1 फेर लेवी कुल के पूर्वजां के घरान्यां के खास-खास माणस एलीआजर याजक, अर नून के बेट्टे यहोशू, अर इस्राएली गोत्रां के पूर्वजां के घरान्यां के खास-खास आदमियाँ कै गैल आकै 2 कनान देश के शीलो नगर म्ह कहण लाग्गे, "यहोवा नै मूसा के जरिये म्हारे बसण खात्तर नगर, अर म्हारे पशुआं खात्तर उन नगरां की चराई भी देण का हुकम दिया था।" 3 फेर इस्राएलियाँ नै यहोवा के कहण कै मुताबिक अपणे-अपणे हिस्से म्ह तै लेवियाँ नै चराईयाँ समेत ये नगर दिए।

4 फेर कहातियाँ के गोत्र के नाम पै चिट्ठी लिकड़ी। ज्यांतै लेवियाँ म्ह तै हारुन याजक के वंश नै यहूदी, शिमोन, अर बिन्‍यामीन के गोत्र के हिस्यां म्ह तै तेरह नगर मिले।

5 बाकी कहातियाँ नै एप्रैम के गोत्र के कुलां, अर दान के गोत्र, अर मनश्शे के आध्धे गोत्र के हिस्यां म्ह तै चिट्ठी गेर-गेरकै दस नगर दिए गए।

6 अर गेर्शोनियाँ ताहीं इस्साकार के गोत्र के कुलां, अर आशेर, अर नप्ताली के गोत्र के हिस्यां म्ह तै, अर मनश्शे के उस आध्धे गोत्र के हिस्यां म्ह तै भी जो बाशान म्ह था चिट्ठी गेर-गेरकै तेरह नगर दिए गए। 7 कुलां कै मुताबिक मरारियाँ नै रूबेन, गाद, अर जबूलून के गोत्र के हिस्यां म्ह तै बाराह नगर दिए गए।

8 जो हुकम यहोवा नै मूसा के जरिये दिए थे उसकै मुताबिक इस्राएलियाँ नै लेवियाँ ताहीं चराईयाँ समेत ये नगर चिट्ठी गेर-गेरकै दिए। 9 उननै यहूदियाँ अर शिमोनियां के कुल के हिस्यां म्ह तै ये नगर जिनके नाम लिखे सैं दिए; 10 ये नगर लेवीय कहाती कुलां म्ह तै हारुन के वंश कै खात्तर थे; क्यूँके पैहली चिट्ठी उन्हे कै नाम पै लिकड़ी थी। 11 यानिके उन ताहीं यहूदा के पहाड़ी देश म्ह च्यांरु और की चराईयाँ समेत किर्यतअर्बा नगर दे दिए, जो अनाक के पिता अर्बा के नाम पै कुह्वाया अर हेब्रोन भी कुहवावै सै। 12 पर उस नगर के खेत अर उसके गाम उन ताहीं यपुन्‍ने के बेट्टे कालेब नै उसकी निज धरती करकै दे दी।

13 फेर उननै हारुन याजक के वंश ताहीं चराईयाँ समेत खून्‍नी के शरणनगर हेब्रोन, अर अपणी-अपणी चराईयाँ समेत लिब्ना, 14 यत्तीर, एश्तमो, 15 होलोन, दबीर, ऐन, 16 युत्ता अर बेतशेमेश दिए; इस तरियां उन दोन्‍नु गोत्रां के हिस्यां म्ह तै नौ नगर दिए गए। 17 अर बिन्‍यामीन गोत्र के हिस्से म्ह तै अपणी चराईयाँ समेत ये च्यार नगर दिए गए, यानिके गिबोन, गेबा, 18 अनातोत अर अल्मोन। 19 इस तरियां हारुनवंशी याजकां नै तेरह नगर अर उनकी चराई मिली।

