1 जिब यरुशलेम के राजा अदोनीसेदेक नै सुण्या के यहोशू नै आई ताहीं ले लिया, अर उसका सत्यानाश कर दिया सै, अर जिसा उसनै यरीहो अर उसके राजा तै करया था उसाए आई अर उसके राजा तै भी करया सै, अर यो भी सुण्या के गिबोन के निवासियां नै इस्राएलियाँ तै मेल कर लिया, अर उनकै बिचाळै रहण लाग्गे सैं, 2 फेर वे घणे डरगे, क्यूँके गिबोन बड़ा नगर बलके राजनगर के बराबर अर आई तै बड़ा था, अर उसके सारे निवासी शूरवीर थे। 3 ज्यांतै यरुशलेम के राजा अदोनीसेदेक नै हेब्रोन के राजा होहाम, यर्मूत के राजा पिराम, लाकीश के राजा यापी, अर एग्लोन के राजा दबीर कै धोरै यो कुह्वा भेज्या, 4 "के मेरै धोरै आकै मेरी मदद करो, अर चाल्‍लों हम गिबोन नै मारा; क्यूँके उसनै यहोशू अर इस्राएलियाँ तै मेल कर लिया सै।" 5 ज्यांतै यरुशलेम, हेब्रोन, यर्मूत, लाकीश, अर एग्लोन के पाँचों एमोरी राजयां नै अपणी-अपणी सारी सेना कठ्ठी करकै चढ़ाई कर दी, अर गिबोन कै स्याम्ही डेरे डालकै उसतै युद्ध छेड़ दिया।

6 गिबोन के निवासियां नै गिलगाल की छावणी म्ह यहोशू कै धोरै यो कुह्वा भेज्या, "अपणे दास्सां की और तै तू अपणा हाथ ना हटाईये; तावळा म्हारे धोरै आकै हमनै बचाले, अर म्हारी मदद कर; क्यूँके पहाड़ पै रहणआळे एमोरियां के सारे राजा म्हारे खिलाफ कठ्ठे होए सैं।" 7 फेर यहोशू सारे योद्धा अर सारे शूरवीरां नै गैल लेकै गिलगाल तै चाल पड्या। 8 अर यहोवा नै यहोशू तै कह्या, "उनतै ना डरै, क्यूँके मन्‍नै उन ताहीं तेरे हाथ म्ह कर दिया सै; उन म्ह तै एक माणस भी तेरै स्याम्ही टिक न्ही सकैगा।" 9 फेर यहोशू रातों-रात गिलगाल तै जाकै एकदम उनपै टूट पड्या। 10 फेर यहोवा नै इसा करया के वे इस्राएलियाँ तै घबरागे, अर इस्राएलियाँ नै गिबोन कै गैल उनका बड़ा संहार करया, अर बेथोरोन की चढ़ाई पै उनका पिच्छा करकै अजेका अर मक्‍केदा तक उन ताहीं मारदे गए। 11 फेर जिब वे इस्राएलियाँ कै स्याम्ही तै भाजकै बेथोरोन की उतराई पै आए, फेर अजेका पोहोचण तक यहोवा नै अकास तै उनपै ओळे बरसाए, अर वे मरगे; जो ओळयां तै मारे गए उनकी गिणती इस्राएलियाँ की तलवार तै मारे होया तै घणी थी।

12 उस बखत, यानिके जिस दिन यहोवा नै एमोरियां ताहीं इस्राएलियाँ कै वश म्ह कर दिया, उस दिन यहोशू नै यहोवा तै इस्राएलियाँ के देखदे इस तरियां कह्या,

"हे सूरज, तू गिबोन पै, अर हे चाँद, तू अय्यालोन की तराई कै उप्पर थम्या रहो।"

13 अर सूरज उस बखत ताहीं थम्या रह्या;

अर चाँद उस बखत ताहीं ठहरया रह्या,

जिब तक उस जात के माणसां नै अपणे बैरियाँ तै बदला ना लिया।

के या बात याशार नाम की किताब* म्ह न्ही लिक्खी सै के सूरज अकासमण्डल कै बीचो बीच ठहरया रह्या, अर लगभग च्यार पैहर* ताहीं न्ही डूब्या? 14 ना तो उसतै पैहल्या कदे कोए इसा दिन होया अर ना उसकै बाद, जिस म्ह यहोवा नै किसे माणस की सुणी हो; क्यूँके यहोवा तो इस्राएल की और तै लड़ै था।

