1 Mmi kecum ge Aram penai Israel kakga hereu tei mene gwanglu. 2 Pecai mmi pe kecumbe bekum, Judah hegwangpei Jehoshaphat, Israel hegwangpei da mie. 3 Cu Israelme gwangpei pe kilamedung dage rangdi, "Ramoth Gilead de anui gu lie kecu nnui cimi, dede Aram gwangpei dade anui cide luulu kera magede tei ma?" 4 Cine pa Jehoshaphat dage rangdi, "Nang acu Ramoth Gilead ga hereu tei kera ngngwa mie zie mi?" Jehoshaphat Israel gwangpei dage keligai, "Ih de nang nzwa da, a mina de n mina nzwa da, nah agu hekündung au ngu hekündung nzwa da." 5 Jehoshaphat Israel gwangpei dage rangdi, "Kehereide RAMPAUBE dade nang daipai tei rai maisiabi kecu keteu lulo." 6 Pecai Israel gwangpei caihakecimedung mina hai mdai de quhekwalu, delwe penui dage rangdi, "Ih Ramoth Gilead ga hereu tei kera mie zie mi, mi Ih mie lak no?" Penui rangdi, "Ketang lulo, kedanemene Rampaube hegwangpei dage kengking peu zie." 7 Dede Jehoshaphat rangdi, "Anui RAMPAUBE sui keteu lu kerane caihakecime aika keda gede gah de ni?" 8 Israel gwangpei Jehoshaphat dage rangdi, "RAMPAUBE sui peei lu kera mi hangge bamreu, Imlah napei Micaiah, dede Ih pecu ngkau kedanemene pa a ziemne caihasam keyi gede rang ma, dede makesia rünne." Dede Jehoshaphat rangdi, "Peu hegwangpei de cide rangso." 9 Pecai Israel gwangpei kedime gede qulu eh aja kaigai, "Cu gage Imlah napei Micaiah de ngngwa gwang." 10 Cu Israelme gwangpei Ahab nah Judahme gwangpei Jehoshaphat penai hegwang paini teu lwe Samaria rieki kelüt hecaipung gega hegwangbam ga bam, nah caihakecime pelane penai dwaga de caihasam rangbam. 11 Kenaanah napei Zedekiah pe ziemne hegeu kiidung teilu eh rangdi, "RAMPAUBE aide rangla: ‘Aramme de aidungde le nang regi zie penuide ngkapdi kemaktane.’" 12 Pecai caihakecime pelane de ainzwa kesiakke caihasam rang eh, "Ramoth Gilead de gwaketang lo nah ngkieng lulo, kedanemene RAMPAUBE hegwangpei ba gage peu dide lu."

13 Samgwabe Micaiah de qu zie lie mie kecube de pe dage, ranggai, "Cu ainie, caihakecimedung hegwangpei ngking lu kera sam rangbam. Kehereide nang de penui nzwa eh sam keyibe rangbeu lo." 14 Micaiah keligai, "RAMPAUBE ring kelabe zi gade, Ih RAMPAUBE acu rang lo kebeube rang zie." 15 Pa hegwangpei da gwang luge, hegwangpei pe da rangdi, "Micaiah, anui Ramoth Gilead ga hereu tei kera mie mi mie lak no?" Micaiah pecu keligai, "Gwaketang eh yilu. RAMPAUBE hegwangpei dage kengkieng peu zie." 16 Pecai hegwangpei pe dage rangdi, "Ih pia dai kieege ncu RAMPAUBE zi gade a dage kesangbe gwale ranglak lie kecu rangbeu maisia no?" 17 Cine Micaiah rangdi, "Ih Israelme pelane de meurün kekwabe kegah nzwa eh lamlwatudung ga zangra kela ngau, nah RAMPAUBE rangdi, ‘Aidungde da kekwabe gah. Peu mina pelane de helung nciep eh peki ga cailigwanglu.’" 18 Cine Israelme gwangpei Jehoshaphat dage rangdi, "Pa a ziemne makesiabe gwale ma keyibe caihasam rangla melie Ih ncu rangbeu meni?" 19 Pecai Micaiah rangdi, "Ciziemne RAMPAUBE sam de kingnei lu: Ih RAMPAUBE de pe hegwangbam ga kebam ngau, nah tinggim gwame pe pelane pe zetle nah pe hile sap bam. 20 RAMPAUBE rangdi, ‘Caune Ahab de cwa zie no, iciu eh peu pecu mie delwe Ramoth Gilead gade kaulu kera?’ Penui mi kangge aide rangdi nah kedame keda ge rangdi. 21 Pecai rabe ge RAMPAUBE dwa ga tetpet saplu eh rangdi, ‘Ih ne pecu cwa zie.’ RAMPAUBE pe da rangdi, ‘Dainzwa?’ 22 Rabe keligai, ‘Ih mie zie nah peu pe caihakecime pelane de kenret rang zie.’ RAMPAUBE keligai, ‘Nang pecu cwa zie, nah nang ngking lu zie. Cu miecu nah cinzwa tei cu.’ 23 Cu pielo, Rampaube kenret rabe n caihakecime aidungde pelane dage kaigai dida, nah Rampaube n ziemne kengkap gwang kera aja kaigai dida."

