1 David tsai kera ting nna kegwang dau, pa pe napei Solomon dage aja kai eh ranggai, 2 "Ih kideu ga pelane nzwa eh tsaidi lauda. Ciziemne, kuulu nah mipei mege nzwa bamlu. 3 RAMPAUBE n Tinggwang de nlumbeu dilu, Moses zai ga raupwa kelade nzwa, pe lampuidung ga tet kera, pe keledeu samdung mzai kera, pe ajadung, pa tei kera cet keludung, nah pe zaidung mzai kerane, iciu eh nang ketei leune ga nah nang kemie leune ga lung yilu kerane. 4 Iciude RAMPAUBE sampet pa a dage rang kegai de, ‘Magade n namedung penui lampui ga sünne eh tet lucai, a dwaga penui mlung pelane nah penui keringria pelane teu eh kesang gade tetlu kerane, Israel hegwangbam ga migede de peu n dade gahdi lak,’ de eh kerang de teibeu zie. 5 Zeruiah napei Joab ada ge tei kegai, nah pa Israel reugwamaa muibe kena de daitei dibi nang de cibam, Ner napei Abner dage, nah Jether napei Amasa, pa teitset kedi. Pa hereu ga kezuyi peei kelame jai teilwa di delwe hereu jai de pekia ga kiakang keu twagwalu nah pepi ga kebam picum ga. 6 Cine n maci gade bata tei gailu, dede nang peu pepeu kepu de ziune eh herau ga nghung diso. 7 Ciciuliede, Gileadme pei Barzillai de keku keu lialo, nah penuide peu n taktyei bam ga ngngwa matyei nsam lu: kedanemene aide: n sinabe Absalom zu gade pak kela dau penui atai ga gwanglu. 8 Ainie, Benjamin deu ga Bahurim nam gade Gera napei Shimei n lam bam. Ih Mahanaim ga kemie benai pa acu kehebwak reset teu acu reset sütgai. Dede pa acu Jordan ga redau kera nghung kecudau, Ih pedage RAMPAUBE zi teu a sampetgai, ‘Ih ncu peu kingtie gade tsai dilak.’ 9 Ciziemne cu nang pecu saja peu mene tadi so. Nang au ma kecime, nah cine nang pe dage dai teigai maisia bi ci luzie. Nang mi de peu pecu teitsetdi maisia." 10 Pecai David pe paume nzwa eh tsaidi nah David namdi gage kungdi. 11 David Israel reu hegwang tei kelu ting mmi riakdai di. Pa Hebron ga mmi hena hegwang teilu nah mmi camrei kecum Jerusalem ga hegwang tei. 12 Pecai Solomon pepei David hegwangbam leu lu, nah pe kengkieng teu ntipriep eh ndeu lu.

13 Cipaucai Haggith napei Adonijah Solomon pui Bathsheba da gwang. Pa rangdi, "Nang kezuyi teu eh gwang la mi?" Pa pesam keli eh, "Kezuyi teu gwang la," dedi. 14 Cipaucai pa rangdi, "Ih ndage mage rang kera bam lie." Cine pa sam keli eh, "Ranglu." 15 Adonijah rangdi, "Hegwangram au agu lie kecu nang cibam, nah Israelme pelane de Ih ne hegwang tei kera nlum bam. Dede maleune kedi dida, nah hegwangram de a sinabe de peu dida, cide RAMPAUBE dade gwang kecune. 16 Cu Ih ndade mage kie neula, a dwa gade nreu tetdi so." Bathsheba pe dage rangdi, "Ranglo." 17 Pa rangdi, "Kehereide hegwangpei Solomon de resiu beulo, kedanemene pa au nda de pe zu nreutet dilak lu, iciude pa Shunamme pui Abishag de peu anau tei kera acu peu beu de cilaklu." 18 Bathsheba rangdi, "Petau süt da, Ih hegwangpei de mpau beu zie." 19 Cine Bathsheba Adonijah ziemne mpau kerane hegwangpei Solomon da mie di. Hegwangpei pecu dau kerane cuhlu delwe pedwa ga koktung mielu. Cipaucai pa pe hegwangbam ga ntum di nah hegwangbam ga kebam de hegwangpei pui ziemne pwa gwanglu. Pa pe zetle ga bamlu. 20 Cipaucai pa rangdi, "Ih ndade makeceu kie neu lalie, nang a zu dwa gade nreu tetdi laklu." Hegwangpei pe sam keligai, "Apoi kie lulo, kedanemene Ih au n zu dwa gade nreu tetdi laklie." 21 Pa rangdi, "Peu Shunamme pui Abishag de n sinabe Adonijah de penau kera peulo." 22 Hegwangpei Solomon pepui dage sam keli eh rangdi, "Nang daitei Shunamme pui Abishag de Adonijah ziemne keteu lano? Daitei pe ziemne hegwangram ge de kie meno? Kedanemene pa au a swacingbe reulu, pe ziemne, cingkupei Abiathar ziemne, nah Zeruiah napei Joab ziemne?" 23 Cipaucai hegwangpei Solomon RAMPAUBE dage sampet gai eh rang, "Peu Tinggwang dede adage tei gailu, nah cirünne mene, magade Adonijah pe teilung ziemne sam cide rang mecai. 