15 फेर यहोशू सारे इस्राएलियाँ समेत गिलगाल की छावणी म्ह बोहड़ गया।

16 वे पाँचों राजा भाजकै मक्‍केदा के धोरै की गुफा म्ह जा छिपे। 17 फेर यहोशू नै यो समाचार मिल्या, "पाँचों राजा मक्‍केदा के धोरै की गुफा म्ह छिपे होए मिले सैं।" 18 यहोशू नै कह्या, "गुफा के मुँह पर बड़े-बड़े पत्थर लुढ़का कै उनकी पहरेदारी खात्तर माणसां नै उसके धोरै बिठा द्यो; 19 पर थम ना रुकियो, अपणे बैरियाँ का पिच्छा करकै उन म्ह तै जो-जो पाच्छै सैं उननै मार गेरो, उननै अपणे-अपणे नगर म्ह दाखिल होण का मौक्‍का ना द्यो; क्यूँके थारे परमेसवर यहोवा नै उन ताहीं थारे हाथ म्ह कर दिया सै।" 20 जिब यहोशू अर इस्राएली उनका संहार करकै उननै नाश कर चुके, अर उन म्ह तै जो बचगे वे अपणे-अपणे गढ़आळे नगर म्ह घुसगे, 21 फेर सारे माणस मक्‍केदा की छावणी म्ह यहोशू कै धोरै सही-सलामत बोहड़ आए; अर इस्राएलियाँ के बिरुध्द किसे नै जीभ ताहीं न्ही हिलाई।

22 फेर यहोशू नै हुकम दिया, "गुफा का मुँह खोलकै उन पाँचों राजा नै मेरै धोरै लिकाड़ ले आओ।" 23 उननै इसाए करया, अर यरुशलेम, हेब्रोन, यर्मूत, लाकीश, अर एग्लोन के उन पाँचों राजा ताहीं गुफा म्ह तै उसकै गैल लिकाड़ ले आए। 24 जिब वे उन राजा ताहीं यहोशू कै धोरै लिकाड़ ले आए, फेर यहोशू नै इस्राएल के सारे माणसां ताहीं बुलाकै अपणे गैल चालणआळे योद्धा के प्रधानां तै कह्या, "धोरै आकै अपणे-अपणे पैर इन राजयां की गर्दन पै धरो" अर फेर उननै धोरै जाकै अपणे-अपणे पैर उनकी गर्दन पै धरे। 25 फेर यहोशू नै उनतै कह्या, "ना डरो, अर ना थारा मन कच्‍चा हो; हिम्मत करकै मजबूत हो; क्यूँके यहोवा थारे सब दुश्मनां तै जिनतै थम लड़णआळे सो इसाए करैगा।" 26 इसकै बाद यहोशू नै उन ताहीं मरवा दिया, अर पाँच दरखतां पै लटका दिया। अर वे साँझ तक उन दरखतां पै लटके रहे। 27 सूरज डूबण कै बखत यहोशू तै हुकम पाकै माणसां नै उन ताहीं उन दरखतां पै तै उतारकै उस्से गुफा म्ह जित्त वे लुह्कगे थे गेर दिया, अर उस गुफा के मुँह पै बड़े-बड़े पत्थर धर दिए, वे आज तक औड़ै ए धरे सैं।

28 उसे दिन यहोशू नै मक्‍केदा ताहीं ले लिया, अर उस ताहीं तलवार तै मारया, अर उसनै राजा का सत्यानाश करया; अर जितने प्राणी उस म्ह थे उन सारया म्ह तै किसे ताहीं जिन्दा न्ही छोड्या; अर जिसा उसनै यरीहो के राजा कै गैल करया था उसाए मक्‍केदा के राजा तै भी करया।

