1 Cu Hegwangpei Solomon sangme puidung kekieege de mraidi Pharaoh napuide desi eh, Moabme, Ammonme, Edomme, Sidonme, nah Hittitme puidungde de. 2 Penui au RAMPAUBE Israelme dage, "Nnui penui kak mie keleilüt lak, mede penui nnui kakga gwanglak, kedanemene penui nnui lung teu nreu pwa penui rabe dage kaidi zielu," de eh rang kebeu heleuhdung gade. Aja aide kaikebeu cia de, Solomon mrai kebam pui aidungde de pelung hungdi. 3 Solomon hegwang naudung hai hena nah nauseupuidung hai cum bam. Pe naudung ne pelung tei nreudi. 4 Kedanemene Solomon cingdi ge, pe naudung pe lung tei nreu pwa keda rabedung dage kaidi; pe lung pelane pwa RAMPAUBE pe Tinggwang dage kai mah, pe pei David nlung nzwalu tadi. 5 Kedanemene Solomon Ashtoreth caisuidi, Sidonme rabepui, nah pa Molech caisuidi, mi kengkau mamie ge Ammonme gu. 6 Solomon RAMPAUBE miak ngau ga petau kemak teidi; pa RAMPAUBE cai suicang luma pe pei David ketei nzwa. 7 Pecai Solomon Jerusalem kepetle bie hangdeutu reu gage, Moabme rabe kemneube Chemosh de nah Ammonme rabe Molech de reca kerane pa nlum kemakme reca ni ge mteilu. 8 Pa nlum kemak reca nidung teilu pe nau sangpuidung pelane ziemne de, caugame marim kehengui ru nah penui rabedung da ratak tei labi.

9 RAMPAUBE Solomon de pe ratadi, kedanemene pa pelung pe dade nreu tet kedine, Israelme Tinggwang, pa pecu piana lia gai liede 10 nah pecu aide ziemne aja kaigai, pa hera keda cai suilak lie kecu. Dede Solomon RAMPAUBE ajai kai kebeu de mzailu tadi. 11 Ciziemne RAMPAUBE Solomon dage rangdi, "Kedanemene nang aide tei kedine nah samkakkelu de gileu eh a zaidung nah Ih ncu ajah kai kebeudung mzailu ta kedine, Ih n dade hegwangram keugi bi dizie delwe n kilame de peu dizie. 12 Iciuliede, n pei David ziemne, Ih cide nang kelung tingdau teilak, dede Ih n napei ba gade keugi dizie. 13 Dede Ih hegwangram pelane keugi dilak; Ih heleuh ge n napei de peu zie David a gwa keteibe ziemne, nah Jerusalem ziemne, Ih ne kedet kelube."

14 Pecai RAMPAUBE Solomon de renia kerame ge de teu cuhlu, Edomme pei Hadad. Pa au Edom hegwang kilungme gade. 15 David Edom ga kela dau, Joab reugwame reu kedibe ketsaime de teu kung kera hang, Edom gade teitset kedi mina leude. 16 Joab nah Israelme pelane cika kei herok bamdi Edom ga mipeina pelane de pa teitsetdi kemaktane. 17 Dede Hadad de Edomme kedame de nzang eh pe pei gwa ketei mene Egypt gage ngngwa gaidi, kedanemene Hadad hena zeu reu kecune. 18 Penui Midian pütdi delwe Paran ga gwanglu, cikade penui minadung gede Egypt ga penui ngngwa mie, Egypt gwangpei Pharaoh da, pane heki nah hangdeu nah taktyei pecu peu. 19 Hadad de Pharaoh ngau pe suiyi sütdi, iciu eh Pharaoh pecu penau ge pwapeu, pe nau sinabe pui, Tahpenes hegwangpui sinabe pui de. 20 Tahpenes sinabepui Hadad de mipeina ge mna beu. Penui pezi Genubath msiaklu. Tahpenes pecu Pharaoh gwangki gade nkwet cuhlu. Cine Genubath Pharaoh gwangki ga lungh Pharaoh name kakga. 21 Pa Egypt ga kebam dau, Hadad siulu David pe paume de ngngwa mtakdi lie kecu nah Joab mina reu kedime keteume tsaidi lie kecu, Hadad Pharaoh dage rangdi, "Peu acu tetlo, ciu eh Ih akatei a ram ga gwanglu kerane." 22 Pecai Pharaoh pe dage rangdi, "Dede ada daige cangkemak teidi no, iciu eh nang cu n ram ga gwang kera kie kecu?" Hadad sam keligai, "Magede ma. Iciu liede ngaungia peu acu tetlo."

