbe de pedi cubit hena. Kedanemene pa tangdeu hegwale bie teitwa pet ki tei twagwa di, iciu eh hesumdung tangdeu gage kai mene teilu kerane. 7 Ki tangtsudung tsupang bam gade lamlui kelu dung le tei kecune ki tei bam kecu dau hegeuteisang, nreu mede hegeu niadung le tei bam kecu kwa kette siu mah. 8 Kerecaki tingbangle bie hangdeu nsam ga kimuiki ge tei pwa bam, pecai takswa ket sumbe set lebie hangbam, nah sumbe gade pekecumbe set ga. 9 Cine Solomon kerecaki teilu nah cide tei canglu, pa cedar tsing pakdung nah tsinglipdung le pwa ki koplu. 10 Pa helungbe bungdung gage kibungdung tei heswalu, petu leune pehu cubit mengei; aidungde ki gage cedar tsingdung le tei tamtuklu.

11 RAMPAUBE sam Solomon da gwang eh ranggai, 12 "Nang tei kebam aipau kerecaki de, magade nang a zaidung de mzai nah petaube tei, nah Ih a ajadung pelane tei mzai nah cidung mzui la lucai, iciu lucai Ih n pei David dage sampet kegai de n dage tei cang beuzie 13 Ih Israelme kakga lungzie nah penuide pütti lak."

14 Cine Solomon ki de teilu nah cide tei canglu.✝ 15 Pecai pa kilung lebie tangdeudung de cedar tsingpeidung le teilu. Ki pikam gade langkie kecang, pa tsing le pelung le gumlu, nah pa ki pikam helei tsingpei le tei gumlu. 16 Pa ki cai lebie ge kibung cubit ngkai ge cedar tsingpei le pikam gade langkiereu kecang teilu. Pa aipau bung ga pelungki lebie bung kera teilu, aide au mci tube ni, 17 Kibung mlangtube, cide kemci ni, mci tube ni dwaga kebam de cai petie cubit riakdai. 18 Ki lung lebie cedar le hela rehi nah mapa rehi nzwa heri pwabam. Pelungki ga pelane cedar le tei koplu. Pelungki ga tangtsu le tei pwa kebam de kette ngau ma. 19 Solomon kilung ga RAMPAUBE samkakbung kailu kerane helungbe kibung ge lamlui lu. 20 Helungbe kibung de petie cubit ngkai, pedi cubit ngkai nah pehu cubit ngkai. Solomon tangdeudung kecak kemci le kemailu nah recabam de cedar tsing le tei koplu. 21 Solomon kerecaki pelung lebie kecak kemci le kemailu, nah pa kecak geuriadung le helungbe bung dwa gage gwaklu delwe pedwa ga kecak le kemaidi. 22 Pa kerecaki lungle pelane kecak le kemai gwang canglu. Pa recabam pelane kibung helungbe ga kebam dede kecak le kemaidi.

23 Olivetsing le Solomon cherub kena teilu, cide ket pehu cubit kerei, helungbe bung ziemne. 24 Cherub keraibe hesiu de petie cubit mengei nah pe hesiu kedabe dede petie cubit mengei. Cine hesiu tün ge lam de kedabe hesiu tün kecang pe mdei cubit kerei. 25 Cherub kedabe de hesiu de cubit kerei tiege. Cherub kena nade perehi nah pe mdet nsam ram. 26 Cherub ket pe hu cubit kerei nah cherub kedabe dede pe hu nsam ram. 27 Solomon cherubim de sumtube bung gage kailu. Cherubim hesiu nzang pet hesiu ket lam bie tangdeu ket de tunglu nah kedabe cherub hesiu de tangdeu kedale tunglu. Penai hesiu mci tube bam sum gade keretung. 28 Solomon cherubim de kecak le kemailu.

29 Pa ki tangdeu pelane ga cherubim, laira bangdung nah mapa pa kebam miedung le pelungle nah hegwale bungdung pelane ga heri gailu. 30 Solomon hegwale nah helungle bungdung pikam de kecak le kemailu. 31 Solomon helungbe bung kimui ziemne Olivetsing le kikamdung teilu. Kikamtsiadung de pe set mengei bam. 32 Сine pa kikam kena olivetsing le teilu nah cipau kena gage pa cherubim, laira bangdung, nah mapa pa kebamdung mie heri gailu. Pa cidungde kecak le kemailu nah pa cherubim nah laira bangdung gage de kecak kemai gailu. 33 Ainzwa eh, Solomon kerecaki kimuiki olive tsing kikamtsiadung de set mdai bam eh teilu, 34 nah kikam kena cypress tsing le teilu. Kikam ket kehedip kena nah kikam kedabe de kehedip kena. 35 Pa cidungde gage cherubim, laira bangdung nah mapa pa kebam heri gailu, nah pa heri kelu de kecak le kemai nsamlu. 36 Pa kigu helungbe de tsu pang ria cum nah cedar tsing pak ria ge le teilu.

37 RAMPAUBE ki bangdwa mmi pe mdai bekum, Ziv bekei tei mdeu lu. 38 Mmi kereieket bekum, Bul bekei cide kei heset bekei, ki pelane riem kelu nzwa tei canglu. Solomon kerecaki mmi hena ge teidi.