1 हे इस्राएलियों, दण्ड का यो सन्देस सुणो जो यहोवा नै थारे बारे म्ह यानिके उस सारे कुल कै बारै म्ह कह्या सै जिसनै मै मिस्र देश तै ल्याया सूं: 2 "धरती के सारे कुलां म्ह तै मन्‍नै सिर्फ थारे पै मन लगाया सै*, इस कारण मै थारे सारे अधर्म कै काम की सजा देऊँगा।"

3 "आमोस नै फेर तै कह्या," "जै दो माणस कठ्ठे सहमत ना हों, तो के वे एक साथ चाल सकैगें? 4 के शेर बिना शिकार पाए बण म्ह गरजैंगे? के जवान शेर बिना कुछ पकड़े अपणी माँद म्ह तै गुर्रावैगा? 5 के चिड़िया बिना फंदा लगाऐ फँसैगी? के बिना कुछ फँसे फंदा धरती पै तै उचकैगा? 6 के किसे नगर म्ह नरसिंगा फूँकण पै माणस ना थरथरावैंगे? के यहोवा के बिना भेज्जे किसे नगर म्ह कोए विपत्ति पड़ैगी? 7 इस्से तरियां तै प्रभु यहोवा अपणे दास भविष्यवक्तावां पै अपणा मर्म बिना प्रगट करे कुछ भी ना करैगा।* 8 शेर गरज्या; कौण ना डरैगा? परमेसवर यहोवा बोल्या; कौण भविष्यवाणी ना करैगा?"

9 अश्दोद के भवन अर मिस्र देश के राजभवन पै प्रचार करकै कहो: "सामरिया के पहाड़ां पै कठ्ठे होकै देक्खो के उस म्ह के कितना बड़ा रोळा अर उसके बीच कितणे अंधेर के काम हो रहे सैं!" 10 यहोवा की या वाणी सै, "ये माणस अपणे भवनां म्ह उड़दंग अर डकैती का धन बटोरकै राक्खैं सैं, वे सिधाई तै काम करणा जाण्दे ए न्ही।" 11 इस करकै परमेसवर यहोवा न्यू कहवै सै: "देश का घेरण आळा एक दुश्मन होवैगा, अर वो तेरा बल तोड़ैगा, अर तेरे भवन लूटे जावैंगे।"

12 यहोवा न्यू कहवै सै: "जिस तरियां चरवाहा शेर के मुँह तै दो टाँग या कान का एक टुकड़ा छुड़ावै सै*, उसे तरियां ए इस्राएली माणस, जो सामरिया म्ह बिछोणे के एक कुणा या रेशमी गद्दी पै बैठ्या करैं सैं, वे भी छुड़ाए जावैंगे।"

13 सेनाओं के परमेसवर, प्रभु यहोवा की या वाणी सै, "देक्खो, अर याकूब के घरान्‍ने तै या बात चिताकै कहो: 14 जिस बखत मै इस्राएल नै उसके अपराध्धां की सजा देऊँगा, मै बेतेल की वेदियाँ नै भी नाश कर देऊँगा, अर वेदी के सींग टूटकै धरती पै गिर पड़ैंगे। 15 अर मै सर्दी के भवन ताहीं अर धूपकाल के भवन, दोनुआं नै गिराऊँगा; अर हाथी दाँन्द के बणे भवन भी नाश होवैंगें, अर बड़े-बड़े घर नाश हो जावैंगे," यहोवा की याए वाणी सै।