23 Tinggwang Solomon ziemne ngauraume kedage de de teucuh, Eliada napei Rezon, pe mpaube Hadadezer Zobah ga hegwangpei dade pak kedibe. 24 Rezon mipeidung pe ziemne teu hekwalu nah hemaa keceu reu kedibe tei, David Zobah mepeidung reu ngkieng kelu dau. Rezon mepeidung Damascus ga mie nah cika lungdi, nah Rezon Damascus de pe kangga kailu. 25 Pa au Israelme ngaurau Solomon tingdau, Hadad ne tei kebwak kecu ncüt eh. Rezon Israel de ngau nhet nah Aram reu kedi tei.

26 Pecai Nebat napei Jeroboam, Ephraim leuhme Zeredahme ge, Solomon kangga kedime ge, pepui zi cai Zeruah, pa au hemipui ge, pa hegwangpei de ngngwa renia. 27 Pa hegwangpei de ngngwa renia kedanemene Solomon Millo ga kebam nide teilu nah pe pei David namdi riedung de retak kecune. 28 Jeroboam au kuusüt kecu mina kengkieng mege. Solomon ngau kecu rehangpei de mri süt, cine pa pecu Joseph kilung ga heta pelane reu kengking peu. 29 Cidau, Jeroboam Jerusalem gwale tetpet kecudau, Shilonme caihakecibe Ahijah pecu lampuiki gade redaulu. Cu Ahijah penia keheci kailwe la nah luh ga penai katei la. 30 Pecai Ahijah penia keheci mcwa kelade kerak lu delwe cide hiet kereiekena teilu. 31 Pa Jeroboam dage rangdi, "Kerei keulu, kedanemene RAMPAUBE, Israel Tinggwang, ranggai, ‘Ainie, Ih hegwangram Solomon ba gade teurak dizie nah Ih heleuh kerei ncu peuzie 32 (dede Solomon da heleuh ket bamzie, a kilabe David ziemne nah Jerusalem ziemne, Ih Israelme leuhdung pelane kak de kedet kelu namdi de), 33 kedanemene penui acu gidi nah Ashtoreth Sidonme rabepui de reca, Chemosh Moabme rabe de, nah Molech Ammonme gu rabe de. Penui a lampui ga tetma, a miakngau gade daibe petau bi kecu tei kera, nah a samdung nah a zaidung mzai kera, pepei David ketei nzwa. 34 Iciuliede, Ih hegwangram pelane Solomon ba gade keuteu dilak. Meliene, Ih pecu pe teilung pelane hegwang tei kera teibeu, David a kilabe ziemne Ih ne kedet kelube, a ajadung nah a zaidung teimzai kelabe. 35 Dede Ih hegwangram pe name ba gade keuteu dizie nah Ih ncu pwa peu zie, heleuhdung kerei. 36 Ih heleuh ket Solomon napei de peuzie, iciude David a kilabe de peu a dwa bam muilu kerane Jerusalem ga, namdi cide Ih ne kedetlu a zi kai kera. 37 Ih ncu lulu zie, nah nang kedi teizie nang luneu kela leune teicang lu kerane, nah nang Israelme reu hegwang teizie. 38 Ih ncu aja kai kebeu leune mzai lucai, nah nang a lampui ga tetlu cai nah a miakngau gade petaube teilu cai, a zaidung nah a ajadung mzai kera, a kilabe David ketei nzwa, iciucai Ih ncu ngngwa lazie nah ncu ki ge teibi beuzie, Ih David ziemne tei kebeu nzwa, nah Israel de ncu pwa peuzie. 39 Ih David leuhmedung de saja peuzie, dede kelungta lak.’" 40 Cine Solomon Jeroboam de teitset kera teidi. Dede Jeroboam cuhlu nah Egypt gage pak gaidi, Egypt gwangpei Shishak da, nah pa Egypt ga Solomon tsai kemakta bamdi.

41 Nah ma keda Solomon ha, pa tei kegai leune nah pe maci, cidungde Solomon tei kedi hakwak ga rau nzeu meni? 42 Solomon mmi riakdai ge ziemne Jerusalem ga Israelme pelane reu hegwangtei. 43 Pa pe paume de ngngwa zeudi nah pe pei David namdi gage pecu kungdi. Rehoboam pe napei hegwang teidi pe keleu gade.