1 Awa, Isa ni a la karandenilu sudunyani Jerusalɛmu so la, ii sera Bɛtifase so kɔndɔ, ni a ye Olibiye Koyinkɛ ri. Ka ii to ye, Isa ka a la karanden mɔɔ fila kelaya. 2 A ka a fɔ ii yɛ ko: «So mɛsɛn mɛn ye an ɲɛfɛ wo ri, ai ye wa ye. Ai wa don so kɔndɔ, ai ri falimuso do sidinin yen i kɔrɔ. A den ye a dafɛ. Ai ye a fulɛn ka na ii ri yan. 3 Ni mɔɔ do ka ai maɲininka, ai ye wo tii jabi: ‹Maari le mako ye a la.› Wo tii ri a lana i kɔrɔ.» 4 Awa, ko woilu bɛɛ kɛni sa Maari la kuma ri kanbali, a ka mɛn don a la keladen fisamante da rɔ. Wo ka a fɔ ko:

5 «Ai ye a fɔ Siyonkailu yɛ ko:

‹Ai ye ai ɲa lɔ! Ai la mansa natɔ le ten.

A fanmajiini, a siini falimuso le kan.

Ɔɔn, a siini fali den kan, falimuso denni kɔnin.›»

6 Nba, karandenilu wara a kɛ ikomin Isa ka a fɔ ii yɛ ɲa mɛn ma. 7 Ii nara falimuso ni a den di. Ii ka ii la durukibailu la faliilu kɔ rɔ. Isa yɛlɛra ka a sii ii kan. 8 Jama siyaman ba ka ii la durukibailu fɛnsɛn sila kan Isa ɲɛfɛ. Doilu ka jiri bolon mɛsɛnilu tɛɛ ka woilu fɛnsɛn sila kan a ɲɛfɛ.* 9 Mɔɔ mɛnilu tɛrɛ ye Isa ɲɛfɛ, a ni mɛnilu tɛrɛ ye a kɔfɛ, woilu tɛrɛ ye ii kan ba labɔla ko:

«Tandoli ye kɛ mansa Dawuda dencɛ yɛ!

Mɛn ye nala Maari tɔɔ rɔ ten,

Alla ra ɲumaya kɛ wo yɛ.

Tandoli ye kɛ sankolo rɔ!»

10 Isa donda Jerusalɛmu tuma mɛn na, so bɛɛ lamaara. Mɔɔilu bɛɛ ka a fɔ ko: «Ee, yon de ɲin di ten?» 11 Jama ka ii jabi: «Keladen Isa le ɲin di, keladen fisamante mɛn ye bɔla Nasarɛti, Kalile mara rɔ.»

12 Awa, Isa donda Alla batobonba jin kɔndɔ. A ka jula ni sanninkɛla mɛnilu tɛrɛn Alla batobonba jin kɔndɔ ye, a ka woilu bɛɛ gbɛn ka ii labɔ ye. A ka wodifalennailu la tabaliilu labebe, ka kanba julailu la siifenilu fanan nabebe. 13 A ka a fɔ ye mɔɔilu yɛ ko: «A sɛbɛnin Alla la Kitabu kɔndɔ ko: ‹N na bon di kɛ Alla tara diya ri.› Kɔni ai ra a kɛ bɛnkaninnailu dokon diya ri.»

14 Ɲa funyenilu ni senkelenninilu ka ii madon Isa la Alla batobonba jin kɔndɔ ye. A ka woilu lakɛndɛya. 15 Sarakalasela kuntiiilu ni sariya karanmɔɔilu ka Isa la kabannako kɛniilu yen ye. Ii ka denni doilu fanan yen, mɛnilu tɛrɛ ye ii kan ba labɔla Alla batobonba jin kɔndɔ ye ko: «Tandoli ye kɛ mansa Dawuda dencɛ yɛ!» Wo rɔ, sarakalasela kuntiiilu ni sariya karanmɔɔilu mɔnɛra. 16 Ii ka a fɔ Isa yɛ ko: «I tolo ye denilu kan na wa?» Isa ka ii jabi: «Ɔɔn, n tolo ye a la. A ye di? Mɛn sɛbɛni Alla la kitabu kɔndɔ, ai ma wo karan fɔlɔ wa? A sɛbɛni ko:

‹Denninilu ni sinmindenilu ye i tandola,

baa i jɛrɛ ka tandoli kan wo don ii da rɔ.›»

17 Isa ka ii to ye ka wa. A bɔra so kɔndɔ ka wa su kɛ Betani.

18 Wo duu sa gbɛ, Isa wulira ka a kɔsɛ Jerusalɛmu. A watɔla, kɔnkɔ ka a mira. 19 A ka toroju do yen sila dala. A ka a madon a la ka a ragbɛ. Kɔni a ma toroden yen, fɔɔ fira gbansan. A ka a fɔ a yɛ ko: «I tɛna i den butun fewu!» Toroju jara i kɔrɔ ye. 20 Karandenilu ka wo yen tuma mɛn na, ii kabannakoyara. Ii ka a fɔ ko: «Ee, toroju ɲin jara di i kɔrɔ?» 21 Isa ka a fɔ ko: «N di tuɲa fɔ ai yɛ: ni lemɛniya ye ai rɔ, ni ai fanan ma sikasika, n ka mɛn kɛ toroju la ɲin di, ai ri se wo ɲɔɔn kɛla. Ka a la wo kan, ni ai ka a fɔ koyinkɛ ɲin yɛ ko: ‹I ye bɔ i nɔ rɔ ka wa be kɔɔji rɔ,› a ri kɛ ten. 22 Ni ai ka lemɛniya la Alla rɔ, ai wa fen fen ɲinin a fɛ, ai ri wo sɔrɔn.»

23 Isa wara don Alla batobonba jin kɔndɔ. Ka a to mɔɔilu karanna ye, sarakalasela kuntiiilu ni mɔɔbakɔrɔilu nara a tɛrɛn ye, ka a maɲininka ko: «I ye baara mɛn kɛla ɲin di, yon ka i lɔ wo la? I ye yon na se kɔrɔ?» 24 Isa ka ii jabi: «N fanan di ai maɲininka ko kelen ma. Ni ai ka n jabi, n di a fɔ ai yɛ mɛn ka n lɔ baara ɲin kɛla. 25 A ye di? Yon de ka Yaya lɔ mɔɔilu sunna ji rɔ? Alla le ka a lɔ wa, wala mɔɔilu?» Ii ka a fɔ i ɲɔɔn yɛ ko: «Ni an ka a fɔ ko Alla le ka Yaya lɔ, a ri a fɔ an yɛ ko: ‹Wo rɔ, nfenna ai ma la Yaya la kuma la?› 26 Kɔni an kana a fɔ ko: ‹Mɔɔilu le ka Yaya lɔ de!› An ye silan ii duɲa la, baa jama bɛɛ ye Yaya jatela keladen fisamante le ri.» 27 Wo rɔ, ii ka Isa jabi: «An ma a lɔn.» Isa fanan ka ii jabi: «Nba, ni wo le, n tɛna a fɔla ai yɛ mɛn ka n lɔ baara ɲin kɛla.

28 «Ai ye ai mirila di? Dencɛ fila tɛrɛ ye mɔɔbakɔrɔ do bolo. A ka a fɔ a dencɛ fɔlɔ yɛ ko: ‹N dencɛ, i ye wa baara kɛ rɛsɛnfɛ rɔ bi.› 29 Den ka a fɔ ko: ‹N ti nala wala.› Kɔni kɔfɛ, a nimisara. A wara rɛsɛnfɛ rɔ wo rɔ. 30 Mɔɔbakɔrɔ ka kuma kelen wo fɔ dencɛ filana yɛ. A ka a fɔ ko: ‹N fa, n di wa.› Kɔni a ma wa. 31 Wo dencɛ fila rɔ, ɲuman de ka a fa sawo kɛ?» Ii ka a fɔ ko: «Dencɛ fɔlɔ wo.» Isa ka a fɔ ko: «N di tuɲa fɔ ai yɛ: niisɔnkɔmiralailu ni sunkurunbailu ye donna ai ɲɛfɛ Alla la mansaya rɔ. 32 Baa Yaya nara ka telenbaya sila yiraka ai la, ai ma la ale la; kɔni niisɔnkɔmiralailu ni sunkurunbailu lara a la. Ai ka a yen ko ii lara Yaya la. Hali wo, ai ma nimisa kɔfɛ ka la ale la.

