1 RAMPAUBE, Hanani napei Jehu dage Baasha de kemlai sam ranggai, 2 "Ih ncu rebui gade teucu beu nah ncu Israel a mina reu muiteu tei beu liede, Nang Jeroboam lampui ga tet dida nah Israel a mina de tei mmau dida, penui maudung de le a rata tei kera. 3 Pielo, Ih Baasha nah pe kelak biak gi cangsiak dizie nah Ih n kelak Jeroboam Nebat napei kelak nzwa tei dizie. 4 Baasha kelak leune namdi gade tsai kedime heteudung ne tyei luzie, nah luhdung gade tsai kedime leune de ting ruinedung ne tyei luzie." 5 Baasha ha kedabe dung ziemne, pa tei kegai, nah pe kengkieng, cidungde Israel ga hegwangme heta ketei hakwak gage rau mzeu melui ni? 6 Baasha pe paume nzwa eh tsaidi nah Tirzah gage kungdi, nah pe napei Elah ne pe bam leu eh hegwang teilu. 7 Cine Hanani napei caihakecibe Jehu RAMPAUBE sam Baasha nah pe kelak de kemlai sam ranggai, kedanemene pa RAMPAUBE miakngau gade kemau leune tei kedine, ciciu eh pe batadung le pe rata teidi, Jeroboam kelak nzwa, nah pa Jeroboam kelak pelane de teitset kedine.

8 Judah gwangpei Asa hegwang tei kelu mmi ngkai herok dau, Baasha napei Elah Tirzah ga Israel reu hegwang teilu; pa mmi kena hegwang tei. 9 Pe kilabe Zimri, pe bagidung pempie kangga kedime ge, pecu ngngwa kesia ciem peei di. Cu Elah Tirzah ga, Arza ki ga pekatei sak miee bamdi, pa au Tirzah ga ki mpaube. 10 Zimri lütlu, pecu gwaketang nah pecu teitsetdi, Judah gwangpei Asa mmi ngkaiehena dau, nah pe bam leu eh hegwang teilu. 11 Zimri hegwang teilu ge nah pe hegwangbam ga bam kelu dau, pa Baasha kilungme pelane de teitsetdi. Pa mi peina ge de Baasha kibaume lie de mede pe zangme de kering bang beu ma. 12 Cine Zimri Baasha kelak pelane ngkap di, RAMPAUBE sam rehi gade pa Jehu caihakecibe dage Baasha de kemlai rang kebeu de, 13 Penui Baasha maudung pelane nah pe napei Elah maudung tei kedi de ziemne, nah ci nzwa penui Israel de kemau gage ngngwa gai di, iciu eh penui penui mamiedung le RAMPAUBE, Israel Tinggwang rata teidi. 14 Elah ha kedabe dung ziemne, pa tei kegai pelane, cidung de Israel ga hegwangme heta ketei hakwak gage rau nzeu meni?

15 Judah gwangpei Asa mmi ngkaiehena bekum, Tirzah ga Zimri lang henane rünne hegwangtei. Cu reugwame Gibbethon ramzeuki ga bam, cide Philistinme deu. 16 Reugwame ramzeuki ga kebamme kerang de siu, "Zimri heciem riem lwe hegwangpei de teitset kedi." Cine cipau nai ramzeuki ga, Israelme pelane Omri, reugwamuibe, Israel reu hegwangpei lie eh sahdi. 17 Omri Gibbethon gade nghang delwe Israel pelane pecu ngngwa eh, penui Tirzah gwalu. 18 Cine, Zimri namdibe keuteu kedi ngaulu ge, pa hegwangpei ki kuda ncüt kebam ga nlütlu nah pe reu gage ki be ru gai; aiciu eh miheudung gade pa tsaidi. 19 Aide RAMPAUBE miakngau gade pa kemau tei eh tei mau kedidung ziemne, Jeroboam lampui de mzui eh pa kemau tei eh Israelme de kemau lampui gage ngngwa gai kedine. 20 Zimri ha kedabe dung ziemne au, nah pa heciem kesia riem eh tei kedi, cidung de Israel ga hegwangme heta ketei hakwak gage rau nzeu meni?

21 Pecai Israel ga mina de mzi pwa maa na teidi. Mina pempie ge Ginath napei Tibni caisui di, Pecu peu hegwang tei kera, nah pempie ge Omri caisuidi. 22 Dede mina Omri caisui kedime Ginath napei Tibni caisui kelame swa ngkieng. Cine Tibni tsaidi, nah Omri ne hegwang teidi. 23 Judah gwangpei Asa hegwang tei kelu mmi camrei ket bekum Omri Israel reu gwangpei teidi, nah pa mmi kereiekena hegwang tei. Pa Tirzah gade mmi herok hegwang tei. 24 Pa Samaria deutu de Shemer dade rangkanggeu talent kena le luilu. Pa namdi ge hangdeutu gage teilu delwe namdi de zi nda hangdeutu mpaube, Shemer zi leu eh Samaria de qulu. 25 Omri RAMPAUBE miakngau gade kemau teidi nah pe dwale lung kegwangme swa de kesia ta tei kieedi. 26 Kedanemene pa Nebat napei Jeroboam lampui leune mzui gwang nah pa kemau tei eh Israel de kemau gage ngngwa gaidi, iciu eh penui gu pemi kegah miedung de reca eh RAMPAUBE, Israel Tinggwang rata tei kedine. 27 Omri pa tei kegai ha kedabe dung ziemne, nah pe kengkieng pa keu kelia de, cidung de Israel ga hegwangme heta ketei hakwak gage rau mzeu melui ni? 28 Cine Omri pe paume nzwa eh tsaidi nah Samaria gage kungdi nah pe napei Ahab ne pebam leu eh hegwang teilu.

29 Judah gwangpei Asa hegwang teikelu mmi camreieheset bekum, Omri napei Ahab Israel reu hegwang teicuh di. Omri napei Ahab Samaria gade mmi ngkaiekena Israel reu hegwang tei. 30 Omri napei Ahab RAMPAUBE miakngau gade kemau teidi, pe dwa ga kegwangme pelane swa de kiee eh. 31 Ciu eh Ahab Nebat napei Jeroboam nzwa kemau tei kelu dele nnung lumah; cine pa Sidon ga hegwangpei Ethbaal, napui Jezebel de pe naulu, pa mie delwe Baal de reca nah pe dage keumie di.✝ 32 Pa Baal ki gade recabam ge Baal ziemne teilu, Pa Samaria ga tei kegai de. 33 Ahab Asherah mye gede teilu. Ahab RAMPAUBE, Israel Tinggwang rata tei kiee kidi, Pe dwale Israel gwangpeidung kegwang pelane swade pe rata tei kie gai kerane. 34 Ahab hegwang tingdau, Bethel ga Hiel ne Jericho retak dailu. Hiel namdi be bangdwa tsubam tei luge Abiram, pe napei cingtube tsaidi, nah Segub, Pe napei henatube, pe teilung gahdi pa namdibe heriekidung tei kebamdau, RAMPAUBE pe sam rehi gade Nun napei Joshua dage mrai rang kebeu de nzwa eh.✝