1 पर इस्राएलियाँ नै यहोवा तै चढ़ाई होई चीज कै बारै म्ह धोक्खा करया; यानिके यहूदा गोत्र का आकान, जो जेरहवंशी जब्दी का पोत्ता अर कर्मी का बेट्टा था, उसनै यहोवा तै चढ़ाई होई चिज्जां म्ह तै कुछ ले लिया; इस कारण यहोवा का कोप इस्राएलियाँ पै भड़क उठ्या।

2 यहोशू नै यरीहो तै आई नाम के नगर कै गैल, जो बेतावेन तै लाग्या होया बेतेल की पूर्व की और सै, कुछ माणसां ताहीं यो कहकै भेज्या, "जाकै देश का भेद ले आओ।" अर उन आदमियाँ नै जाकै आई का भेद लिया। 3 अर उननै यहोशू कै धोरै लौटकै कह्या, "सारे माणस ओड़ै ना जावैं, दो तीन हजार माणस आई नगर जाकै आई नगर नै जीत सकै सैं; सारे माणसां नै ओड़ै जाण का दुख ना देओ, क्यूँके वे माणस थोड़े ए सैं।" 4 ज्यांतै लगभग तीन हजार माणस ओड़ै गए; पर आई नगर के रहणआल्यां कै स्याम्ही तै भाज आए, 5 फेर आई के रहणआल्यां नै उन म्ह तै कोए छत्तीस माणस मार गेरे, अर अपणे इस नगर आई के फाटक* तै शबारीम ताहीं उनका पिच्छा करकै उतराई म्ह उन ताहीं मारदे गए। अर माणसां का मन पिंघळ कै पाणी सा बण गया।

6 फेर यहोशू नै अपणे कपड़े पाड़े, खुद वो अर इस्राएली अगुवे यहोवा के सन्दूक कै स्याम्ही मुँह के बळ धरती पै शाम तक पड़े रहे; अर उननै अपणा-अपणा दुख जाहिर करया। 7 अर यहोशू नै कह्या, "हाय, प्रभु यहोवा, तू अपणी इस प्रजा नै यरदन पार क्यूँ ले आया? के हमनै एमोरियां कै वश म्ह करकै नाश करण खात्तर ल्याया सै? भला होन्दा के हम सबर करकै यरदन के उस पार रह जान्दे! 8 हाय, प्रभु मै के कहूँ, जिब इस्राएलियाँ नै अपणे बैरियाँ ताहीं पीठ दिखाई सै! 9 क्यूँके कनानी बलके इस देश के सारे निवासी यो सुणकै हमनै घेर लेवैगें, अर म्हारा नाम धरती पै तै मिटा देंगे; फेर तू अपणे बड़े नाम खात्तर के करैगा?"

10 यहोवा नै यहोशू तै कह्या, "उठ, खड्या हो जा, तू क्यूँ इस तरियां मुँह के बळ धरती पै पड्या सै? 11 इस्राएलियाँ नै पाप करया सै; अर जो करार मन्‍नै उनतै अपणे साथ करया था उस ताहीं उननै तोड़ दिया सै, उननै चढ़ाई होई चिज्जां म्ह तै ले लिया, बलके चोरी भी करी, अर छळ करकै उस ताहीं अपणे सामान म्ह धर लिया सै। 12 इस कारण इस्राएली अपणे बैरियाँ के स्याम्ही खड़े न्ही रह सकदे; वे अपणे बैरियाँ नै पीठ दिखावै सैं, ज्यांतै के वे आप चढ़ाई होई चीज बणगे सैं। अर जै थम अपणे बीच म्ह तै चढ़ाई होई चिज्जां नै सत्यानाश न्ही कर देगें, जिब ताहीं मै थारै गैल न्ही रहूँगा। 13 उठ, प्रजा के माणसां नै पवित्र कर, उनतै कह; ‘सबेरै ताहीं अपणे-आपनै पवित्र करो; क्यूँके इस्राएल का परमेसवर यहोवा न्यू कहवै सै, "हे इस्राएल, तेरे बीच म्ह चढ़ाई होई चीज सै; ज्यांतै जिब तक तू चढ़ाई होई चिज्जां नै अपणे बीच म्ह तै दूर ना करै जिब ताहीं तू अपणे बैरियाँ कै स्याम्ही खड्या न्ही रह सकैगा।" 14 ज्यांतै सबेरै थम एक गोत्र-गोत्र कै मुताबिक धोरै खड़े करे जाओगे; अर जिस गोत्र ताहीं यहोवा पकड़ै वो एक-एक कुल करकै धोरै आवै; अर जिस कुल ताहीं यहोवा पकड़े वो एक घराणा-घराणा करकै धोरै आवै; फेर जिस घराने नै यहोवा चुणै वो एक-एक माणस करकै धोरै आवै। 15 फेर जो माणस यहोवा ताहीं चढ़ाई होई चीज धरे होए पकड्या जावैगा, वो अर जो कुछ उसका हो सब आग म्ह गेरकै जळा दिया जावै; क्यूँके उसनै यहोवा के करार ताहीं ताेड़या सै, अर इस्राएल म्ह अनुचित काम करया सै।’"

