1 Isa ka a fɔ ko: «Ai jusu kana yɛrɛyɛrɛ. Ai ye la Alla la, ai ye la nde fanan na. 2 Sii diya siyaman ba le n Fa la bon na. Ni tuɲa tɛ, n di a fɔ ai yɛ, baa n ye wa ka sii diya rabɛn ai yɛ. 3 N wa sii diya rabɛn ai yɛ, n di na ka ai ta ka wa an ɲɔɔn fɛ, sani ai ri wa nde ye wala yɔrɔ mɛn dɔ. 4 Ai ka a lɔn n ye wala sila mɛn kan.»

5 Tomasi ka a fɔ ko: «Maari, an ma a lɔn i ye wala yɔrɔ mɛn dɔ. An ye sila wo lɔnna di?» 6 Isa ka a jabi: «Nde, n ye sila le ri, a ni tuɲa, a ni ɲenemaya. Mɔɔ ti se wala Fa ma, ni a ma se nde ma. 7 Ni ai ka n lɔn, ai ri n Fa fanan lɔn. Sisɛn ai ra a lɔn, ai ra a yen.»

8 Filipe ka a fɔ a yɛ ko: «Maari, Fa wo yiraka an na, wo ri se an wasala.» 9 Isa ka a jabi: «Filipe, a ra mɛn bakɛ an bɛɛ ye an ɲɔɔn fɛ, kɔni i ma n lɔn wa? Ni mɛn ka n yen, wo ra n Fa yen! Nfenna I ye a fɔla ko ‹Fa yiraka an na›? 10 I ma la a la ko n ye n Fa fɛ, Fa fanan ye n fɛ? N ye kuma mɛn fɔla, wo ti bɔla nde jɛrɛ rɔ de; n Fa mɛn ye nde fɛ wo ye a jɛrɛ la baara le kɛla. 11 Ai ye la n na, n ye n Fa fɛ, n Fa fanan ye n fɛ, ni wo tɛ ai ye la kɛwaliilu jɛrɛ la sereya la. 12 N ye tuɲa le fɔla ai yɛ ko: mɛn wa a lemɛniya la n dɔ wo ri n na baara kabannako fanan kɛ. A ri kabannako kɛ mɛn ka bon ka tamin n ta la ka a masɔrɔn n watɔ n Fa ma. 13 Ai wa foyi maɲininka n tɔɔ rɔ, n di wo kɛ, sa a ri n Fa la gbiliya yiraka nde la, nde mɛn ye a Dencɛ ri. 14 Ni ai ka fen fen maɲininka nde tɔɔ rɔ, n di wo kɛ.

15 «Ni ai ra n kanin, ai ri n na jamarili mira. 16 Wo rɔ nde ri n Fa madiya, a ni a ri Lalilila gbɛrɛ di ai ma mɛn di to ai fɛ habadan. 17 Lalilila wo ye Nii Sɛniman de ri mɛn ye tuɲa fɔla mɔɔilu yɛ. Dunuɲa mɔɔilu ti se a kɔrɔ ka a masɔrɔn a tɛ a yenna, a ma a lɔn. Kɔni ai ka a lɔn, ka a masɔrɔn a ye ai fɛ, a ri kɛ ai sɔnɔmɛ rɔ fanan.

18 «N ti nala ai bilala ikomin faratanin, kɔni n di n na ai ma. 19 A ti mɛn bakɛ, dunuɲa mɔɔilu ti nala n yenna butun, kɔni ai ri n yen. Ka a masɔrɔn n di ɲenemaya, ai fanan di ɲenemaya. 20 Ni wo lon sera, ai ri a ɲayen ko n ni n Fa ye n ɲɔɔn fɛ ikomin mɔɔ kelen, ko aile ni nde ye n ɲɔɔn fɛ ikomin mɔɔ kelen. 21 Mɔɔ mɛn ye sɔnna n na jamariliilu ma ka ii labato, wo tii le ye n kaninna. Mɔɔ mɛn wa n kanin, n Fa ri wo tii kanin. N fanan di a kanin ka n jɛrɛ yiraka a la.»

22 Juda, kɔni Judasi Sikariyɔti tɛ, wo ka a maɲininka ko: «Maari, nfenna i ri i yiraka an na, kɔni i tɛ i yiraka dunuɲa la wa?» 23 Isa ka a jabi: «Ni n diyara mɔɔ mɛn yɛ, wo tii ri n kumakan bonya. Wo tii ri diya n Fa fanan yɛ. An di na a ma, an di to a fɛ. 24 Kɔni ni n ma diya mɛn yɛ, wo ti nala n kumakan mirala. Ai ye kumakan mɛn namɛnna wo ma bɔ nde rɔ, kɔni n Fa mɛn ka n kelaya.

25 «N ye a bɛɛ fɔla ai yɛ, an ye an ɲɔɔn fɛ waati ɲin dɔ. 26 Kɔni, Lalilila, Nii Sɛniman, N Fa ye mɛn lanala n tɔɔ rɔ, wo ye ai karanna ko bɛɛ la, aile fanan hankili ri bila a rɔ n ka mɛn fɔ ai yɛ.

27 «N ye jususuma dila ai ma. Jususuma mɛn ye n dɔ, n ye wo ɲɔɔn dila ai ma. N tɛ ai dila ikomin dunuɲa ye a dila ɲa mɛn ma. Ai jusu kana yɛrɛyɛrɛ, ai jusu kana bɔ ka silan. 28 Ai ra a mɛn ko n ka mɛn fɔ ai yɛ ko: ‹N watɔ, n di n kɔsɛ ai ma fanan›. Ni n diyara ai yɛ ai tun di sɛwa, baa n watɔ n Fa ma, n Fa mɛn ka bon nde ko. 29 Nba, n ka wo fɔ ai yɛ sisɛn sani a ye kɛ, sa a wa kɛ tuma mɛn na, ai ri lemɛniya. 30 N ti nala kumala ai yɛ bakɛ wo kɔ, baa dunuɲa mansaden ye nala. A ti se nde la, 31 kɔni n Fa ka mɛn jamari n yɛ, n ye wo le labatola, sa dunuɲa mɔɔilu ri a lɔn ko n ye n Fa kaninna. Ai ye ai wuli, an ye bɔ yan.»