1 Wo taminnin kɔ, Isa tɛrɛ ye a mataamala Kalile yɔrɔ bɛɛ rɔ. A tɛrɛ sa a fɛ ka wa Jude mara rɔ ka a masɔrɔn Judiya ɲɛmɔɔilu tɛrɛ ye a fɛ ka a faa. 2 Judiyailu la Faaninbon sali tun da sudunya. 3 Isa dɔɔcɛilu ka kuma a yɛ ko: «I ye bɔ yan ka wa Jude mara rɔ, kosa i la karandenilu bɛɛ ri a mafɛnɛ i ye ko mɛnilu kɛla. 4 Ni mɔɔ mɛn ye a fɛ a tɔɔ ye bɔ, wo tii tɛ a la kɛwaliilu kɛla dokon dɔ. Ni i ye kɛwali bailu kɛla, i ye wa wo rɔ, ka i jɛrɛ yiraka dunuɲa bɛɛ la.» 5 Hali Isa dɔɔcɛilu ma lemɛniya a ma.

6 Wo rɔ, Isa ka ii jabi: «Nde la waati ma se fɔlɔ. Ai kɔnin, waati bɛɛ ka ɲin ai ma. 7 Ai ti se gboyala dunuɲa yɛ. Nde gboyara dunuɲa yɛ ka a masɔrɔn n ye sereya bɔla ko ii la kɛwaliilu ka juu. 8 Ai ye wa sali rɔ. Nde ti wala sali ɲin dɔ ka a masɔrɔn nde la waati ma se fɔlɔ.» 9 Isa ban kɔ rɔ wo fɔla a dɔɔcɛilu yɛ, a tora Kalile.

10 A dɔɔcɛilu wani kɔ sali rɔ, Isa fanan wara. Kɔni a ma wa mɔɔilu ɲana, a ka a dokon de ka wa. 11 Sali waati wo rɔ Judiyailu la ɲɛmɔɔilu tɛrɛ ye Isa laɲininna. Ii ka maɲininkali kɛ ko: «A ye min?» 12 Jama wo rɔ mɔɔilu tɛrɛ ye i ɲɔɔn masɔsɔla bakɛ a la ko rɔ. Doilu tɛrɛ ye a fɔla ko: «Cɛɛ wo ka ɲin.» Dogbɛrɛ tɛrɛ ye a fɔla ko: «A ye mɔɔilu manɛɛnna.» 13 Kɔni mɔɔ si ma foyi fɔ Isa la ko rɔ gbɛ rɔ, baa ii silanni tɛrɛ Judiyailu la ɲɛmɔɔilu yɛ.

14 Sali lon tala tuma la, Isa wara Alla batobonba jin kɔndɔ ka wa mɔɔilu karan damira. 15 Judiyailu la ɲɛmɔɔilu kabannakoyara. Ii ka a fɔ ko: «Cɛɛ ɲin ka lɔnnin ɲin sɔrɔn min ten, ka a tɛrɛn a ma karan foyi kɛ?» 16 Isa ka ii jabi: «N na karan ma bɔ n jɛrɛ rɔ. A bɔni n kelayaba le rɔ. 17 Ni mɔɔ mɛn ye a fɛ ka Alla sawo kɛ, a ri a lɔn ni n ye mɔɔilu karanna mɛn na wo bɔni Alla le rɔ, wala n ye kuma mɛn fɔla na bɔni nde le rɔ. 18 Mɔɔ mɛn ye kumala a jɛrɛ tɔɔ rɔ, wo ye a fɛ mɔɔilu ye a bonya, kɔni mɔɔ mɛn ye a fɛ mɔɔilu ye a kelayaba bonya, wo ye tuɲatii le ri. Wuya si tɛ a la ko rɔ. 19 Musa le ka sariya di ai ma, wo tɛ? Kɔni ai si ti sariya wo bonyala. Wo rɔ, nfenna ai ye n na ɲininna ka n faa?»

20 Jama ka Isa jabi: «Jena le i fɛ. Yon de ye i laɲininna ko ka i faa?» 21 Isa ka ii jabi: «N da kabannako kelen pe le kɛ, wo rɔ ai bɛɛ ra kabannakoya. 22 Ai ɲa lɔ. Musa ka faaninta sariya fɔ ai yɛ. (Kɔni faaninta ko ma bɔ Musa rɔ. A bɔra an benbailu le rɔ.) Wo bɛɛ ni a ta, hali Ɲɔɲɔ Lon ai ri ai dencɛilu la faaninta kɛ. 23 Ɲɔɲɔ Lon ai ri se ai dencɛ la faaninta kɛla kosa Musa la sariya kana tiɲan. Nde, Ɲɔɲɔ Lon kɔndɔ, nde ka mɔɔ kelen nakɛndɛya fefe, wo sababu la ai muruntini n kanma. Nfenna ko rɔ? 24 Ai kana kiti tɛɛ ai ɲa ka mɛn dɔrɔn yen, kɔni ai ye kiti tɛɛ telen na.»

25 Jerusalɛmuka do ka a fɔ ko: «An na jamanatiiilu ye cɛɛ mɛn naɲininna ko ka a faa, ale le ɲin di wa? 26 Ai ɲa lɔ! A ye kumala gbɛ rɔ, a ni mɔɔ si ti kumala ale ma. An na jamanatiiilu ye a lɔnna fewu ko Mɔɔ Ɲenematɔmɔnin de ye wa? 27 Kɔni, cɛɛ ɲin, an ka a lɔn a bɔnin yɔrɔ mɛn. Mɔɔ Ɲenematɔmɔnin wa na mɔɔ si ma a lɔn a ye bɔla yɔrɔ mɛn dɔ.»

