1 Wo kɔ rɔ, Isa wara Jerusalɛmu Judiya la sali lon. 2 Jerusalɛmu dondiya yɔrɔ wo tɔɔ le ko Saa Donda, yɔrɔ wo tɔrɔfɛ, ji lamara diya do ye ye. Gba safa loolu fanan ye ji lamara diya tɔrɔfɛ. Heburuilu ye a kilila Bɛtisada. 3,4 Gba wo kɔrɔ jankarɔtɔilu siyaman lani ye, ɲa funyen wo, a ni mɛnilu fari fankelen faani a ma, a ni kɔrɔngbɔya jankarɔtɔ fanan.* 5 Cɛɛ do tɛrɛ ye ye, mɛn da san bisawa ni san seyin (38) kɛ jankarɔ rɔ. 6 Isa ka a lani yen. A ka a lɔn ko cɛɛ ma kɛndɛ kɛbi waati jan. A ka a maɲininka ko: «I ye a fɛ ka kɛndɛya wa?» 7 A ka Isa jabi: «N maari, mɔɔ tɛ n bolo ka n najii ji rɔ ji lamaa tuma. N wa kɛ wala ji ma, do ri jii ji rɔ n ɲɛ.» 8 Isa ka a jabi: «I lawuli! I ni la dɛbɛ ta ka i taama.» 9 I kɔrɔkɔrɔ cɛɛ kɛndɛyara. A ka a la dɛbɛ ta ka a taama. (Ko wo kɛra Ɲɔɲɔ Lon de rɔ.)

10 Wo rɔ, Judiyailu la ɲɛmɔɔilu ka a fɔ cɛɛ yɛ ko: «Bi le Ɲɔɲɔ Lon di! Ka a bɛn sariya ma, i kana i la dɛbɛ ta i bolo ten.» 11 A ka ii jabi: «Mɛn ka n nakɛndɛya, a ka a fɔ n yɛ ko: ‹I la dɛbɛ ta, ka i taama.›» 12 Mɔɔ woilu ka a maɲininka ko: «Cɛɛ yon ka a fɔ i yɛ ko: ‹I la dɛbɛ ta, ka i taama?›» 13 Kɔni cɛɛ mɛn ka lakɛndɛya, wo ma a lakɛndɛyaba tɔɔ lɔn. Isa tun da tunun a ma ye, baa jama tɛrɛ ka siya.

14 Kɔ fɛ, Isa ka cɛɛ wo yen Alla batobonba kɔndɔ ka a fɔ a yɛ ko: «I ɲa lɔ! I ra lakɛndɛya sisɛn. I ye hakɛ kɛ boloka fewu, sa ko gbɛrɛ kana i sɔrɔn, mɛn ka juu ka tamin jankarɔ wo kan.» 15 Cɛɛ wo bɔra ye ka wa a fɔ Judiyailu la ɲɛmɔɔilu yɛ ko Isa le ka a lakɛndɛya.

16 Wo le rɔ, ii wulira Isa tɔrɔla, baa a dorini tɛrɛ ko su woilu kɛla Ɲɔɲɔ Lon. 17 Kɔni Isa ka a fɔ ii yɛ ko: «N Fa ye baarala, haan sisɛn. N fanan ye baarala.» 18 Jabili wo kosɔn, Judiyailu la ɲɛmɔɔilu ka kɛ Isa faa ɲa ɲinin di ka tamin fɔlɔma kan. Baa ii ka a fɔ ko a ma Ɲɔɲɔ Lon bonya, ka a la wo kan fanan, a ka Alla kili ko a Fa, ka a jɛrɛ rakanya Alla ma.

19 Isa ka ii jabi: «N ye tuɲa le fɔla ai yɛ: Dencɛ ti se fosi kɛla a jɛrɛ yɛ. A ye Fa yenna mɛn kɛla a fanan ye wo la ɲɔɔn kɛla. Fa ye mɛn kɛla a Dencɛ fanan ye wo le kɛla. 20 Fa Dencɛ duman a yɛ. A ye fen bɛɛ ɲa yirakala a la, a ye mɛn kɛla. A ye ko bailu yirakala a la mɛn di ai kabannakoya. 21 Baa Fa ri sayabato lawuli, ka ɲenemaya di ii ma ɲa mɛn ma, wo ɲa kelen ma Dencɛ ye a fɛ ka ɲenemaya di mɛnilu ma, a ri wo di woilu ma. 22 Fa tɛ mɔɔ si la kiti tɛɛla, kɔni a ra kiti bɛɛ to a Dencɛ bolo, 23 sa mɔɔ bɛɛ ri Dencɛ wo bonya ikomin ii ye a Fa bonyala ɲa mɛn ma. Mɛn ma sɔn ka Dencɛ wo bonya, wo tii tɛ a Fa fanan bonyala, mɛn ka Dencɛ kelaya kɔnin.»

