1 जिब सारे लोग यरदन नदी पार कर चुके, फेर यहोवा नै यहोशू तै कह्या, 2 "हरेक कुल म्ह तै बाराह माणस, यानिके कुल के हिसाब तै एक-एक माणस नै चुणकै यो हुकम दे, 3 ‘थम यरदन कै बीच म्ह, जित्त याजकां नै पैर धरे थे ओड़ै तै बाराह पत्थर ठाकै अपणे गैल पार ले चाल्‍लों, अर जित्त आज की रात पड़ाव होवैगा ओड़ैए उन ताहीं धर दियो।’" 4 फेर यहोशू नै उन बाराह माणसां ताहीं, जिनतै उसनै इस्राएलियाँ के हरेक कुल म्ह तै छाटकै ठहरा राख्या था, 5 बुलवा के कह्या, "थम अपणे परमेसवर यहोवा के सन्दूक कै आग्गै यरदन कै बीच म्ह जाकै इस्राएलियाँ के कुलां की गिणती कै मुताबिक एक-एक पत्थर ठाकै अपणे-अपणे कंधे पै राक्खो, 6 जिसतै थारै बीच यो निशान ठैहरे, अर आग्गै आण आळे बखत म्ह जिब थारे बच्‍चें यो पूच्छै, ‘इन पत्थरां का के मतलब सै?’ 7 फेर थम उननै यो उत्तर दियो, के यरदन नदी का पाणी यहोवा के वाचा के सन्दूक कै स्याम्ही तै दो भाग होग्या था; क्यूँके जिब वो यरदन पार आण लाग रहया था, तब यरदन का पाणी दो भाग होग्या। आखर वे पत्थर इस्राएल ताहीं सदा खात्तर याद दुवाण आळे ठैहरेंगे।"

8 यहोशू के इस हुकम कै मुताबिक इस्राएलियाँ नै करया, जिसा यहोवा नै यहोशू तै कह्या था उसाए उन ताहीं इस्राएली कुलां की गिणती के मुताबिक बाराह पत्थर यरदन कै बीच म्ह तै ठा लिए; अर उन ताहीं अपणे गैल ले जाकै पड़ाव म्ह धर दिये। 9 अर यरदन कै बीच, जित्त याजक वाचा के सन्दूक नै ठाए होए अपणे पैर धरे थे ओड़ै यहोशू नै बाराह पत्थर खड़े कराए; वे आज तक ओड़ैए पाए जावै सैं। 10 अर याजक सन्दूक ठाए होए उस बखत ताहीं यरदन कै बीच खड़े रहे जिब ताहीं सारी बात पूरी ना होई, जिन ताहीं यहोवा नै यहोशू तै माणसां ताहीं कहण का हुकम दिया था। फेर सारे माणस फुर्ती तै पार उतरगे; 11 अर जिब सारे माणस पार उतरगे, फेर याजक अर यहोवा का सन्दूक भी उनकै आग्गै पार होया। 12 अर रूबेनी, गादी, अर मनश्शे के आध्धे गोत्र* के माणस मूसा के कहण कै मुताबिक इस्राएलियाँ के आग्गै पाँति बाँधे होए पार होए; 13 यानिके कोए चाळीस हजार माणस युद्ध के हथियार बाँधे होए युद्ध करण खात्तर यहोवा कै स्याम्ही पार उतरकै यरीहो कै धोरै के अराबा म्ह पोहचे। 14 उस दिन यहोवा नै सारे इस्राएलियाँ कै स्याम्ही यहोशू की महिमा बढ़ाई; अर जिसा वे मूसा का डर मान्‍नै थे उसाए वे यहोशू का भी डर उसके जिन्दगी भर मानते रहे।

15 अर यहोवा नै यहोशू तै कह्या, 16 "वाचा का सन्दूक ठाणआळे याजकां ताहीं हुकम दे के यरदन म्ह तै लिकड़ आवै।" 17 तो यहोशू नै याजकां ताहीं हुकम दिया, "यरदन म्ह तै लिकड़ आओ।" 18 अर जिब यहोवा के वाचा का सन्दूक ठाणआळे याजक यरदन के बीच म्ह तै लिकड़ आए, अर जिब उनके पैर धरती पै पड़े, जिब ए यरदन का पाणी अपणी जगहां पै आया, अर पैहले की तरियां किनारयाँ कै उप्पर फेर बहण लाग्या।

19 पैहले महिन्‍ने के दसवें दिन प्रजा के माणसां नै यरदन नदी म्ह तै लिकड़कै यरीहो की पूर्वी सीमा पै गिलगाल म्ह अपणे डेरे डाले। 20 अर जो बाराह पत्थर यरदन म्ह तै लिकाड़े गए थे, उन ताहीं यहोशू नै गिलगाल म्ह खड्या करया। 21 फेर उसनै इस्राएलियाँ तै कह्या, "जिब आण आळे बखत म्ह थारे बाल-बच्‍चे अपणे-अपणे पिता तै यो पूच्छै, ‘इन पत्थरां का के मतलब सै?’ 22 फेर थम यो कहकै उननै बताइयो, ‘के इस्राएली यरदन म्ह तै सूक्खी धरती पै तै चाल के आए थे।’ 23 क्यूँके जिस तरियां थारे परमेसवर यहोवा नै लाल समुन्दर ताहीं म्हारे पार हो जाण खात्तर म्हारे स्याम्ही तै हटाकै सूखा ए सूखा राख्या था, उसे तरियां ए उसनै यरदन का भी पाणी थारे पार हो जाण ताहीं थारे स्याम्ही तै हटाकै सूखा ए सूखा राख्या; 24 ज्यांतै के पृथ्वी के सारे देशां के माणस जाण लेवै के यहोवा का हाथ बलवन्त सै; अर थम सदा अपणे परमेसवर यहोवा का डर मान्दे रहो।"