20 फेर बाकी कहाती लेवियाँ के गोत्रां के हिस्से के नगर चिट्ठी गेर-गेरकै एप्रैम के गोत्र के हिस्से म्ह तै दिए गए। 21 यानिके उन ताहीं चराईयाँ समेत एप्रैम की पहाड़ी देश म्ह खून्‍नी के शरण लेण का शेकेम नगर दिया गया, फेर अपणी-अपणी चराईयाँ समेत गेजेर, 22 किबसैम, अर बेथोरोन; ये च्यार नगर दिए गए। 23 अर दान के गोत्र के हिस्से म्ह तै अपणी चराईयाँ समेत, एलतके, गिब्बतोन, 24 अय्यालोन, अर गत्रिम्मोन; ये च्यार नगर दिए गए। 25 अर मनश्शे के आध्धे कुल के हिस्से म्ह तै अपणी चराईयाँ समेत तानाक अर गत्रिम्मोन; ये दो नगर दिए गए। 26 इस तरियां बाकी कहातियाँ के गोत्र के सारे नगर चराईयाँ समेत दस ठैहरे।

27 फेर लेवियाँ के गोत्रां म्ह के गेर्शोनियाँ ताहीं मनश्शे के आध्धे गोत्र के हिस्से म्ह तै अपणी चराईयाँ समेत खून्‍नी के शरणनगर बाशान का गोलन अर बेशतरा; ये दो नगर दिए गए। 28 अर इस्साकार के गोत्र के हिस्से म्ह तै अपणी चराईयाँ समेत किश्योन, दाबरात, 29 यर्मूत, अर एनगन्‍नीम; ये च्यार नगर दिए गए। 30 अर आशेर के कुल के हिस्से म्ह तै अपणी चराईयाँ समेत मिशाल, अब्दोन, 31 हेल्कात, अर रहोब; ये च्यार नगर दिए गए। 32 अर नप्ताली के गोत्र के हिस्से म्ह तै अपणी चराईयाँ समेत खून्‍नी के शरणनगर गलील का केदेश, फेर हम्मोतदोर, अर कर्तान; ये तीन नगर दिए गए। 33 गेर्शोनियाँ के गोत्र कै मुताबिक उनके सारे नगर अपणी-अपणी चराईयाँ समेत तेरह ठैहरे।

34 फेर बाकी लेवियाँ, यानिके मरारियाँ के गोत्रां तै जबूलून के गोत्र के हिस्से म्ह तै अपणी चराईयाँ समेत योकनाम, कर्ता, 35 दिम्ना, अर नहलाल; ये च्यार नगर दिए गए। 36 अर रूबेन के कुल के हिस्से म्ह तै अपणी चराईयाँ समेत बेसेर, यहस, 37 कदेमोत, अर मेपात; ये च्यार नगर दिए गए। 38 अर गाद के गोत्र के हिस्से म्ह तै अपणी चराईयाँ समेत खून्‍नी के शरणनगर गिलाद म्ह का रामोत, फेर महनैम, 39 हेशबोन, अर याजेर, जो सारे मिलाकै च्यार नगर सैं दिए गए। 40 लेवियाँ के बाकी बचे होए कुलां यानिके मरारियाँ के गोत्र कै मुताबिक उनके सारे नगर येए ठैहरे, इस तरियां उन ताहीं बाराह नगर चिट्ठी गेर-गेरकै दिए गए।

41 इस्राएलियाँ की अपणी धरती कै बिचाळै लेवियाँ के सारे नगर अपणी-अपणी चराईयाँ समेत अड़ताळीस ठैहरे। 42 ये सारे नगर अपणे-अपणे च्यांरु और की चराईयाँ कै गैल ठैहरे; इन सब नगरां की याए दशा थी।

43 इस तरियां यहोवा नै इस्राएलियाँ ताहीं वो सारा देश दिया, जिस ताहीं उसनै उनकै इस्राएली पूर्वजां तै कसम खाकै देण नै कह्या था; अर वे उसके अधिकारी होकै उस म्ह बसगे। 44 अर यहोवा नै उन सब बात्तां कै मुताबिक, जो उसनै उनकै इस्राएली पूर्वजां तै कसम खाकै कही थी, उन ताहीं च्यांरु और तै विश्राम दिया; अर उनके दुश्मनां म्ह तै कोए भी उनकै स्याम्ही टिक न्ही सक्या; यहोवा नै उन सारया ताहीं उनके वश म्ह कर दिया। 45 जितनी भलाई के वादे यहोवा नै इस्राएल के घरान्‍ने तै कही थी उन म्ह तै कोए भी बात ना छूटी; सारी की सारी पूरी होई।