33 «Ai ye ai tolo malɔ kuma kɔrɔlama gbɛrɛ la. Lutii do ka rɛsɛnfɛ labɔ ka a laminin sansan na. A ka denka sen, mɛn di kɛ rɛsɛnji bɔ diya ri. A ka gbala mayɛlɛnin do fanan lɔ, mɛn di kɛ sɛnɛ kɔnɔgbɛn diya ri. A bannin wo bɛɛ la, a ka rɛsɛnfɛ karifa* sɛnɛkɛla doilu la. Wo kɔ rɔ, a wara taama rɔ. 34 Rɛsɛnden kadi waati sudunyara tuma mɛn na, a ka a la jɔnilu lawa sɛnɛkɛlailu tɛrɛn ye, ko ii ye a niiyɔrɔ di a ma rɛsɛnden kadiniilu rɔ. 35 Kɔni jɔnilu sera ye tuma mɛn na, sɛnɛkɛlailu ka ii mira. Ii ka do gbasi, ka dogbɛrɛ faa, ka dogbɛrɛ bon kabakudun la. 36 Nba, rɛsɛnfɛ tii ka jɔn gbɛrɛilu kelaya ikɔ tuun. Woilu ka siya tɛrɛ fɔlɔmantailu ri. Kɔni sɛnɛkɛlailu ka woilu fanan mira ikomin ii ka fɔlɔmantailu mira ɲa mɛn ma. 37 A laban, a ka a jɛrɛ dencɛ kelaya ii ma. A ka a fɔ ko: ‹Sɛnɛkɛlailu ri n dencɛ bonya.› 38 Kɔni sɛnɛkɛlailu ka dencɛ wo yen tuma mɛn na, ii ka a fɔ i ɲɔɔn yɛ ko: ‹Cɛtala le ɲin di. Ai ye na, an ye wa a faa ka a fa cɛ ta.› 39 Ii ka dencɛ wo mira, ka a lafili rɛsɛnfɛ kɔkan, ka a faa.

40 «A ye di? Lutii wa se rɛsɛnfɛ rɔ, a ri nfen de kɛ sɛnɛkɛlailu la?» 41 Ii ka a jabi: «A ri be mɔɔ juu woilu kan hinabaliya la ka ii halaki. Wo kɔ rɔ, a ri a la rɛsɛnfɛ karifa mɔɔ gbɛrɛilu la, mɛnilu ri a ta niiyɔrɔ di a ma rɛsɛndenilu kadi waati.» 42 Isa ka a fɔ ii yɛ ko: «Mɛn sɛbɛnin Alla la kitabu kɔndɔ, ai ma wo karan fɔlɔ wa? A sɛbɛnin ko:

‹Bon lɔlailu ka ii ban kabakudun mɛn dɔ,

wo le kɛra bon jusii kabakudun di.

Maari nɔ le wo ri.

A kɛra an ɲana kabannako ri.›»

43 «Wo le kosɔn, n di a fɔ ai yɛ ko Alla la mansaya ri ta ai bolo, ka di siya gbɛrɛ ma, mɛn di Alla la mansaya jiriden nawara. 44 Nba, mɔɔ mɛn wa be kaba wo kan wo ri rakadi, kɔni kaba wo wa be mɔɔ mɔɔ kan wo ri mɔɲɔnkɔ.» 45 Sarakalasela kuntiiilu ni Farisiilu ka kuma kɔrɔlama woilu mɛn tuma mɛn na, ii ka a ɲayen ko Isa kan iile ma. 46 Ii ka a ɲa ɲinin ka Isa mira. Kɔni ii silanda jama yɛ, baa mɔɔilu tɛrɛ ye Isa jatela keladen fisamante le ri.