आमोस 1

1 तकोआवासी आमोस जो भेड़-बकरियाँ के चराण आळयां म्ह तै था, उसके ये वचन सैं जो उसनै यहूदा के राजा उज्जियाह के, अर यहोआश के बेट्टे इस्राएल के राजा यारोबाम के शासन म्ह, भूकम्प तै दो साल पैहल्या, इस्राएल कै बारै म्ह दर्शन देखकै कहे:

2 "यहोवा सिय्योन*1:2 सिय्योन सिय्योन मूल रूप से यबूसियाँ (जिनतै इस्राएलियाँ नै यरुशलेम के क्षेत्र पै जीत हासिल करी थी) के किले का नाम था, जो यरुशलेम के पूर्वी पहाड़ पर स्थित था। बाद म्ह यह पूरे पूर्वी पहाड़ अर पूरे यरुशलेम नगर का नाम बणग्या। तै गरजैगा अर यरुशलेम तै अपणा शब्द सुणावैगा; फेर पाळीयाँ की चराईयाँ विलाप करैंगी, अर कर्मेल की चोट्टी झुळस जावैगी।"

इस्राएल के पड़ोसी राज्याँ का न्याय

3 यहोवा न्यू कहवै सै: "दमिश्क नगर के तीन के, बलके च्यार अपराध्धां कै कारण मै उसकी सजा ना छोड़ूँगा*1:3 उसकी सजा ना छोड़ूँगा इसा लाग्गै सै के माणसां के ध्यान नै खींचण कै खात्तर परमेसवर की चेतावनी का क्रम कै कारण कह्या गया प्रतीत होवै सै।; क्यूँके उननै गिलाद ताहीं लोहे के काटण आळे यन्त्रां तै रौंद डाल्या सै। 4 इस करकै मै इस्राएल के राजा हजाएल के राजभवन म्ह आग लगाऊँगा, अर उसतै सीरिया के राजा बेन्हदद के किले भी भस्म हो जावैंगे। 5 मै दमिश्क के बेंड़याँ ताहीं तोड़ गेरूँगा, अर आवेन नाम की तराई के रहण आळयां नै अर बेतएदेन नगर के घर म्ह रहण आळे राजदण्डधारी ताहीं नाश करुँगा; अर अराम के माणस कैदी होकै कीर नगर ताहीं जावैंगे, यहोवा का योए वचन सै।"

6 यहोवा न्यू कहवै सै: "गाज़ा नगर के तीन के, बलके च्यार अपराध्धां कै कारण मै उसकी सजा नै ना छोड़ूँगा; क्यूँके वे सारे माणसां ताहीं बन्दी बणाकै लेगे के उननै एदोम देश के बस म्ह कर देवैं। 7 इस करकै मै गाज़ा नगर की शहरपनाह म्ह आग लगाऊँगा, अर उसतै उसके भवन भस्म हो जावैंगे। 8 मै अश्दोद नगर के रहण आळयां ताहीं अर अश्कलोन के राजदण्डधारी नै भी नाश करुँगा; मै अपणा हाथ एक्रोन कै खिलाफ चलाऊँगा, अर बाकी पलिश्ती माणस नाश होवैंगें," परमेसवर यहोवा का योए वचन सै।

9 यहोवा न्यू कहवै सै: "सोर नगर के तीन के, बलके च्यार अपराध्धां कै कारण मै उसकी सजा नै ना छोड़ूँगा; क्यूँके उननै सारे माणसां ताहीं बन्दी बणाकै एदोम के बस म्ह कर दिया अर भाई की तरियां करार याद न्ही करया। 10 इस करकै मै सोर की शहरपनाह पै आग लगाऊँगा, अर उसतै उसके भवन भी भस्म हो जावैंगे।"

एदोम

11 यहोवा न्यू कहवै सै: "एदोम के तीन के, बलके च्यार अपराध्धां कै कारण मै उसकी सजा नै ना छोड़ूँगा; क्यूँके उसनै अपणे इस्राएली भाई ताहीं तलवार लिये होए खदेड़या अर कुछ भी दया ना करी, पर छो तै उननै लगातार पाड़दा ए रह्या, अर अपणे रोष ताहीं अनन्त काल कै खात्तर बणाए रह्या। 12 इस करकै मै तेमान नगर म्ह आग लगाऊँगा, अर उसतै बोस्रा नगर के भवन भस्म हो जावैंगे।"

अम्मोन

13 यहोवा न्यू कहवै सै, "अम्मोन के तीन के, बलके च्यार अपराध्धां कै कारण मै उसकी सजा नै ना छोड़ूँगा, क्यूँके उननै अपणी हद ताहीं बढ़ा लेण खात्तर गिलाद देश की गर्भवती जनानियाँ का पेट चीर डाल्या। 14 इस करकै मै रब्‍बाह नगर की शहरपनाह म्ह आग लगाऊँगा, अर उसतै उसके भवन भी भस्म हो जावैंगे। उस युद्ध के दिन म्ह ललकार होवैगी, वो आँधी बलके बवण्डर का दिन होवैगा; 15 अर उनका राजा अपणे हाकिमां समेत गुलाम्मी म्ह जावैगा, यहोवा का योए वचन सै।"