1 Aram gwangpei Ben Hadad pe reugwame pelane de qu hekwalu. Cika hegwang keceu camreiekena pecu ngngwala, hekwendung nah bagidung. Pa nghang, Samaria de gwaketang nah ngngwa hereu teidi. 2 Pa samgwamedung de namdibe ga Israel gwangpei Ahab dage langgai, nah pedage rangdi, "Ben Hadad ainzwa rangzeu: 3 ‘Ngu rangkanggeu nah ngu kecak au agu. Nah n naudung nah n name, yitubedung de, cu agu dida.’" 4 Israel gwangpei keligai nah rangdi, "Cide nang kerang deda, a mpaubo kedibo, hegwangpei. Ih nah agu mapelane kebam ngu dida." 5 Samgwame cailigwang dai delwe rangdi, "Ben Hadad ainzwa rang zeu, ‘Ih sam n dage ranggai dida nang ngu rangkanggeu, ngu kecak, n naudung, nah n name acu habeu maisia. 6 Dede Ih ncünne aipauting ga a kilamedung de langgai zie, nah penui n ki nah n kilamedung kidung pei zie. Penui katei penui bale n dade makeheibe penui miak gade ngau keyibedung keuteu tet dizie.’" 7 Pecai Israel hegwangpei renam ga hangkiamedung pelane de qu hekwalu delwe rangdi, "Kehereide aide cilu delwe peilo mina aipaude dainzwa anuide ngkapdi ziebi peibam. Pa adage sam langgai ada de a naudung, a name, rangkanggeu, nah kecak keu kerane, nah Ih pecu kelidi ma." 8 Hangkiame pelane nah minadung pelane Ahab dage rangdi, "Pe sam kingnei so mede pa kekiedung de luu so." 9 Cine Ahab Ben Hadad samgwamedung dage rangdi, "Hegwangpei a mpaube kedibe da rang beulo, ‘Nang keraibe pia n kilabe de teilo eh lang kegai leune Ih mnie luda, dede pekenabe kie kegai aide au Ih mnie gai lakda.’" Cine samgwame tetdi nah Ben Hadad da sam aide teu cailigwang beu. 10 Pecai Ben Hadad pe sam keligai eh Ahab dage langgai, nah rangdi, "Peu rabedung de acu kedeu eh teitsetdi lu, magade Samaria ga acai suikelame pelane ziemne mimütdung (tambütdung) penui bazum nage lie de bam lie cai." 11 Israel gwangpei keligai nah rangdi, "Ben Hadad dage ranglo, ‘migede masangme au pe hereu nia kailwe hegie lama, dede pe hereu cai ne la lie.’" 12 Ben Hadad pa sakbam ge sam aide suilu, pa nah pekangga hegwangme penui paikidung ga kebamme. Ben Hadad pe minadung de ajah kaigai, "Hereu tei kerane nnui sapbialu." Cine penui hereu teikera penui de mteilu namdi de gwa kerane.

13 Pecai ainie, Israel gwangpei Ahab da caihakecibe gwang nah rangdi, "RAMPAUBE rang eh, ‘Nang reugwamaa kedi aide ngau mi? Pielo, Ih henai n ba gage kaibeu zie, nah nang cilu zie Ih au RAMPAUBE lie eh.’" 14 Ahab keligai, "Cau ne lai?" RAMPAUBE keligai nah rangdi, "Deuzi deuceudidung kangga reugwa rehangme kedime ge zie lie zeu lie." Pecai Ahab rangdi, "Caune hereu ndeu lai?" RAMPAUBE keligai, "Nang ne." 15 Pecai Ahab deuzi deuceudidung kangga reugwa rehangme kedime kebamdung de qu mpetlu. Penui pelane ge 232. Pecai pa Israel reugwame pelane de qu mpetlu, reugwame pelane ge cang hena. 16 Penui tingnari tet pet. Ben Hadad pa paiki ga pekatei sakmie lwe bam, pa nah hegwangme pecu kenghame mina camreiekena. 17 Deuzi deuceudidung kangga reugwa rehangme kedime kebamme tetpet railu. Pecai Ben Hadad ne lang kegai reketme gwang pe dage rangbeu, "Samaria gade reugwamaa ge gwang la delie eh." 18 Ben Hadad rangdi, "Penui kezuyi ziemne gwangla liede mede hereu ziemne liede, penuide mring tuilu." 19 Cine deuzi deuceudidung kangga reugwa rehangme kedimedung de tet pet railu namdi gade nah reugwame penui caisuilu. 20 Mina keheibe de pe ngauraube riep de teitsetdi. Aramme pak nah Israelme penuide gwaketang. Aram gwangpei Ben Hadad hekwen reu gade pakdi, hekwen keteume kangge de ngngwa eh. 21 Pecai Israel gwangpei tet mie hekwendung nah bagidung de gwaketang, delwe Aramme de teitset msia sütdi. 22 Cine caihakecibe Israel gwangpei da gwang nah peda rangdi, "Miecu, ncu tei ngkinglu, nah nang daitei ziebi kecu riam gaptelu kedanemene gwang dai kera mmi ga Aram gwangpei cailigwang eh ncu renia dai zielu." 23 Hegwangpei Aram kilame pe dage rangdi, "penui rabe au lamlwatudung rabe. Ciziemne penui au anui swa de ngking kie. Dede cu anui penui de ngngwa langkie gade regi zie da, nah anui penui swa de ngking ki lubi zie. 24 Cine nnui aide tei maisia da: Hegwangme pelane de penui kengking teu kebam gade keu mpetdilu delwe reugwa muibedung de peu penui bam leulu. 