28 Nba, ka Isa to mɔɔilu karanna Alla batobonba jin kɔndɔ, a ka a kan ba labɔ ko: «Ai ka n lɔn, ai ka n bɔ yɔrɔ fanan lɔn. Tuɲa wo rɔ. Kɔni n ma na n jɛrɛ ma. Mɛn ka n kelaya, wo le tuɲatii ri. Ai ma a lɔn. 29 Kɔni nde ka a lɔn, baa n bɔni ale le rɔ, a ni ale ka n kelaya.»

30 Awa jama wo tɛrɛ ye Isa ɲininna ka a lalɔ, kɔni mɔɔ si ma se ka a lalɔ ka a masɔrɔn a la waati tɛrɛ ma se fɔlɔ. 31 Jama ba woilu tɛma mɔɔ siyaman tɛrɛ lemɛniyani a ma. Ii ka a fɔ ko: «Ni Mɔɔ Ɲenematɔmɔnin wa na, a ri tɔɔmasere kabannakoilu kɛ ka tamin cɛɛ ɲin ta kan wa?»

32 Farisiilu tɛrɛ ye a mɛnna jama ye kuma mɛn fɔla Isa ma, ii dakɔrɔ. Wo rɔ, Sarakalasela kuntiilu ni Farisiilu ka Alla batobonba kɔnɔgbɛnna doilu lawa Isa mira kanma. 33 Isa ka a fɔ a yɛ ko: «N di to ai fɛ waati dɔndɔ, wo wa ban mɛn ka n kelaya ai ma n di n kɔsɛ a ma. 34 N wa wa, ai ri n ɲinin ka kaɲa. Ai ti nala n yenna. Baa n di kɛ yɔrɔ mɛn dɔ, ai tɛ se wala ye.» 35 Wo rɔ, Judiyailu ka a maɲininka ko: «A watɔ min? A watɔ yɔrɔ mɛn dɔ, an tɛ a tɛrɛnna yɔrɔ mɛn dɔ? A ye wala Judiyailu wara le mɛn ni Kirɛkikailu basannin i ɲɔɔnna wa? A ye di? A ri Kirɛkikailu karan wa? 36 A ka a fɔ an yɛ ko: ‹Ai ye n naɲinin kɔni ai ti nala n sɔrɔnna. Ai ti se wala n ye wala yɔrɔ mɛn dɔ.› A la kuma wo kɔrɔ ye nfen di?»

37 Sali lon naban, wo ye lon ba le ri. Wo lon Isa ka i wuli ka kuma ka a kan mayɛlɛ bakɛ: «Ni ji lɔɔ ye mɛn na a ye na n ma ka a min. 38 Mɛnilu lemɛniyara n ma, ‹ba ji le ye woyenna wo jusukun na ka ɲenemaya di wo mɔɔ ma,› ikomin a sɛbɛni Alla la kuma rɔ.» 39 Isa kan tɛrɛ Nii Sɛniman de ma, mɛn ditɔ Isa lemɛniyailu ma. Wo tuma Nii Sɛniman tun ma di fɔlɔ, baa Isa tun ma layɛlɛ sankolo rɔ fɔlɔ, ka gbiliya sɔrɔn.

40 Mɔɔilu ka Isa kumakan namɛn ka a fɔ ko: «Tuɲa le, ɲin ye Keladen fisamante le ri.» 41 Doilu gbɛrɛ tɛrɛ ye a fɔla ko: «A ye Mɔɔ Ɲenematɔmɔnin de ri!» Kɔni dogbɛrɛ tɛrɛ ye fɔla ko: «Mɔɔ Ɲenematɔmɔnin di se bɔla Kalile di? 42 Nba, a sɛbɛni Kitabu Sɛniman kɔndɔ ko: Mɔɔ Ɲenematɔmɔnin di bɔ Mansa Dawuda la denbaya le rɔ. Mɔɔ Ɲenematɔmɔnin di bɔ Bɛtilɛhɛmu, Mansa Dawuda la so kɔndɔ.» 43 Jama ka fara Isa ko kosɔn. 44 Doilu tɛrɛ ye a fɛ ka a lalɔ, kɔni mɔɔ si ma se ka a lalɔ.

45 Alla batobonba kɔnɔgbɛnna, ii nara sarakalasela kuntiilu tɔrɔfɛ a ni Farisiilu. Woilu ka ii maɲininka ko: «Nfenna ai ma na Isa ri?» 46 Alla batobonba kɔnɔgbɛnnailu ka a jabi: «Mɔɔ si ma se kumala ikomin cɛɛ ɲin ye ɲa mɛn ma!» 47 Farisiilu ka ii jabi: «Aile fanan manɛɛnnin di? 48 A ye di? An na dina kuntii doilu ra lemɛniya a ma wa, wala Farisi doilu? 49 Kɔni jama ɲin, mɛn ma an na sariya lɔn, ii ye mɔɔ dankannin de ri!»

50 Nikodɛmu, mɛn wara ka Isa tɛrɛn waati taminnin, wo jɛrɛ ye Farisi le ri. Wo ka a fɔ ko: 51 «Ka a bɛn an na sariya ma, an kana kiti labe mɔɔ si kan fɔɔ an wa an tolo malɔ a la ka a lɔn a ye ko mɛn kɛla. Ko wo tɛ wa?» 52 Kɔni dogbɛrɛilu ka a jabi: «Ile fanan ye bɔla Kalile le? I ye Kitabu Sɛniman karan ka a lɔn ko: keladen fisamante ti se nala Kalile.» 53 Wo tamin, mɔɔ bɛɛ wara a la bon na.