24 Pecai Kenaanah napei Zedekiah, gwang Micaiah de pezu gage kepeu, eh rangdi, "Dainzwa eh RAMPAUBE Rabe acu pütti eh nda gwang marang no?" 25 Micaiah rangdi, "Pielo, nang helungbe kibung ga nang mbai kera nlüt kecu benai ngaulu zie." 26 Israelme gwangpei pe kila dage rangdi, "Micaiah de tuilu nah pecu namdi ga kedibe Amon da nah a napei Joash da ngngwa miecu. 27 Pecu rangbeu lo, ‘Hegwangpei ne ranglie, aipau pei de de hebaangki ga kai lwe peu pecu tangku kecam nage nah dui kecam nage tyei nah sak lu, Ih kwak eh caili gwang kemaktane.’"✝ 28 Pecai Micaiah rangdi, "Nang kwak eh cailigwang lucai, RAMPAUBE adage maranggai meda." Pecai pa rang si eh, "Nnui mina pelane de, aide kingneilu."

29 Cine Ahab, Israel gwangpei, nah Jehoshaphat, Judah gwangpei, Ramoth Gilead ga mie. 30 Israel gwangpei Jehoshaphat dage rangdi, "Ih a rehi teitsam di eh hereu ga mie zie, dede nang au hegwang paini teu lu." Cine Israelme gwangpei pekatei pecu teintsam lu eh hereu ga miedi. 31 Aram gwangpei pe bagidung camreiekena reu kedime dage aja kaibeu, rang eh, "Israel gwangpei de gwale mi keda kedi keceu de ngngwa regi so." 32 Bagidung reu kedime Jehoshaphat de ngau kelu dau penui rangdi, "Cide Israel gwangpei bizie da." Penui pecu gwaketang kera nreu gwang, cine Jehoshaphat mra gai. 33 Bagidung reu muibedung pa Israel gwangpei melie kecu ci kelu dau, penui pecu gwa kecu gade nreu gwangdi. 34 Dede mige pe lakpi gaa gai mene kapgai nah Israel gwangpei Ahab de pe reugwa paini ntok kak gage kapdi. Pecai Ahab pe bagi keteube dage rangdi, "Nreu gwang lwe hereu gade acu ngngwa mpetti lu, kedanemene acu rejam msia sütti delu." 35 Cipaunai hereu tei mtei zu di nah hegwangpei Aramme lam nreu eh pe bagi ga bam. Pa tinghegi dau tsaidi. Pe rejam jam gade hejai lwa nghung bagi sing ga nghung cangdi. 36 Pecai tingnaimiak nlütdi kera tingdau ge reugwame pelane da aja gwang eh ranggai, "Mina pelane pe namdi rip ga cailigwanglu maisia; nah mina pelane de pe cuikui rip ga cailigwanglu maisia!"

37 Cine Hegwangpei Ahab tsaidi nah Samaria ga ngngwa gwangdi, nah penui pecu Samaria gage kungdi. 38 Penui bagi de Samaria jaai gade huidi, nah heteudung ne pe jai mniakdi (aide helipuidung duipia kecu bam), RAMPAUBE sam rang kebeu de nzwa eh. 39 Hegwangpei Ahab tei kegai kedadung, pa tei kegai leune, pa hepwangeu ki tei kegai de, nah pa namdidung tei kegai pelane, cidungde Israel gwangpeidung hakwak gage raupwa bam meluini? 40 Cine Ahab pe paume nzwa tsaidi, nah pe napei Ahaziah ne pebam leu eh hegwang teidi.

41 Pecai Israel gwangpei Ahab hegwang tei kelu mmi mdai bekum Asa napei Jehoshaphat Judah ga hegwang tei cuhdi. 42 Jehoshaphat hegwang teikelu dau pa mmi camreiemengei di, nah pa Jerusalem ga mmi ngkaiemengei hegwang tei. Pe pui zi cai Azubah, Shilhi napui. 43 Pa pe pei Asa lampuidung pwa eh lunggwang; pa cidungde gade tet nreu dima; pa RAMPAUBE dwa gade petau be teilu. Dede nlumkemak nidung keugi dima. Mina nlumkemak nidung gage ratakdung teigai nah kehengui ru züza bam. 44 Jehoshaphat Israel gwangpei de ngngwa kezuyi teilu.

45 Jehoshaphat tei kegai kedadung cai, nah pe kekuu keulia kegai, nah pe reutakdung, Judah gwangpeidung hakwak gage cidungde rau pwala meluini? 46 Pa pe pei Asa tingdau gade helipeidung bang kebam pelane de kerecaki gade gwa gidi. 47 Edom ga hegwang gede gah, dede hegwangpei keleu gade kenghabe ne cika kedi tei. 48 Jehoshaphat jaaidi ga kemie liemdung teilu; cidungde Ophir ga mie kecak pung kerane, dede cidungde mielu tadi kedanemene liemdung Ezion Geber gade sia kedine. 49 Pecai Ahab napei Ahaziah Jehoshaphat dage rangdi, "Peu liem ga a kilame de n kilame de ngngwa liem taulo." Dede cide Jehoshaphat mlaidi.

50 Jehoshaphat pe paume nzwa eh tsaidi delwe penuide pe paume nam David namdi gage kungdi, nah pe napei Jehoram ne pe bam leu eh hegwang teilu.

51 Judah gwangpei Jehoshaphat hegwang tei kelu mmi kereiehena bekum Ahab napei Ahaziah Israel reu hegwang teilu, nah pa Israel reu mmi kena hegwang tei. 52 Pa RAMPAUBE miakngau gade kemau ta teidi nah pe pei puisau, pe pui puisau, nah Nebat napei Jeroboam puisau de nzuidi, iciu eh Israel de kemau gage ngngwa gaidi. 53 Pa Baal gwa tei nah pecu reca cine pa pe pei tei kedi nzwa eh RAMPAUBE, Israel Tinggwang rata teidi.