Isaías 13

1 Trom-eallach Bhàbiloin, a chunnaic Isaiah mac Amois.

2 Air sliabh àrd togaibh suas bratach; èighibh riu gu h-àrd; sìnibh ur làmh, a-chum gun tèid iad a-steach air geatachan nan uaislean.

3 Thug mi àithne dom dhaoine coisrigte: seadh, ghairm mi mo dhaoine treuna a-chum mo chorraich a chur an gnìomh; muinntir a tha a’ dèanamh luathghaire ann am mhòrachd.

4 Fuaim mòr-chuideachd anns na slèibhtean amhail sluagh mòr; fuaim luasgadh rìoghachdan chinneach air an cruinneachadh le chèile; tha Tighearna nan sluagh a’ deasachadh feachd a-chum catha.

5 Tha iad a’ teachd o thìr chèin, o iomall nan nèamhan, an Tighearna agus buill-airm a chorraich, a mhilleadh na tìre gu lèir.

6 Guilibh gu h-àrd, oir tha là an Tighearna dlùth; mar lèirsgrios on Uile-chumhachdach thig e.

7 Air an adhbhar sin lagaichear na h-uile làmhan, agus leaghaidh cridhe gach duine.

8 Agus bidh iad fo uamhas; nì piantan agus guinean greim orra; mar mhnaoi ri saothair cràidhear iad; seallaidh iad gach aon air a chèile le iongantas; mar lasraichean teine bidh an aodainn.

9 Feuch, tha là an Tighearna a’ teachd, garg le feirg agus le dian-chorraich, a chur na tìre fàs, agus a sgrios nan ciontach a-mach aisde.

10 Oir cha tabhair reultan nèimh agus a co-shoillse uapa an solas; bidh a’ ghrian air a dorchadadh na dol a-mach, agus cha toir a’ ghealach air a solas dealradh.

11 Agus dìolaidh mise air an t-saoghal an droch-bheairt, agus air na h-aingidh an euceart; agus cuiridh mi crìoch air àrdan nan uaibhreach, agus leagaidh mi sìos uaill nan uamhasach.

12 Nì mi duine nas luachmhoire na òr grinn; seadh duine na fìor òr na h-Ophir.

13 Uime sin luaisgidh mi na nèamhan, agus gluaisear an talamh as a àit, ann am feirg Tighearna nan sluagh, agus ann an là a dhian-chorraich.

14 Agus bidh iad mar earb air a ruagadh, agus mar threud chaorach nach eil neach a’ cuartachadh; tionndaidhidh iad gach aon a-chum a shluaigh fhèin; agus teichidh iad gach aon gu a dhùthaich fhèin.

15 Gach fear a ghlacar, sàthar troimhe e; agus na h-uile a dhlùth-leanas ri chèile, tuitidh iad leis a’ chlaidheamh.

16 Agus pronnar an naoidheanan fa chomhair an sùl; bidh an taighean air an creachadh, agus am mnathan air an èigneachadh.

17 Feuch, dùisgidh mi suas nan aghaidh na Medich, aig nach bi meas air airgead; agus airson òir, cha bhi suim aca dheth.

18 Pronnaidh am boghachan na h-òganaich, agus cha dèan iad iochd air toradh na bronn; cha ghabh an sùil truas de leanaban.

19 Agus bidh Bàbilon, maise nan rìoghachdan, glòir uaill nan Caldèanach, mar an lèirsgrios a thug Dia air Sòdom agus Gomorrah.

20 Chan àitichear gu bràth i, cha mhò a ghabhar còmhnaidh innte air feadh linn nan linn; cha suidhich an t-Arabach bùth an sin; cha mhò a nì buachaillean buaile an sin.

21 Ach gabhaidh fiadh-bheathaichean an fhàsaich còmhnaidh an sin; agus bidh an taighean làn de uamh-bheistean; agus gabhaidh na cailleachan-oidhche tàmh an sin, agus nì na gobhair fhiadhaich mire an sin.

22 Agus freagraidh na h-eòin fhiadhaich a chèile na lùchairtean, agus na dràgonan anns na seòmraichean aoibhinn, agus tha a h-àm am fagas, agus cha bhi a làithean air an sìneadh.