1 Isa ka a fɔ a la karandenilu yɛ, lon do rɔ, ko: «Sika tɛ a rɔ, lafili koilu ri na ka mɔɔilu lɔ kojuu kɛla. Kɔni mɔɔ mɛn wa lafili koilu lana mɔɔilu ma, gbalo ye wo yɛ. 2 Hali ni ii tun ka kabakudun ba sidi wo tii kan na ka a lafili kɔɔji rɔ, wo tun di fisaya wo rɔ, sa ni a ye kɛ sababu ri ka den kelen nafili. 3 Ai ye ai jɛrɛ lakɔrɔsi. Ni i badenma do ka hakɛ ta, i ye a kili ka a lali. Ni a nimisara, i ye a makoto. 4 I badenma wa hakɛ ta i la haan siɲa wɔrɔnwula tele kelen kɔrɔ, ni a nara wo kelen kelenna bɛɛ rɔ ka a fɔ ko a ra nimisa, i ye a makoto.»

5 Talibidenbailu ka a fɔ Isa yɛ ko: «Maari, i ye do la an na lemɛniya kan.» 6 Maari ka ii jabi: «Hali ni ai la lemɛniya dɔɔyara ka kɛ ikomin bɔrɔn fira kisɛ kelen, wo lemɛniya jate baraka rɔ ai ri se a fɔla jiri luluma ba yɛ ko: ‹I ye bɔ yan ka wa turu fɔɔ kɔɔji rɔ›. Jiri wo ri i gbiliya.»

7 Isa ka a fɔ ii yɛ ko: «A ye di? Ni i la jɔn do bɔra sɛnɛ kɛ diya, wala kolofen gbɛn diya, ka na lu ma, yon ye ai tɛma, mɛn di sɔn ka a fɔ a yɛ ko ‹i ye na i sii jonna ka dɔɔnnin kɛ fɔlɔ›? 8 Wo kuma tɛ! I ri a jamari ko ‹i ye ikaliya ka tibili kɛ, ka i jɛrɛ rabɛn, ka na dɔɔnnin sii n kɔrɔ. N di dɔɔnnin kɛ ka fa ka ji min. Wo kɔ, i ri dɔɔnnin kɛ ka ji min›. 9 Ni jɔn ka a la baara kɛ, a la kuntii ri baraka bila a yɛ wo rɔ wa? Wo kuma tɛ! 10 A ye wo ɲa kelen de ma ai fanan fan fɛ. Baara mɛn fɔni ai yɛ, fɔɔ wo ye kɛ. Bonya ko tɛ a rɔ. Ni ai banda baara wo bɛɛ la, ai ye a fɔ ko: ‹An tara mɛn kanma, an da wo dɔrɔn de kɛ. Bonya tɛ an yɛ.›»

11 Isa tɛrɛ ye sila kan ka wa Jerusalɛmu. A tamintɔ tɛrɛ ye Samari mara ni Kalile mara tɛma. 12 A dontɔla so do kɔndɔ, kunatɔ tan nara a labɛn. Ii lɔni tora yɔrɔ jan, 13 ka ii kan nabɔ Isa ma ko: «Isa, an na faama, i ye kininkinin an ma ka an dɛmɛn.» 14 Isa ka ii yen tuma mɛn, a ka a fɔ ko: «Ai ye wa ai jɛrɛ yiraka sarakalaselailu la.» Wo bolo ma, ii bɔra ye ka wa. Ii watɔla, ii bɛɛ kɛndɛyara. 15 Kelen ka a yen ko a ra kɛndɛya. Ka a to Alla tandola kan ba la, a ka i kɔsɛ ka na Isa ma. 16 A ka a ɲakɔrɔ bɛn duu ma Isa sen kɔrɔ ka baraka bila a yɛ. Samarika le tɛrɛ. 17 Isa ka a maɲininka ko: «Mɔɔ tan ma kɛndɛya wa? A tɔ kɔnɔndɔ ye min? 18 Mɔɔ si ma sɛ ka na Alla tando fɔɔ cɛɛ kelen pe ɲin wa, mɛn ye siya gbɛrɛ mɔɔ ri?» 19 Isa ka a fɔ a yɛ ko: «Iwuli! Wa, i ra kɛndɛya i la lemɛniya sababu la!»

