1 यहोशू सबेरै कै बखत उठ्या, अर सारे इस्राएलियाँ नै गैल ले शित्तीम तै चालकै यरदन नदी के किनारे आया; अर वे पार उतरण तै पैहले ओड़ैए टिकगे। 2 अर तीन दिन कै बाद सरदारां नै छावणी कै बिचाळै जाकै 3 प्रजा के माणसां ताहीं यो हुकम दिया, "जिब थमनै अपणे परमेसवर यहोवा के करार का सन्दूक अर उस ताहीं ठाए होए लेवीय याजक दिखाई देवै, फेर अपणी जगहां तै चालकै उसकै पाच्छै-पाच्छै चालियो, 4 पर सन्दूक के अर थारै बीच म्ह दो हजार हाथ के लगभग अन्तर रहवै; थम सन्दूक कै धोरै ना जाईयो। ताके थम देख सको, के किस राह तै थमनै चालणा सै, क्यूँके इब ताहीं थम इस राह तै होकै न्ही चाल्‍ले।" 5 फेर यहोशू नै प्रजा के माणसां तै कह्या, "थम अपणे आप नै पवित्र करो; क्यूँके कल के दिन यहोवा थारे बीच म्ह अचम्भे काम करैगा।" 6 फेर यहोशू नै याजकां तै कह्या, "करार का सन्दूक ठाकै प्रजा कै आग्गै-आग्गै चाल्‍लों।" फेर वे वाचा का सन्दूक ठाकै माणसां कै आग्गै-आग्गै चाल्‍ले।

7 फेर यहोवा नै यहोशू तै कह्या, "आज कै दिन तै मै सारे इस्राएलियाँ कै स्याम्ही तेरी प्रशंसा करणा शरु करुँगा, जिसतै वे जाण लेंगे के जिस तरियां मै मूसा कै गैल रहया था उस्से तरियां ए मै तेरै गैल भी सूं। 8 अर तू करार के सन्दूक के ठाणआळे याजकां नै यो हुकम दे, ‘जिब थम यरदन नदी के पाणी कै किनारे पोहचों, फेर यरदन म्ह खड़े रहियो।’"

9 फेर यहोशू नै इस्राएलियाँ तै कह्या, "धोरै आकै अपणे परमेसवर यहोवा के वचन सुणो।" 10 अर यहोशू कहण लाग्या, "इसतै थम जाण ल्योगे के जिन्दा परमेसवर थारै बीच म्ह सै, अर वो थारै स्याम्ही तै बेशक कनानियाँ, हित्तियाँ, हिब्बियाँ, परिज्जियाँ, गिर्गाशियाँ, एमोरियां, अर यबूसियाँ नै उनके देश म्ह तै लिकाड़ देगा। 11 सुणो, धरती भर के प्रभु की वाचा का सन्दूक तेरै आग्गै-आग्गै यरदन म्ह जाण पै सै। 12 इस करकै इब इस्राएल के कुलां म्ह तै बाराह माणसां नै चुण ल्यो, वे एक-एक गोत्र म्ह तै एक-एक माणस हो। 13 अर जिस बखत प्रभु यहोवा के करार का सन्दूक ठाणआळे याजकां के पैर यरदन के पाणी म्ह पड़ैंगे, उस बखत यरदन का उप्पर तै बैहन्दा होया पाणी थम जावैगा, अर ढेर होकै ठहरया रहवैगा।"

14 ज्यांतै जिब प्रजा के माणसां नै अपणे डेरयां तै यरदन नदी पार करण खात्तर चाल्‍ले, तो याजक करार का सन्दूक ठाए होए प्रजा कै आग्गै-आग्गै चाल्‍ले, 15 अर सन्दूक के ठाणआळे यरदन नदी पै पोहचे, अर सन्दूक के ठाणआळे याजकां के पैर यरदन के तट के पाणी म्ह पड़े (यरदन नदी का पाणी तो कटणी कै बखत के हर दिन अपणे तट के ऊपर-ऊपर बह्या करदा), 16 फेर जो पाणी उप्पर की और तै बह्या आवै था वो घणा दूर, यानिके आदाम नगर कै धोरै जो सारतान कै लोवै सै रुक कै एक ढेर होग्या, अर दीवार जिसा उठ्या रहया, अर जो पाणी अराबा का ताल, जो मृत सागर भी कुहवावै सै उसकी और बह्या करै था, वो पूरी तरियां तै सूख ग्या; अर प्रजा के माणस यरीहो कै स्याम्ही पार उतरगे। 17 अर याजक यहोवा के करार का सन्दूक ठाए होए यरदन के बीचों बीच पोहचकै सुखी धरती पै मजबूती तै खड़े रहे, अर सारे इस्राएली सुक्खी-सुक्खी ए धरती पार उतरदे रहे आखर म्ह उस सारी जात्ति के लोग यरदन पार होगे।