24 «N ye tuɲa le fɔla ai yɛ: ni mɔɔ ka n na kumakan namɛn, ka lemɛniya n kelayaba ma, wo tii ra ɲenemaya banbali sɔrɔn. Kiti ti nala bela wo tii kan, kɔni a ra bɔ saya rɔ ka don ɲenemaya rɔ. 25 N ye tuɲa le fɔla ai yɛ: waati ra se sisɛn sayabatɔilu ri Alla la Dencɛ la kumakan namɛn, a ni mɛnilu ka a kumakan namɛn woilu ri to ɲenemaya rɔ. 26 Baa Fa wo ye ɲenemaya tii ri ɲa mɛn ma, a ra a Dencɛ kɛ ɲenemaya tii ri ɲa kelen wo ma. 27 A ka kiti tɛɛ saratii di a Dencɛ ma, baa ale le Mɔɔ Dencɛ ri.

28 «Wo kana ai kabannakoya a la ko wo bɛɛ rɔ. Waati ye nala, sayabatɔ mɛn bɛɛ ye kaburu kɔndɔ, wo bɛɛ ri Mɔɔ Dencɛ kumakan namɛn. 29 Ii bɛɛ ri wuli ka bɔ kaburu kɔndɔ. Mɛnilu ka koɲuma kɛ, woilu ri ii wuli ka bɔ saya rɔ ka ɲenemaya banbali sɔrɔn. Mɛnilu ka kojuu kɛ, woilu ri bɔ kaburu rɔ ka wa kiti diya. Kiti ri be ii kan.

30 «N ti se fosi kɛla n jɛrɛ yɛ. N Fa ye mɛn fɔla n yɛ, n ye kiti tɛɛla ka bɛn wo le ma. N ye kiti wo tɛɛla telen de rɔ. Nba n ti ko kɛla mɛn duman n jɛrɛ yɛ, kɔni mɛn ka n kelaya n ye wo sawo le kɛla. 31 Ni n ye n jɛrɛ la sereya le ri, n ye mɛn fɔla wo tɛ jatela foyi ri. 32 Kɔni, dogbɛrɛ ye n na sereya ri, n ka a lɔn ko a ye sereya mɛn bɔla, wo ye tuɲa le ri. 33 Ai ka kelaya lawa Yaya ma, a ni a ka mɛn sereya ii ma, wo ye tuɲa le ri. 34 (Nde mako sa mɔɔ la ka kɛ n na sereya ri, kɔni n ye wo fɔla ka bɛn ai la kisi ko le ma.) 35 Yaya tɛrɛ ye le ikomin fitinna mɛlɛnnin, ka kɛnɛya labɔ. Ai sɔnda ka sɛwa a la kɛnɛya waati kundunnin wo la.

36 «Kɔni sereya gbɛrɛ ye nde bolo mɛn ka bon ka tamin Yaya ta la. Nba, baara mɛn donda n bolo n Fa bolo ko ka a kɛ, n na baara wo le ye n na sereya ri. Wo le ye yirakala ko n Fa le ka n nana. 37 N Fa mɛn ka n nana, wo fanan ye n na sereya le ri, kɔni ai tolo ma a la kumakan namɛn fɔlɔ fewu. Ai ɲa ma a ɲakɔrɔla yen fɔlɔ fewu. 38 Ai jusukun ma sɔn a la kuma ma, baa a ka mɛn kelaya, ai ma lemɛniya wo ma. 39 Ai ye kitabu sɛniman karanna ka ai miri ko ai ri ɲenemaya banbali sɔrɔn kuma wo rɔ. Kitabu sɛniman de ye n na sereya ri, 40 kɔni ai sa a fɛ ka na n ma ka ɲenemaya sɔrɔn.

41 «N ti natala mɔɔilu ko mɛnilu ye n tɔɔ ɲuma fɔla, 42 kɔni n ka ai bɛɛ lɔn, ko Alla la kaninteya tɛ ai jusu rɔ. 43 N da na n Fa tɔɔ rɔ, kɔni ai ti sɔnna n damirala. Ni mɔɔ gbɛrɛ nara a jɛrɛ tɔɔ rɔ, ai ri wo ramira. 44 Ka i ɲɔɔn tando, wo le duman ai yɛ. Kɔni tandoli mɛn di sɔrɔn Alla kelen pe fɛ, ai tɛ wo ɲininna. Ai ri se lemɛniyala wo rɔ di?

45 «Ai kana ai miri ko nde ri tɔɔ la ai la n Fa ɲakɔrɔ. Ai bɛɛ la landaɲa ye Musa mɛn dɔ, wo le ri tɔɔ la ai la. 46 Ni ai lara Musa la, ai tun di la nde fanan na, baa Musa ka n na ko sɛbɛ a la kitabu kɔndɔ. 47 Kɔni Musa ka mɛn sɛbɛ, ai ma la wo la. Awa ai ri se lala n na kumakan wo la wo rɔ wa?»