20 Farisi doilu ka Isa maɲininka, lon do rɔ ko: «Alla la mansaya ri na waati ɲuman?» Isa ka ii jabi: «Alla la mansaya ti nala yenna ɲa la. 21 A ti nala a fɔla ko: ‹Alla la mansaya ye yan› wala ‹a ye ye›. Kɔni Alla la mansaya ye ai tɛma.»

22 A ka a fɔ a la karandenilu yɛ ko: «A lɔɔ ri kɛ ai la, lon do rɔ, ka Mɔɔ Dencɛ tele kelen yen, kɔni ai ti nala sela ka wo yen. 23 Mɔɔilu ri a fɔ ai yɛ ko: ‹A fɛlɛ, a ye ye› wala ‹a ye yan›. Kɔni ai kana ibori wo kɔ. 24 I ɲa lɔ! Sanmɛlɛnin ye bɔla sankolo fan kelen na ka wa fan do fɛ ɲa ma, Mɔɔ Dencɛ wa kɛ nala lon mɛn, a natɔla ri kɛ wo ɲa kelen ma. 25 Kɔni sani wo ye dafa, a fɛrɛ tɛ fɔɔ bi mɔɔilu ye a tɔrɔ kojuuya fɔlɔ ka i ban a rɔ.

26 «Yani Mɔɔ Dencɛ ye na ikɔ tuun, ko mɛnilu kɛra Nuhan tele rɔ, woilu ɲɔɔn di kɛ. 27 Nuhan tele rɔ, mɔɔilu tora dɔɔnnin ni minnin na, ii ye muso furula, ka ii denmusoilu di cɛɛilu ma furula. A tɛrɛ ye wo ɲa fɔɔ Nuhan donda kulunba kɔndɔ. Wo lon kelen sanci ba ka nali damira. Sanci wo ma tɛɛ, fɔɔ ka a to gbiliyala a ɲa jɛrɛ jɛrɛ ma ka dunuɲa yɔrɔ bɛɛ latunun ka mɔɔilu bɛɛ halaki.

28 «Mɛn kɛra Luti tele rɔ, wo ɲɔɔn fanan di kɛ. Luti tele rɔ, mɔɔilu tora dɔɔnnin ni minnin na, ka to sanni kɛla, ka to sɛnɛ kɛ ni bon lɔla. 29 A tɛrɛ ye wo ɲa haan Luti bɔra Sɔdɔmu so kɔndɔ lon mɛn. Wo lon kelen, ta ni timiliki bɔra sankolo rɔ ka jii Sɔdɔmu so kɔndɔ ikomin sanci. Wo ka Sɔdɔmu mɔɔilu bɛɛ halaki.

30 «A ri kɛ wo ɲa ma Mɔɔ Dencɛ bɔtɔ gbɛ ma lon mɛn. 31 Ni wo lon sera ka a tɛrɛn do ra yɛlɛ bon kun bilinin sanfɛ ka a bolofenilu to bon kɔndɔ, wo ma kan ka jii a bolofenilu ta kanma bon kɔndɔ. Ni wo lon sera ka do tɛrɛn sɛnɛ rɔ, wo ma kan ka i kɔsɛ a bolofenilu ta diya so kɔndɔ. 32 Ko mɛn kɛra Luti muso la, ai ye ai hankili to wo rɔ. 33 Mɔɔ mɛn ye dunuɲaratɛɛ daha dɔrɔn ɲininna bi, wo ri bɔnɔ sini. A tɛ ɲenemaya banbali sɔrɔn sini. Kɔni mɛn wa sɔn ka bɔnɔ dunuɲaratɛɛ daha rɔ bi, sini wo ri kisi ka ɲenemaya banbali sɔrɔn.

34 «N ye a fɔla ai la ko su wo rɔ mɔɔ fila ri sunɔɔ lafen kelen kan; mɔɔ kelen di ta ka kelen to ye. 35,36 Muso fila ri suman kisɛ bundɛ i ɲɔɔn fɛ, muso kelen di ta ka muso kelen to ye.» *

37 Karandenilu ka Isa maɲininka ko: «Maari wo ri kɛ min?» Isa ka ii jabi sanda rɔ ko: «Su wa kɛ diya mɛn dɔ, duwailu ri jii ye.»