7 इतणा हो के तू हिम्मत करकै अर घणा मजबूत होकै जो नियम-कायदे मेरे दास मूसा नै तेरे ताहीं दिए सै उन सब कै मुताबिक करण म्ह चौकसी करिये; अर उसतै ना तो दाएँ मुड़िए अर ना बाएँ, फेर जित्त-जित्त तू जावैगा ओड़ै-ओड़ै तेरा काम सफल होवैगा। 8 नियम-कायदे की या किताब* तेरे ध्यान तै कदे भी ना उतरण पावै, इस्से म्ह दिन-रात ध्यान दिए रहणा, ज्यांतै के जो कुछ उस किताब म्ह लिख्या सै उसके मुताबिक करण की तू चौकसी करै; क्यूँके इसाए करण तै तेरे सारे काम सफल होवैंगे, अर तू प्रभावशाली होवैगा। 9 के मन्‍नै तेरे ताहीं हुकम न्ही दिया? हिम्मत करकै मजबूत हो जा; भय ना खावै, अर तेरा मन कच्‍चा न्ही होवै; क्यूँके जित्त-जित्त तू जावैगा ओड़ै-ओड़ै तेरा परमेसवर यहोवा तेरै गैल रहवैगा।"