1 Cu peting tie kemak cai, Jezreelmepei Naboth kubeluh Jezreel ga bamla, Samaria gwangpei, Ahab hegwangki taiga. 2 Naboth Ahab dage marang eh, ranggai, "Ngu kubeluh acu peulo, iciude Ih cide agu ginia gurie teilu kerane, kedanemene cide a hegwangki taiga bamlu. Cipau keleu, Ih ncu kubeluh ciswa keyi peuzie, mede, nang luneu cai, Ih cide mi keyi rangkang ncu peu zie." 3 Naboth keligai Ahab dage, "Ih a paume dade gumkelu de ncu peu kera RAMPAUBE kenei lie zeulie." 4 Cine Ahab pe hegwangki ga gwangdi nhet nah perata eh kedanemene Jezreelme pei Naboth pecu kelikegai de ziemne cidau pa rang eh, "Ih ncu a paume dade gumkelude peu lak." Pa pe zeu ga zeulu, pe zu nreulwe nah makeheibe taktyei tyei raudi. 5 Pe nau Jezebel pe da gwang nah pe da rangdi, "Daitei nang nlung sia au no, iciu eh nang matyei meno?" 6 Pa pe dage keligai, "Ih Jezreelme pei Naboth de mpau nah pe dage ranggai, ‘Acu zwa beulo ngu kubeluh, mede nang n sui liecai, Ih kubeluh kedage ncu ngu kera peuzie.’ Ge pa acu keligai, ‘Ih a kubeluh ncu peu lak.’" 7 Cine pe nau Jezebel pecu keli eh, "Nang Israel hegwangram reu cude hegwang tei bam meluini? Cuhlu nah matyeilu; nsui yilu. Ih nziemne Jezreelme pei Naboth gu kubeluh de luu beu zie." 8 Cine Jezebel Ahab zi gade laisiudung raulu, pe kaudap le cidungde daplu, delwe cidungde hangkiamedung dage nah keheimedung ngkwa kecu ga pecu ngngwa kebammedung dage, nah Naboth namdi taiga lungh kebammedung dage langgai. 9 Pa laisiu gage raugai, rang eh, "Kemmwang ting ge sahgailu nah Naboth de mina reu herüt peu lo. 10 Pecaide samsangkemak mipei hangna gede petai gage ngngwa gwang gailu nah peu penaide pecu kemmau zierang teilu, rang eh, ‘Nang Tinggwang nah hegwangpei de reset.’" Pecai pecu ngngwa mpetlu delwe pecu tangtsu le samtset dilu.

11 Cine pe namdi peimedung, hangkiamedung nah Naboth namdi ga keheime lung kebamme, Jezebel ne penui dage rangkebeu nzwa teilu, pa penui dage lang kegai laisiudung ga raupwa kegai caisui eh. 12 Penui kemmwang ting ge sahgai nah Naboth de mina reu de herüt pwa peu. 13 Samsangkemak mipei hangna de gwanglu nah Naboth taiga bamlu; mina dwa gade penai Naboth de kemmau zierang tei, rang eh, "Naboth Tinggwang nah hegwangpei penai de resetgai." Pecai penui pecu namdi gade ngngwa mpetlu nah pecu tangtsu le sam tsetdi. 14 Pecai hangkiamedung Jezebel dage sam langgai eh ranggai, "Naboth de tangtsu le sam dida nah tsaidi da." 15 Cine Jezebel Naboth de tangtsu le sam tsetti de lie kecu siu keludau, pa Ahab dage rang, "Cuhlu nah Jezreelme pei Naboth gu kubeluh de luulu, pa ncu rangkang le habeu kerau de, kedanemene Naboth ringbam meda, dede tsaidi da." 16 Naboth tsaidi delie kecu Ahab siu keludau, Jezreelme pei Naboth gu kubeluh ga mie kera pa cuhlu nah cide luulu kerane.

17 Pecai RAMPAUBE sam Tishbeme Elijah da gwang eh, ranggai, 18 "Cuhlu nah mie Israel gwangpei Ahab de redaulu, Samaria ga lungh kebambe de. Pa Naboth kubeluh ga bam, pa cide gumlu kera kemie dega. 19 Nang pecu mpaubi maisia nah rang beulu Rampaube rangkecu, ‘Nang mide teitset ni nah mabam de luusi ni?’ Pecai nang pecu rangbeu zie RAMPAUBE rang kecu, ‘Heteudung ne Naboth jai mniak kecu bam gade, heteudung n jai mniak zie, yeo, n jai.’" 20 Ahab Elijah dage rangdi, "Nang acu peeilu deni, a ngauraubo?" Elijah keligai, "Ih ncu peeilu da, kedanemene nang RAMPAUBE dwa gade kemau tei kera gage nkatei ncu zwagai dida. 21 RAMPAUBE ncu aide rang zeu: ‘Pielo, Ih kengkap nda keu gwang zie nah ngkap zingdi zie nah Israel ga kebam mipeina leune nah hebaangme nah hebaang tei kemakme de n da peu bamta dizie. 22 Ih n kelak de Nebat napei Jeroboam kelak nzwa, nah Ahijah napei Baasha kelak nzwa tei beuzie, kedanemene nang a rata tei kedine nah Israel de kemau tei kera gage ngngwa gai kedine.’ 23 Rampaube Jezebel ziemne de ranggai, ‘Heteudung ne Jezebel de tyeilu zie, Jezreel kirie tai gade.’ 24 Keheibe de cau Ahab kibaume bi nah namdi gade tsaidi cai, heteudung ne tyei zie; nah ting ga nruinedung ne luh gade tsai kedime keheibe de tyei zie." 25 Ahab kenzwa migede gah, pekatei pecu zwa eh Rampaube dwa gade kemau tei kedi, pe nau Jezebel ne pelung teibeu eh kemau ketei. 26 Ahab pa mamiedung kereca caisui ketei gade kengkau batadung tei, Amoritme tei kedi leune nzwa, cipaume dungde Rampaube ne Israelme dwade gwadi.

27 Ahab sam aidungde siu kelu dau, pa peniadung teu hakdi nah rosopai keu ba lu nah mmwangdi, nah rosopai ga zeu nah pelung sia sütdi. 28 Pecai RAMPAUBE sam Tishbeme Elijah da gwang, rang eh, 29 "Ahab a dwa gade henamie kecu nang ngau mi? Pa a dwa gade henamie kegai ziemne, Ih pa kelung tingdau gwang lai kebam kengkap de teu gwangbeu lak; pe napei kelung tingdau gage Ih kengkap pe kibaume dage teu gwangbeu zie."