25 Reugwamaa ncuh lu nang reugwamaa ngkapkedi cikenzwa kiege, hekwen reu de hekwen nah bagi reu de bagi, iciu eh anui penuide hangdeu langkie gade regilu kerane. Iciucai anui penui swade ngking gwalu zie." Cine Ben Hadad penui kwa kingneilu nah penui dai rangbeu bi teilu. 26 Mmi keheci ndeukelu cai, Ben Hadad Aramme de ngkwalu delwe Israelme de regi kerane Aphek ga hangdi. 27 Israelme de qu hekwalu nah hereu tei kerane nia pwa penui de peu. Israelme penui de mcwa eh hemeuna haudung keceu kena nzwa ramzeuki teilu, dede Aramme langkie de pet puilu. 28 Pecai Tinggwang minabe gwang nnalu nah Israel gwangpei de mpau nah rangdi, "RAMPAUBE ranggai: ‘Kedanemene Aramme rangdi RAMPAUBE au hangdeutudung gu rabe, dede pa au langkamdung gu rabe au ma, Ih aipaudung gu reugwamaa kedi n ba gage kaibeu zie, nah nnui cilu zie Ih au RAMPAUBE lei eh.’" 29 Cine lang henane ziemne reugwamaadung ramzeuki teilwe hangge ge de mcwa bamdi. Pecai lang hena dige hereu ndeudi. Israelme ne mina 100,000 Aramme hepi le tet kelame de teitsetdi langniage gage. 30 Nah kedame Aphek gage pak kaidi, namdi ga, nah kirie be kaumie mina cang ngkaiehena bang kecume reu gage. Ben Hadad pakdi nah namdibe ga gwang kibung helungbe ga mbaidi. 31 Ben Hadad kilamedung pe dage rangdi, "Pielo cu, anui Israel kelak hegwangpeidung au mide ngau kenggia gwangpeidung lie siu. Ngaunggia eh peu anuide rosopai anui kia gage kailu nah heria anui ngwang gage kebiet lu nah anui peudung gage heria kebiet lwe eh, Israel gwangpei da peu mielo. Cinzwa eh pa n teilungh kelibeu de cilaklu." 32 Cine penui rosopai ncwa penui kia gage kailu nah penui peudung gage heria kebiet lu delwe Israel gwangpei da mie delwe rang eh, "N kilabe Ben Hadad ranggai, ‘Ngaungngia eh acu peu ringlo.’" Ahab rangdi, "Pa ring bam reu ni? Pa au a sinabe." 33 Cu minadung Ahab sam nking eh marehi kwa bam, cine penui zette pecu keligai, "Yeo, n sinabe Ben Hadad ring bam reu." Ge Ahab ranggai, "Mie delwe pecu ngngwa gwanglu." Pecai Ben Hadad peda gwanglu, nah Ahab peu pecu pegu bagi ga nghanglu. 34 Ben Hadad Ahab dage rangdi, "Ih namdidung a pei ne n pei dade keuteu kedi de ncu peu daizie, nah nang Damascus ga n ziemne helilaketei nidung tei lubui, a pei Samaria ga ketei nzwa." Ahab keligai, "Ih aipau samkak de teu eh peu ncu tet zie." Cine Ahab pecu ngngwa samkak teilu nah pecai peu pecu tetdi.

35 Nah mige, caihakecime namedung hangge, caihakecime hangge pecaisuibe dage rangdi RAMPAUBE sam gade, "Ngaunggia eh acu zum gailo." Dede mina be pecu zum lak liedi. 36 Pecai caihakecibe de keda caihakecibe dage rangdi, "Kedanemene nang RAMPAUBE sam mzailu kemakne, nang acu pütdi herizi, hingho ge ne ncu teitset dizie." Nah minabe pecu pütdi eh tetdi herizi, hingho pereu gwang eh pecu teitsetdi. 37 Pecai caihakecibe mina keda gede ngaudai delwe rangdi, "Ngaunggia eh acu zum gailo." Cine mina be pecu zumgai nah pecu rejamdi. 38 Cidau caihakecibe tetdi nah hegwangpei de lampui kung gade kwa bam; pa paile pemiak kanglu eh pekatei pecu teintsam pwabam. 39 Nah hegwangpei tetkah gwang ge, caihakecibe hegwangpei de qu mra gai nah rangdi, "N kilabe tingkelum hereu ga mie, nah reugwame ge mtaklu nah ada migede ngngwa gwang beu delwe rangdi, ‘Mina aipaude de kwalu. Pa magade gadi cai, nang pe teilungh ziemne n teilungh le pwapeu zie, mede rangkanggeu le nang mzwa maisia.’ 40 Dede kedanemene n kilabe luga aika mie nnang kebamne, minabe pakdi." Pecai Israel gwangpei pe dage rangdi, "Aide ngu saja zie da, nang nkatei tei kera cide tiaklu da." 41 Pecai caihakecibe zette pe miak reu kangteu kelade keugidi, nah Israel gwangpei pecu cilu caihakecime mi hangge lie eh. 42 Caihakecibe hegwangpei dage rangdi, "RAMPAUBE ranggai, ‘kedanemene nang peu n ba gade minabe de tet kedine Ih pecu teitsetdi kera kebambe de, n teilung pe teilung nding gade luzie, nah n minadung pe minadung dizie.’" 43 Cine Israel gwangpei pe kilung ga gwangdi pe lungkeherei nah perata eh, nah Samaria ga cailigwangdi.