24 Ciziemne cu RAMPAUBE acu tei ngkiengbeu nah apei David hegwangbam ga peu bam kelube, nah pesampet kegai nzwa acu ki ge tei kebeube, ring kela zi gade Adonijah de peu henai teitsetdi zie." 25 Cine hegwangpei Solomon Jehoiada napei Benaiah de langgai, nah Benaiah Adonijah de ngaulu nah pecu ketsai gage kaidi. 26 Cipaucai cingkupei Abiathar hegwangpei dage rangdi, "Anathoth da mie cu, nkatei n luh ga. Nang au tsai lubui siak, dede henai pia Ih ncu ketsai gage kai dilak, kedanemene nang apei David dwa de RAMPAUBE Tinggwang Samkak bung pie kela nah a pei keherei kecu lampui leune ga kehereilu."* 27 Cine Solomon Abiathar de RAMPAUBE cingku gade keu mpet di, pecu peu RAMPAUBE sam tei canglu kera, Shiloh ga Eli ki de ziemne pa rang mting gai. 28 Cipau ha de Joab da gwang di, kedanemene, Joab Adonijah lampwa kecune, pa Absalom lam sap meliede. Cine Joab RAMPAUBE ramzeuki gade pak tetdi, nah recabam tudung ping lwe bamdi. 29 Joab ramzeuki gade pak lwe RAMPAUBE recabam taiga bam lie kecu hegwangpei Solomon dage paubeu. Cipaucai Solomon Jehoiada napei Benaiah de ainzwa ranggai eh langgai, "Mie, pecu teitsetdi." 30 Cine Benaiah RAMPAUBE gu ramzeuki ga gwang eh pecu rang, "Hegwangpei rang, ‘Mpet lu.’" Joab sam keli eh, "Lak Ih aika de tsai zie." Cine Benaiah hegwangpei da cailigwang eh rang, "Joab rang kecu pa recabam gade tsai neu lie rang." 31 Hegwangpei pe dage rangdi, "Pa kerang nzwa teilu. Pecu teitsetdi delwe pecu kungdi lu ciude nang keu tetdi lubui ada de nah apei ki gade Joab pekie kega gade pejai lwa kegai de. 32 Peu RAMPAUBE de peu pepeu gage pejai de cailigwanglu, kedanemene pa peswa samsang nah yiki kecume hangna de gwaketang delwe penaide kingtie le teitsetdi, Ner napei Abner, Israel reugwame kak de kedibe, nah Jether napei Amasa, Judah reugwame kak de kedibe, apei David de peu ci mene. 33 Cine peu penui jai, Joab peu ga nah pe leuhme peu ga peu kelungta caili gwanglu. Dede peu David nah pe leuhmedung nah peki ga, nah pe hegwangbam, de peu kelungta kezuyibe bam lu RAMPAUBE dade." 34 Cipaucai Jehoiada napei Benaiah nghang lwe Joab de gwaketang eh pecu teitsetdi. Pecu hetaideu ga pekatei peki gage kungdi. 35 Hegwangpei Jehoiada napei Benaiah de peu pe keleu gade reugwame reu teu kera kaidi, nah pa cingkupei Zadok de Abiathar bam gage kaidi. 36 Cipaucai hegwangpei Shimei de qu kera ziemne lang gai, nah pe dage rangdi, "Jerusalem gage nkatei nki ge teilu delwe cika lunghlu, nah cika de heni keda ga mie dai diso. 37 Kedanemene nang tetpet eh Kidron cabak kahpet kecu benai, nang tsai bi zielie kecu ci lulo. N jai de nkatei n peu ga gwang zie." 38 Cine Shimei hegwangpei dage rangdi, "Nang dai rang bi yi. A mpaube hegwangpei kerang de nzwa, cide n kilabe tei zie." Cine Shimei Jerusalem ga tingbazie kekiee ge lunghdi. 39 Dede mmi kecum cang di ge, Shimei kilabe hangna Maacah napei, Achish Gath hegwangpei dage pak gaidi. Cine penui Shimei dage ranggai, "Pielo, n kilabe Gath ga bam." 40 Cipaucai Shimei cuh, pe gada reu ga cwalu nah Achish Gath ga mie di pe kilabe de peei kera. Pa mie delwe Gath gade pe kilabe de ngngwa gwang dailu. 41 Shimei Jerusalem gade Gath ga mie lwe caili kegwang Solomon dage rang kegai dau, 42 Hegwangpei Shimei de qu kera ziemne lang gai, nah peda ge rangdi, "Ih ncu RAMPAUBE zi gade peu nsam pet gai meni, nda ge ainzwa rang eh, ‘Ci mci bamlu tingnai ge nang hegwale kepet benai, nah heni keda ga mie cai, nang tsai bi zie’? Cipaucai nang ada ge rangdi, ‘Nang kerang de au yi.’ 43 Ciucai daitei nang RAMPAUBE da n sampet kegai de nah Ih ncu aja kepeu de kaizeulu meno"? 44 Hegwangpei Shimei de rangsi eh, "Nang apei David dage heciem kesia leune tei kegai nang n mlung gade cibam. Ciziemne RAMPAUBE n ciem kesia de peu nkatei n peu ga gwang daizie. 45 Dede Hegwangpei Solomon de au samlam beuzie nah David hegwangbam au kelungta ndeu dizie RAMPAUBE dwa gade." 46 Cipaucai hegwangpei Jehoiada napei Benaiah dage aja kai gai. Pa mpet lwe Shimei de ketsai gage kaidi. Cine Solomon ba gade hezai be ntip riep eh ndeulu.