आमोस 7

विनाश के तीन दर्शन टिड्डियाँ

1 परमेसवर यहोवा नै मेरे ताहीं यो दिखाया: अर मै के देक्खूँ सूं के उसनै पिछली घास के उगण के शरुआत म्ह टिड्डियाँ पैदा करी; अर वो राजा की कटणी के बाद की पिछली घास थी। 2 जिब वे टिड्डियाँ घास खा चुकीं, फेर मन्‍नै कह्या, "हे परमेसवर यहोवा, अपणे माणसां माफ कर! न्ही तो याकूब किस तरियां स्थिर रह सकैगा? वो कितना कमजोर सै!" 3 इसके बारे म्ह यहोवा पछताया, अर उसतै कह्या, "इसी बात इब न्ही होवैगी।"

आग

4 परमेसवर यहोवा नै मेरे ताहीं यो दिखाया: अर के देक्खूँ सूं के परमेसवर यहोवा नै आग के जरिये मुकद्दमा लड़ण ताहीं पुकारया, अर उस आग तै महासागर सूख ग्या, अर देश भी भस्म होण लाग्या था। 5 फेर मन्‍नै बिनती करी, "हे परमेसवर यहोवा, रुक जा! न्ही तो याकूब किस तरियां स्थिर रह सकैगा? वो कितना कमजोर सै।" 6 इसके बारै म्ह भी यहोवा पछताया; अर परमेसवर यहोवा नै कह्या, "इसी बात फेर न्ही होवैगी।"

साहुल

7 यहोवा नै मेरे ताहीं यो भी दिखाया: मन्‍नै देख्या के प्रभु साहुल लगाकै बणाई होई किसे दीवार पै खड्या सै, अर उसके हाथ म्ह साहुल सै। 8 अर यहोवा नै मेरे ताहीं कह्या, "हे आमोस, तेरे ताहीं के दिखाई देवै सै?" मन्‍नै कह्या, "एक साहुल।" फेर परमेसवर नै जवाब दिया, "देख, मै अपणी प्रजा इस्राएल के बीच म्ह साहुल लगाऊँगा। 9 मै इब उननै ना छोड़ूँगा। इसहाक की ऊँच्‍ची जगहां उजाड़, अर इस्राएल के पवित्रस्‍थान सुनसान हो जावैंगे, अर मै यारोबाम के वंश नै खतम कर दियुँगा।"

आमोस अर अमस्याह

10 फेर बेतेल के याजक अमस्याह*7:10 याजक अमस्याह वो हो सकै के प्रधान पुरोहित था हारुन के क्रम म्ह अर परमेसवर जरिये ठहराया नै इस्राएल के राजा यारोबाम के धोरै कुह्वा भेज्या, "आमोस नै इस्राएल के घरान्‍ने के बीच म्ह तेरै तै राजद्रोह की साजिस करी सै; उसके सारे वचनां नै देश न्ही सह सकदा। 11 क्यूँके आमोस न्यू कहवै सै, ‘यारोबाम तलवार तै मारया जावैगा, अर इस्राएल अपणी धरती पै तै पक्‍का गुलाम्मी म्ह जावैगा।’"

12 फेर अमस्याह नै आमोस तै कह्या, "हे नबी, उरै तै लिकड़कै यहूदा देश म्ह भाज ज्या, अर ओड़ैए रोट्टी खाया कर, अर ओड़ैए भविष्यवाणी करया कर; 13 पर बेतेल म्ह फेर कदे भविष्यवाणी ना करिये, क्यूँके यो राजा का पवित्रस्‍थान अर राज-नगर*7:13 राज-नगर यानिके परमेसवर का मन्दर सै।" 14 आमोस नै उत्तर देकै अमस्याह तै कह्या, "मै उस तरियां का भविष्यवक्ता कोनी, जो पईसे लेकै भविष्यवाणी करुँ, मै तो गां-बळधां का पाळी, अर गूलर के दरखतां का छाँटण आळा था, 15 अर यहोवा नै मेरे ताहीं भेड़-बकरियाँ के पाच्छै-पाच्छै फिरण तै बुलाकै कह्या, ‘जा, मेरी प्रजा इस्राएल तै भविष्यवाणी कर।’ 16 इस करकै इब तू यहोवा का वचन सुण, तू कहवै सै, ‘इस्राएल कै खिलाफ भविष्यवाणी ना करिये; अर इसहाक के घरान्‍ने कै खिलाफ बार-बार वचन ना सुणावै।’ 17 इस करकै, हे अमस्याह, यहोवा तेरे तै न्यू कहवै सै: ‘तेरी जनान्‍नी नगर म्ह वेश्या हो जावैगी, अर तेरे बेट्टे-बेटियाँ तलवार तै मारे जावैंगी, अर तेरी धरती डोरी डालकै बाँट ली जावैंगी; अर तू आप मूर्तिपूजक देश म्ह मरैगा, अर इस्राएल अपणी धरती पै तै पक्‍का गुलाम्मी म्ह जावैगा।’"