29 फेर यहोशू सारे इस्राएलियाँ समेत मक्‍केदा तै चालकै लिब्ना नगर म्ह गया, अर लिब्ना नगर तै लड्या; 30 अर यहोवा नै उस ताहीं भी राजा समेत इस्राएलियाँ के हाथ म्ह कर दिया; अर यहोशू नै उस ताहीं अर उस म्ह के सारे प्राणियाँ ताहीं तलवार तै मारया; अर उस म्ह तै किसे ताहीं भी जिन्दा न्ही छोड्या; अर उसके राजा तै उसाए करया जिसा उसनै यरीहो के राजा कै गैल करया था।

31 फेर यहोशू सारे इस्राएलियाँ समेत लिब्ना नगर तै चालकै लाकीश नगर म्ह गया, अर उसकै खिलाफ छावणी डालकै लड्या; 32 अर यहोवा नै लाकीश नगर ताहीं इस्राएल कै हाथ म्ह कर दिया, अर दुसरे दिन उसनै उस ताहीं जीत लिया; अर जिसा उसनै लिब्ना नगर के सारे प्राणियाँ ताहीं तलवार तै मारया था उसाए उसनै लाकीश नगर कै गैल भी करया।

33 फेर गेजेर नगर का राजा होराम लाकीश नगर की मदद करण ताहीं चढ़ आया; अर यहोशू नै प्रजा समेत उसनै भी इसा मारया के उसकै खात्तर किसे ताहीं जिन्दा न्ही छोड्या।

34 फेर यहोशू सारे इस्राएलियाँ समेत लाकीश नगर तै चालकै एग्लोन नगर म्ह गया; अर उसकै खिलाफ छावणी डालकै युद्ध करण लाग्या; 35 अर उस्से दिन उन ताहीं उसनै ले लिया, अर उस ताहीं तलवार तै मारया; अर उसे दिन जिसा उसनै लाकीश के सारे प्राणियाँ का सत्यानाश कर दिया था उसाए उसनै एग्लोन नगर कै गैल भी करया।

36 फेर यहोशू सारे इस्राएलियाँ समेत एग्लोन तै चालकै हेब्रोन नगर म्ह गया, अर उसतै लड़ण लाग्या; 37 अर उन ताहीं उसनै ले लिया, अर उस ताहीं अर उसके राजा ताहीं अर सारे गाम्मां अर उन म्ह के सब प्राणियाँ ताहीं तलवार तै मारया; जिसा यहोशू नै एग्लोन कै गैल करया था उसाए उसनै हेब्रोन म्ह भी किसे ताहीं जिन्दा न्ही छोड्या; उसनै उस ताहीं अर उस म्ह के सब प्राणियाँ का सत्यानाश कर दिया।

38 फेर यहोशू सारे इस्राएलियाँ समेत घूमकै दबीर नगर म्ह गया, अर उसतै लड़ण लाग्या; 39 अर राजा समेत उस ताहीं अर उसके सारे गाम्मां ताहीं ले लिया; अर उन ताहीं तलवार तै घात करया, अर जितने प्राणी उन म्ह थे सब का सत्यानाश कर दिया; किसे ताहीं जिन्दा न्ही छोड्या, जिसा यहोशू नै हेब्रोन अर लिब्ना नगर अर उसके राजा तै करया था उसाए उसनै दबीर नगर अर उसके राजा तै भी करया।

40 इस तरियां यहोशू नै उस सारे देश ताहीं, यानिके पहाड़ी देश, नेगेब, दक्षिण देश, नीच्‍चै के देश, अर ढालू देश ताहीं, उनके सब राजयां समेत मारया; अर इस्राएल के परमेसवर यहोवा के हुकम कै मुताबिक किसे ताहीं जिन्दा न्ही छोड्या, बलके जितने प्राणी थे सारया का सत्यानाश कर दिया। 41 अर यहोशू नै कादेशबर्ने नगर म्ह लेकै गाज़ा नगर ताहीं, अर गिबोन नगर ताहीं के सारे गोशेन देश के माणसां ताहीं मारया। 42 उन सारे राजा ताहीं अर उनके दुश्मनां ताहीं समेत यहोशू नै एके बखत म्ह ले लिया, क्यूँके इस्राएल का परमेसवर यहोवा इस्राएलियाँ की और तै लड़ै था। 43 फेर यहोशू सारे इस्राएलियाँ समेत गिलगाल की छावणी म्ह बोहड़ आया।