Josué 14

Kanaan jamana ratalara ɲa mɛn ma

1 Awa, Alla la sarakalasela Elasari ni Nun dencɛ Josuwe ni Isirayɛlikailu la kabila tiilu, woilu ka Kanaan jamana ratala Isirayɛlikailu tɛma. A kɛra ɲa mɛn ma, wo le ɲin di. 2 Ii ka kalabe kɛ duu ratala ko rɔ Isirayɛlikailu la kabila kɔnɔndɔ ni a talantɛ tɛma, ikomin Allabatala tun ka a jamari ka fara Musa la ɲa mɛn ma. 3,4 Yusufu bɔnsɔnilu kɛra kabila fila le ri, Manase kabila ni Efirayimu kabila. Musa tun ka yɔrɔ do di kabila fila ni a talantɛ ma kɔrɔman Juridɛn Ba telebɔ rɔ. Kɔni a ma yɔrɔ si di Lebi kabila mɔɔilu le ma. A ka so dɔndɔ le di woilu ma, ka a kɛ woilu sii diya ri. A ka so woilu laminin duu fanan di ii ma ka a kɛ ii la kolofenilu damaɲinin diyailu ri. 5 Awa, Isirayɛlikailu ka jamana ratalan ikomin Allabatala tun ka a fɔ Musa yɛ ɲa mɛn ma.

Heburɔn so dira Kalɛbu ma

6 Lon do rɔ, ka Isirayɛlikailu to Kilikali, Juda kabila mɔɔ doilu nara Josuwe tɛrɛn. Jefunɛ dencɛ Kalɛbu, mɛn bɔni Kenisi bonkɔndɔla, ka a fɔ Josuwe yɛ ko: «Ka an to Kadɛsi-Baraneya ye, Allabatala kumara a la mɔɔ Musa yɛ ile ni nde la ko rɔ. A ka mɛn fɔ, i ka wo lɔn. 7 Wo tuma, n sɔrɔn da san binaanin (40) bɔ. Allabatala la baaraden Musa ka n lawa ka bɔ Kadɛsi-Baraneya, ko n ye na jamana ɲin nakɔrɔsi. N ka n kɔsɛ mɛn kɛ, n tun ka mɛnilu yen jamana kɔndɔ, n ka woilu ɲafɔ a yɛ telenbaya rɔ. 8 N badenma mɛnilu wara n tɔrɔfɛ, woilu fanan ka dantɛɛli kɛ. Kɔni ii ka mɛn fɔ, wo ka jama tunnagboya. Kɔni n ka lemɛniya la n Maari Allabatala rɔ fewu. 9 Wo lon, Musa ka a kali n yɛ ko n wara ka n taama jamana mɛn kɔndɔ wo lakɔrɔsi kanma, ko wo le kɛtɔ n ni n denilu ta ri kadawu. Ko ka a masɔrɔn n ka lemɛniya la n Maari Allabatala dɔ fewu. 10 A ragbɛ. Allabatala ka n kɛndɛ to fɔɔ ka na se bi ma, ikomin a ka lahidi ta ɲa mɛn ma. A ka kuma wo fɔ Musa yɛ ka Isirayɛlikailu to kiɲɛ fufu kɔndɔ ye. San binaanin ni loolu (45) le ye waati wo ni bi tɛma. Nba, n ye yan sisɛn. N sɔrɔn da san biseyin ni loolu (85) le bɔ. 11 Kɔni fanka mɛn tɛrɛ ye n na n lawa waati Musa bolo, wo fanka kelen ye n na fɔlɔ. Sebaya ye n na ikomin n tɛrɛ ye ɲa mɛn ma fɔlɔ. N di se kɛlɛ kɛla, n di se baara kɛla. 12 Sisɛn, i ye koyinkɛ ma yɔrɔ wo di n ma, Allabatala ka mɛn lahidi ta n yɛ wo lon. I jɛrɛ ka a mɛn wo lon ko Anakikailu le ye jamana wo rɔ. Ii la soilu ye so bailu le ri, jin ye mɛnilu lamininna. Kɔni ni Allabatala tora n fɛ, n di Anakikailu bɛɛ gbɛn ikomin Allabatala jɛrɛ ka a fɔ ɲa mɛn ma.»

13 Nba, Josuwe ka duwawu kɛ Jefunɛ dencɛ Kalɛbu yɛ, ka Heburɔn so di a ma ka a kɛ a ta ri. 14 Wo rɔ haan bi, Heburɔn ye Kalɛbu bɔnsɔnilu ta le ri ka a masɔrɔn Kalɛbu ka lemɛniya la Isirayɛlikailu Maari Allabatala rɔ fewu. 15 Waati taminni, Heburɔn tɛrɛ ye kilila le ko Kiriyati Ariba. Wo kɔrɔ le ko Ariba la so. Ariba le tɛrɛ mɔɔ malɔnni ba ri Anakikailu rɔ.

Wo bɛɛ kɔrɔ, kɛlɛ banda jamana kɔndɔ.