1 Tishbeme pei Elijah, Gilead deu ga Tishbe gade kegwangbe, Ahab dage rangdi, "RAMPAUBE Israelme Tinggwang ring kela zi gade, Ih pe gwa tei kelabe, Ih rang dai beu kemaktane aipau mmidung ga hezin keilak mede tingrui lak." 2 RAMPAUBE sam Elijah dage ainzwa ranggai, 3 "Aikade tet dilu nah naimiak kepetle mie; Jordan naimiak kepetle Kerith reuceuna taiga nkatei mbai lulo. 4 Cinzwa eh gwang nang reuceuna gade duisak luzie nah Ih tinggim ruinedung de ncu cika taktyei keugwang beu lulo ajah kai beu dida." 5 Cine Elijah mie eh RAMPAUBE sam kai kebeu nzwa teilu. Pa kerith reuceuna, Jordan naimiak kepetle kebam taiga mie lunghdi. 6 Tinggim ruinedung tingcang tangku nah heteikang pecu keugwang beu, nah tinghegi de tangku nah heteikang, nah reuceuna gade pa dui saklu. 7 Dede matie mene bamge reuceuna cipau deu ga tingrui beu kemakne cangdi.

8 RAMPAUBE sam peda, ainzwa rang gwang, 9 "Cuhlu, Zarephath ga mie cu, Sidon ga kebam nam de ga, nah cika lung cu. Pie lulo, cika Ih hemipui gede n puk tei beu lo eh aja kaibeu dida."✝ 10 Cine pa cuhlu eh Zarephath ga miedi, nah pa namdi rieki ga gwanglu ge, hemipui ge tsingdung nsui la eh ngaulu. Cine pa pecu qu gai eh rangdi, "Kehereide acu dui kecam na ge duipiak gage pwa gwang beulo iciu eh Ih sak kera." 11 Pa dui pwa kera tetpet la kecu dau pa pecu qulu, delwe rangdi, "Kehereide n ba gage tangku kwak nage de acu keu gwang beulo." 12 Pa keligai, "RAMPAUBE n Tinggwang ring kela zi gade, Ih au tangku ket te gah lie, dede tokkui bazum nage rünne hebiceu ga bam lie nah mabung ga maca ceuna ge gwale gah lie. Pielo, Ih tsing pak kena nsui lalie ciu eh Ih gwang eh cide Ih nah a napei ziemne langlu kerane, cide le anai taktyei kamtube dizie da, nah pecai au anai mzeu eh tsaidi zieda." 13 Elijah pedage rang eh, "Hing so. Mie delwe nang kerang dung tei lulo, dede a ziemne tangku ceu nage tei railu delwe acu keu pet beulo. Pecai ne n ziemne nah n napei ziemne kesa tei lulo." 14 Kedanemene RAMPAUBE, Israelme Tinggwang rangla, "Hebiceu de mta dilak mede maca bung ga maca lwa ta dilak, RAMPAUBE kideu gage tingrui langgai kemaktane." 15 Cine Elijah pecu rang kebeu nzwa pa teilu. Pa nah Elijah, pe kilungme de si eh zie kekiee ge matyei bamlu. 16 Hebiceu de mta dima, mede pe bung gade maca lwata dima, RAMPAUBE sam rang kebeu nzwa, Elijah dage rang kebeu nzwa.

17 Ma aidungde cai mipui, ki mpaube napei nra di. Pe mra ncuk süt kedine pe ngyi gahdi. 18 Cine pepui Elijah dage rang eh, "Tinggwang minabo, a reuga daipai ge n dade petau kemak ge bamno? Nang a taiga a mau nsung beu eh acu nah a napei de teitsetdi kerane gwang ni?" 19 Iciu eh Elijah pe dage keligai, "n napei de acu peulo." Pa mipeina de pe ba gade pwalu delwe pecu pwa pa kebam kibung ga nghanglu, iciu eh pa mipeina de pe zeu gage peu zeulu. 20 Pa RAMPAUBE dade sah delwe rangdi, "RAMPAUBO a Tinggwang, nang daitei eh Ih nzang kebam hemipui dage ngau kehing ai kenzwa tei no, pe napei de tei cetkedi?" 21 Pecai Elijah henabe reu ga pia cum pekatei kum pung gai; pa RAMPAUBE dage sahbak eh rangdi, "RAMPAUBO a Tinggwang, Ih n dade kiela, ngaungia eh aipau henanabe teilungh tei mring dai beulo." 22 RAMPAUBE Elijah kekie kingnei beu eh, henanabe teilung peda ring nli dailu nah pa yi dailu. 23 Elijah henanabe de pezeu bung gade pecu ngngwa mpet lwe nzang nghung, pepui de pwa beu eh, ranggai, "Pielo, n napei au ring di delie."✝ 24 Mipuibe Elijah dade, "Cu au Ih nang Tinggwang mina kecu, nah RAMPAUBE sam n mui gade kepet au kesang lie kecu Ih ci luda."