1 Sani Taminkunna Sali ye se, Isa ka a lɔn ko a la waati ra dafa ko a ye bɔ dunuɲa rɔ ka wa a Fa ma. Wo le rɔ a ta mɔɔ mɛn ye dunuɲa rɔ woilu diyara a yɛ a ka a kaninteya ba yiraka woilu la haan ka a dan natamin. 2 Wura fɛ dɔɔnninta le tɛrɛ. Ibulusa ra Isa janfa miriya don Simɔn Sikariyɔti dencɛ Judasi jusu rɔ. 3 Isa ka a lɔn ko a Fa ra fen bɛɛ karifa a la, ko a bɔni Alla le rɔ, ale kɔsɛla Alla le ma. 4 Wo rɔ a ka a lawuli tabali kunna, ka a la durikiba bɔ a kan na, ka funduni sidi a la. 5 A banni wo kɛla a ka ji kɛ yagbawara dɔ ka a la karandenilu sen mako damira, ka funduni sidinin ta ka ii sen matoto.

6 A se mɛn kɛra Simɔn Piyɛri ma, wo ka a fɔ a yɛ ko: «Maari, ile ri n sen mako wa?» 7 Isa ka a jabi: «N ye mɛn kɛla, i ma wo kɔrɔ lɔn sisɛn; i ri a ɲayen kɔfɛ.» 8 Piyɛri ka a fɔ a yɛ ko: «I ti n sen makola fewu!» Isa ka a jabi: «Na n ma i sen mako, lɔnbaya ti ile ni nde tɛma.» 9 Simɔn Piyɛri ka a fɔ a yɛ ko: «Maari, wo rɔ n sen kelen tɛ de, kɔni n bolo a ni n kun fanan!» 10 Isa ka a jabi: «Ni i ra ban i kola, i ma kan ka i ko wo kɔ fɔɔ i sen, i fari fan bɛɛ dahanin de. Aile fanan dahanin de, kɔni ai bɛɛ tɛ.» 11 (Baa a ka a lɔn ko mɛn kɛtɔ a janfala, wo le rɔ a ka a fɔ ko: «Ai bɛɛ dahanin tɛ.»)

12 A ban mɛn kɛla ii sen makola, a ka a la durikiba bila a kan na ka i sii tabali la. Wo rɔ a ka a fɔ ii yɛ ko: «Ai bɛɛ ka a lɔn n ka mɛn kɛ ai la wa? 13 Ai ye n kilila ko karanmɔɔ a ni Maari, ai jɔ le wo rɔ baa n ye wo le ri. 14 Ni n ka ai sen mako, nde ai la Maari a ni ai la karanmɔɔ, aile ka kan ka ai ɲɔɔn sen mako. 15 Ka a masɔrɔn n nɔ misali le yirakala ai la, ai ka kan ka kɛ ai jɛrɛ yɛ ɲa mɛn ma. 16 N ye tuɲa le fɔla ai yɛ ko: jɔn ti se warala a jɔntii ma, kelayala ti warala a talibidenba ma. 17 Ni ai ka ko ɲin lɔn ɲumala, duwawu ye ai yɛ ni ai ka a kɛ.

18 «N tɛ kumala ai bɛɛ yɛ; n ka a lɔn mɛn suwandinin n bolo. Kɔni fɔɔ sɛbɛli kuma wo ye dafa ko: ‹Mɔɔ mɛn ye n na buru dɔɔnna, wo tii ri n janfa.› 19 N ye a fɔla ai yɛ sisɛn sani wo ye kɛ waati mɛn, ni wo sera, ai ri lemɛniya n ma ko n ye ye. 20 N ye tuɲa le fɔla ai yɛ: ni mɔɔ mɔɔ ri sɔn n na karanden dɔ wo ra sɔn nde fanan dɔ, mɛn wa sɔn nde rɔ, wo ra sɔn n kelayaba rɔ.»

21 A banni wo fɔla, Isa sɔnɔmɛ yɛrɛyɛrɛra. A ka sereya ɲin bɔ ko: «N ye tuɲa le fɔla ai yɛ ko: ai tɛma mɔɔ kelen di n janfa.» 22 A la karandenilu ka i ɲɔɔn mafɛnɛ kelen kelen ɲa ma ko a ye kumala yon na ko rɔ. 23 A la karandenilu tɛma, mɛn duman a yɛ wo tɛrɛ ye Isa tɔrɔfɛ tabali la. 24 Simɔn Piyɛri ka a ɲa kadi a yɛ ko a ni Isa maɲininka a ye kumala mɛn na ko rɔ. 25 Karanden wo ka a madon Isa la ka a maɲininka a tolo kɔrɔ ko: «Maari, yon de wo tii ri?» 26 Isa ka a jabi: «N di buru kunkundun sun dɔɔnnin muran dɔ, n wa wo di mɛn ma, wo le n janfa la.» A bannin Isa ka buru kunkundun ta ka a sun ka a di Simɔn Sikariyɔti dencɛ Judasi ma. 27 Judasi ka buru wo masɔrɔn tuma mɛn na, Setana donda a jusu rɔ i kɔrɔ. Isa ka a fɔ a yɛ ko: «I ye mɛn kɛla, i ye kaliya wo kɛla.» 28 Kɔni mɛnilu siini tɛrɛ tabali la, woilu ma a lɔn a ye wo fɔla mɛn na. 29 Ikomin Judasi mɛn tɛrɛ ye wodi lamarala, doilu la miriya ko Isa nɔ a lawala sali dɔɔnnifen san diya le, wala ka wa fen doilu datala misikinanilu la. 30 Judasi ka buru kunkundun ta ka i bɔ ye i kɔrɔkɔrɔ. Su tun da ko.

31 A wa mɛn kɛra, Isa ka a fɔ ko: «Sisɛn, Mɔɔ Dencɛ ka a la gbiliya labɔ, Alla fanan ka a la gbiliya labɔ ale rɔ. 32 Ni Alla ka a la gbiliya labɔ ale rɔ, Alla fanan di a la gbiliya labɔ a jɛrɛ yɛ, a ri wo kɛ sisɛn. 33 Den mɛsɛnilu n ye ai fɛ waati nin ɲin dɔ. Ai ri n ɲinin, kɔni ikomin n da a fɔ Judiyailu yɛ ɲa mɛn ma: ‹N ye wala yɔrɔ mɛn, ai ti se wala ye.› N ye a fɔla ai fanan yɛ sisɛn.

34 «N ye jamarili kura le dila ai ma. Ai ye ai ɲɔɔn kanin. Ikomin ai diyara n yɛ ai fanan ye diya ai ɲɔɔn yɛ. 35 Wo le rɔ bɛɛ ri a lɔn ko n na karandenilu le ai ri, ni ai ka ai ɲɔɔn kanin.»

36 Simɔn Piyɛri ka a fɔ a yɛ ko: «Maari, i watɔ min?» Isa ka a jabi: «N ye wala yɔrɔ mɛn dɔ, i ti se wala ye sisɛn, kɔni waati natɔ i ri bila n kɔfɛ.» 37 Piyɛri ka a jabi: «Maari, nfenna n ti se bilala i kɔfɛ sisɛn? N di bɛn saya ma i la ko rɔ!» 38 Isa ka a jabi: «I ri sa n na ko rɔ wa? N ye tuɲa le fɔla i yɛ ko: sani dondon ye kasi tuma mɛn na i ri a fɔ fewu siɲa sawa ko i ma n lɔn!»