16 यहोशू सबेरै उठकै इस्राएलियाँ ताहीं एक-एक करकै धोरै लेग्या, अर यहूदा का गोत्र पकड्या गया; 17 फेर उसनै यहूदा के परिवार ताहीं धोरै ल्याया, अर जेरहवंशियाँ का कुल पकड्या गया; फेर जेरहवंशियाँ के घरान्‍ने के एक-एक आदमी ताहीं धोरै ल्याए, अर जब्दी पकड्या गया; 18 फेर उसनै उसके घरान्‍ने के एक-एक माणस ताहीं धोरै खड्या करया, अर यहूदा गोत्र का आकान, जो जेरहवंशी जब्दी का पोत्ता अर कर्मी का बेट्टा था, पकड्या गया। 19 फेर यहोशू आकान तै कहण लाग्या, "हे मेरे बेट्टे, इस्राएल के परमेसवर यहोवा का आदर कर, अर उसकै आग्गै मान ले; अर जो कुछ तन्‍नै करया सै वो मन्‍नै बता दे, अर मेरे तै किमे ना छुपावै।" 20 आकान नै यहोशू ताहीं जवाब दिया, "सचमुच मन्‍नै इस्राएल के परमेसवर यहोवा कै बिरुध्द पाप करया सै, अर मन्‍नै इस तरियां करया सै, 21 मन्‍नै लूट म्ह बाबेल देश का एक सुन्दर ओढ़णा, अर दो सौ शेकेल* चाँदी, अर पचास शेकेल सोन्‍ने की एक ईट दिखाई दी, तो मन्‍नै उनका लालच करकै उन ताहीं राख लिया; वे मेरे डेरे कै भित्तर धरती म्ह दाब राक्खी सैं, अर सब तै नीच्‍चै चाँदी सै।"

22 फेर यहोशू नै दूत भेज्जे, अर वे उस डेरे म्ह भाज्जे गए; अर के देख्या, के वे चीज उसके डेरे म्ह दबी पड़ी सैं, अर सब तै नीच्‍चै चाँदी सै। 23 उन ताहीं उननै डेरे म्ह तै लिकाड़कै यहोशू अर सारे इस्राएलियाँ कै धोरै ल्याकै यहोवा कै स्याम्ही धर दिया। 24 फेर सारे इस्राएलियाँ समेत यहोशू जेरहवंशी आकान ताहीं, अर उस चाँदी अर ओढ़णे अर सोन्‍ने की ईट, अर उसके बेट्टे-बेटियाँ ताहीं, अर उसके बळधां, गध्यां अर भेड़-बकरियाँ, अर उसके डेरे ताहीं, यानिके जो कुछ उसका था उन सब नै आकोर नाम की तराई म्ह लेग्या। 25 फेर यहोशू नै उसतै कह्या, "तन्‍नै म्हारे ताहीं क्यूँ दुख दिया सै? आज कै दिन यहोवा तन्‍नै दुख देवैगा।" फेर सारे इस्राएलियाँ नै उसपै पथराव करया; अर उन ताहीं आग म्ह गेरकै जळाया, अर उनके उप्पर पत्थर गेर दिए। 26 अर उननै उसके उप्पर पत्थरां का बड़ा ढेर लगा दिया जो आज तक बण्या सै; फेर यहोवा का भड़क्या होया छो शान्त होग्या। इस कारण उस जगहां का नाम आज तक आकोर तराई पड्या सै।