1 Ahab Jezebel dage mapelane Elijah tei kedi nah pa dainzwa caihakecimedung de kingtie le tei tsetdi bi kecu rangbeu. 2 Pecai Jezebel Elijah dage samgwabe langgai eh, ranggai, "Cine peu rabedung de acu tei tsetdi lu, nah cipaureu de, Ih magade n teilung cipau me hangge caihakecimedung tsai kedime teilung nzwa ncünne aipauting gage teilu mecai." 3 Elijah cide suilu ge, pa cuhlu delwe pe teilung ziemne pak tetdi nah Judah deu Beersheba ga gwanglu, delwe pe kilame de cikage kaizeudi. 4 Dede pa pekatei hetaideu ga langnai ge beuh zie rwa ladi delwe gwang tsingbang ge kangga ntum bamlu. Pa tsaidi kera pekatei pe ziemne kiedi, nah rangdi, "Cide yi da, cu, RAMPAUBE; a teilung keu dilu, kedanemene Ih au apeime tsaikedime swa de yiswa ma." 5 Cine pa tsingbang kang ga zeulwe zipdi. Zette samgwame pecu tunggai eh cu peda ranggai, "Cuhlu delwe matyeilu." 6 Elijah piegai, nah pe peu taiga tangku kwak tangtsu kelum gage rulwe nah dui bungge bam eh ngaulu. Cine pa tyei nah saklu delwe pecai zip daidi. 7 RAMPAUBE gwabe pia pekena be gwang dai delwe pecu tunggai nah rangdi, "Cuhlwe matyeilu, kedanemene hebeuhbe n ziemne reizu dizie lu." 8 Cine pa cuhlwe matyei nah saklu, nah pecu teingkieng kebeu taktyei cide ne tingmui tingbaa zie riakdai pa Horeb Tinggwang lamlwatu ga cang kemaktane. 9 Pa tsupop ga nlütlwe zipdi nah cika bamdi. Pecai RAMPAUBE sam peda gwang nah peda rangdi, "Nang aika dai tei au no, Elijah?"

10 Elijah keligai, "Ih RAMPAUBE, Reugwame reu Tinggwang ziemne a lung kaisüt eh pe ta teila, dede Israelmedung nnui samkakkelu de gikahdi, recabamdung nnui teimsiadi, nah n gu caihakecimedung de kingtie le teitsetdi. Cu Ih, Ih rünne dida nah penui a teilung de keu teudi kera tei bam dida." 11 RAMPAUBE keligai, "Hegwale petlu delwe hangdeutu reuga a dwaga saplu." Pecai RAMPAUBE ka gwang eh, nah tingkai chisüt kecu lang gai lamlwatudung nah tangtsudung teipangdi delwe teitakcaidi RAMPAUBE dwa gade, dede RAMPAUBE au tingkai ga lama. Pecai tingkai gui takedi cai, nlui teudi, dede RAMPAUBE nnui keteu ga lama. 12 Nnui teu kedicai mi gwangdi, dede RAMPAUBE au mi ga bam ma. Ge mi heu kedicai makwa ga nciep eh gwang 13 Elijah makwa siulu ge, pa pe paile pezu hezuilwe, hegwale pet, nah tsupop kimui ga saplu. Pecai makwa ge gwang eh pe dage rangdi, "Nang aika daipai tei au no, Elijah?" 14 Elijah keligai, "Ih RAMPAUBE, Kengking Tinggwang ziemne a lung kaisüt eh pe ta teila, dede Israelmedung nnui samkakkelu de gikahdi, nnui recabamdung teimsiadi, nah n gu caihakecimedung de kingtie le teitsetdi. Cu Ih, Ih rünne dida nah penui a teilungh keu teu kera tei bam dida."✝ 15 Pecai RAMPAUBE pe dage rangdi, "Mie cu, nang kegwang ga caili Damascus hetaideu ga, nah nang cika gwang lude nang Hazael de Aram reu hegwang tei kera keniaklu, 16 nah nang Nimshi napei Jehu de keniak luzie Israelme reu hegwang tei kerane, nah nang Abel Meholah gade kegwangbe Shaphat napei Elisha depeu caihakecibe tei eh n bam leulu kera keniaklu. 17 Cinzwa eh Hazael kingtie gade pak mbai kidime de Jehu ne teitsetdi zie, nah Jehu kingtie gade pak mbai kidime de Elisha ne teitsetdi zie. 18 Dede Ih peu aziemne mina cang hena de Israel ga peu lungh zie, Baal da koktungmie kemakme, nah pecu penui muile kemam kemakme de."

19 Cine Elijah cika de tetdi nah Shaphat napei Elisha de ngaulu, pa hetumseudung kereiekena de ngngwa lwe pe dwaga luh pubam, nah pa pekatei ne hetumseudung kereiekena de ngngwa lwe luh pubam. Elijah tetkah pet Elisha de pe pai gaulwe pecu bahbeu. 20 Pecai Elisha hetumdung de gidi eh Elijah cai paksui; pa rangdi, "Ngaungia eh peu acu apui penai apei depeu kemam gailo, nah Ih iciude n caisui luzie." Pecai Elijah pe dage rangdi, "Cailigwang cu, dede Ih n dage dai teigai bi cet gailo." 21 Cine Elisha caili tetdi Elijah dade nah hetumseudung ngwanggai keulu, makaunedung de teitsetlu, nah hetei de hetum ngwanggai tsing gade langlu. Pecai pa cide pwa minadung de peu nah penui tyeilu. Pecai pa cuhlwe, Elijah cai sui tetdi nah pecu kenghabe teidi.